སྔ་འགྱུར་གྱི་ཆེ་བ་དྲུག་དེ་ཉིད་ཀུན་མཁྱེན་རོང་ཟོམ་གྱིས་གསུངས་པར་གྲགས་ན་ཉིད་ཀྱི་ད་བཞུགས་གསུང་འབུམ་དུ་མར་མཐོང་བ་ལས་གསུང་འབུམ་གང་དུ་ཡོད་དམ།
གལ་ཏེ་ད་བཞུགས་ཀྱི་གསུང་ན་མེད་ན། རོང་ཟོམ་གྱི་གསུང་ཡིན་ཞེས་མཁས་པ་སུས་འདི་ཐོག་མར་ལུང་འདྲེན་གནང་ཡོད།
ལན་གསུངས་རོགས་ཞེས་པའི་དྲི་བར་ལན་འདི་ལྟར་བཏབ།
མི་ཡུལ་མགྲོན་པོ་ལགས། སྔ་འགྱུར་གྱི་ཆེ་བ་དྲུག་དེ་ཉིད་ཀུན་མཁྱེན་རོང་ཟོམ་གྱིས་གསུངས་པར་གྲགས་པ་ཡོངས་གྲགས་ཡིན་པ་མ་ཟད།
ད་ལྟར་བཞུགས་པའི་ཉིད་ཀྱི་གསུང་འབུམ་དག་ཏུའང་མེད་པ་ཡོངས་གྲགས་རེད་ལ།
དེ་བཞིན་ཆེ་བ་དྲུག་པོ་དེ་རོང་ཟོམ་པས་དཔེ་ཆ་འདི་ན་གསུངས་འདུག་ཅེས་ལུང་ཁུངས་ཚད་ལྡན་ལས་ལུང་ཚིག་ཇི་བཞིན་དྲངས་པའི་མ་དཔེ་ཡང་ཧ་ལམ་མེད་པ་ཡོངས་གྲགས་རེད།
རོང་ཟོམ་པའི་སློབ་མ་གསར་རྙིང་རིས་སུ་མ་ཆད་པའི་མཁས་པའི་དབང་པོ་དང་གྲུབ་པའི་སྐྱེས་མཆོག་དུ་མ་ཞིག་བྱུང