འཛམ་གླིང་མགོན་པོར་བསྟོད་པ།

རྒྱལ་བའི་རྒྱལ་ཚབ་སེམས་དཔའ་ཆེན་པོ་ཁྱེད།།

རིགས་གསུམ་མགོན་པོའི་མཁྱེན་བརྩེ་ནུས་གསུམ་གྱི།།

དཔལ་ལ་གཅིག་ཏུ་མངའ་དབང་འབྱོར་བར་མཛད།།

གོ་ལ་ཧྲིལ་པོའི་མངའ་བདག་ཁྱེད་ལ་གུས།།

སེམས་བསྐྱེད་སྐོར་ལན་དུ་ཕུལ་བ།

༈ དཔལ་ལྡན་བླ་མ་དམ་པར་ཕྱག་འཚལ་ལོ།།

སེམས་བསྐྱེད་སྐོར་གྱི་དྲིས་ལན་ཅུང་ཞིག་འབུལ།།

གཞན་དོན་དུ་རྫོགས་བྱང་འཐོབ་འདོད་ཀྱི་བློ་སེམས་བསྐྱེད་ཀྱི་མཚན་ཉིད། ཟུར་གསུམ་སྟེ། གཞན་དོན་དུ་ཞེས་པས་རང་དོན་ཞི་བ་ཡིད་བྱེད་གཅོད། རྫོགས་བྱང་འཐོབ་འདོད་ཀྱི་བློ་ཞེས་པས་དངོས་སུ་དོན་དམ་སེམས་བསྐྱེད་གཅོད་ཅིང་། ཤུགས་ལ་འདོད་པའི་བློ་ཞེས་པས་སེམས་སེམས་འབྱུང་རྐྱང་པ་རེ་ལ་སེམས་བསྐྱེད་དུ་འདོད་པ་གཅོད་པ་སྟེ། འདོད་པ་ཞེས་པས་སེམས་བྱུང་འདུན་པ་བསྟན་པ་དང་། བློ་ཞེས་པས་གཙོ་སེམས་བསྟན་པ་ཡིན་པས། དེ་གཉིས་མཚུངས་པ་ལྔ་མཚུངས་ཀྱིས་འབྲལ་མི་ཤེས་པར་གནས་པའོ། །འདུན་པ་ནི་གཉིས་ཏེ། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་དང་། དོན་དུ་གཉེར་བྱ་རྣམ་མཁྱེན་འཐོབ་པའི་དོན་དུ་འདུན་པའོ། །དེ་ལྟར་འདུན་པ་དང་མི་འབྲལ་བའི་སེམས་བསྐྱེད་དགོས་སོ།།

ཡུལ་སྐད་ཡིག་ཐོག་ཏུ་འབྲི་རུང་མིན་སོགས་ལས་འཕྲོས་པའི་ལན་དུ་བྲིས་པ།

༈ སྤྱིར་ཡུལ་སྐད་ཡིག་ཐོག་ཏུ་འབེབས་རྒྱུ་ནི། སྤྱི་སྐད་དམར་གསོད་གཏོང་བའི་རྒྱུ་རྐྱེན་དུ་འགྲོ་བར། སྔོན་བྱོན་མཁས་པ་མང་པོས་གསུངས་པ། ད་ལྟའི་མཁས་པ་ཚོས་ཀྱང་དེ་ལ་རྩི་བཀུར་ཞུ་བཞིན་པ་རེད། འོན་ཀྱང་རང་རེའི་ཡུལ་སྐད་ངེས་པར་དུ་ཡི་གེར་འགོད་དགོས་ན། སྔར་ཡོད་ཟིན་པའི་ཐ་སྙད་ལ་ང་ཚོས་རང་རང་གི་ཁ་ནས་གང་འཐོན་ལྟར་བསྒྱུར་ན་མི་རིགས་ཤིང་། སྒྲ་གདངས་ཀྱི་ཁྱད་པར་ཅུང་ཟད་རེའི་དབང་གིས་བཅོས་དགོས་ན། དཔེར་ན། སྔོན་གྱི་ཡིག་ཆ་རྣམས་སུ་"ཨ་ཇོ་"འབྲི་བ་དེ་ཁྱབ་ཆེ་བ་རེད་མོད། "ཨ་ཇོ་"དང་"ཨ་ཅོ་"གང་ལྟར་བྲིས་ནའང་ཁྱད་པར་མེད།

«ཚད་མ་རིགས་པའི་ཐེམ་སྐས་»ལ་ཐོས་བསམ་བགྱིད་པར་བསྐུལ་བ།

ཚད་མའི་བསྟན་བཅོས་མཐའ་དག་གནད་བསྡུས་ནས།།

རིགས་པའི་རྣམ་གཞག་འགྲོས་བདེར་བསྒྲིགས་པ་འདིའི།།

ཐེམ་སྐས་ལ་བརྟེན་རྐང་དྲུག་བུང་བའི་ཚོགས།།

ས་སྒང་འཇིག་རྟེན་གང་སར་ཁྱབ་དེར་བསྟོད།།

བློ་འཛིན་བགྱིད་པར་བསྐུལ་བའི་གཏམ་ཆུང་སྙན་པའི་བུ་རམ།

གཞུང་ལུགས་གང་ལའང་སྦྱངས་དང་མ་སྦྱངས་དེ། །

གཙོ་བོ་བློ་འཛིན་བྱས་དང་མ་བྱས་ཐུག།།

བློ་འཛིན་མ་བྱས་གཞུང་ལུགས་གང་ལ་ཡང་། །

ཡིན་ལ་མིན་ལར་སྦྱངས་པས་གོ་མི་ཆོད། །

སྦྲགས་སྐད་དང་འབྲེལ་བའི་སྐད་ཆ་ཐོར་བུ།

སྟོང་གསུམ་གྱི་སྟོང་ཆེན་པོའི་འཇིག་རྟེན་ཟེར་བ་གང་ཤེས་ཏེ། གང་ལྟར་འཛམ་གླིང་ཆུང་ཆུང་འདིར་སོ་སོའི་མི་རིགས་ཀྱི་སྐད་དག་མ་དག་ཀྱང་ཞིག་ཤོད་ཐུབ་མཁན་ནི་ཧ་ཅང་གིས་ཉུང་ཉུང་ཡིན་ཚོད་རེད། ཞིབ་ཚོད་ཅིག་བྱས་ན། ཕལ་ཆེར་ད་ལྟ་གོ་ལ་འདིར་རང་སྐད་དག་ཤོས་རྒྱག་མཁན་ཞིག་ཨ་ཡོད་སྙམ། དེང་གི་འགྲོ་ལུགས་ལྟར་ཡར་རྒྱས་མེད་པའི་ངེད་དོལ་པོ་ལྟ་བུའི་ས་ཁུག་ལུང་ཁུག་གི་ས་ཆ་དེ་འདྲ་ལའང་། པིནྜཱལ་(पिंडालु)དང་གྷོ་གྷཱ(घोघा)། སྦྱར་མ་(जामा)དང་འཛེང་གི(जांगी) ཐེ་ལེ(थाली)དང་བ་ཊུཀ་(बटुका)སོགས། ཟ་ཆས་གོན་ཆས་དང་མཁོ་ཆས་མང་པོ་ཞིག་གི་མིང་རྣམས་གཞན་སྐད་དག་དག་ཡིན་པ་རེད།

༈ ཨོ་རྒྱན་རིན་པོ་ཆེའི་ཞལ་གདམས་ཚིགས་བཅད་གཅིག་གི་ཚིག་དོན་གོ་བདེར་བཀྲལ་བ།

བེམ་རིག་མ་བྲལ་ཆོས་ལ་སྒོམ་པ་གྱིས།།

མཚན་བྱང་མགོ་ལ་དབང་བསྐུར་བྱེད་ཚེ་ཕྱིས།།

རྣམ་ཤེས་བར་དོར་ཁྱི་གླེན་བཞིན་དུ་འཁྱམས།།

མཐོ་རིས་འདྲེན་ཏེ་དེ་ལ་དཀའ་ལས་ཡོད།།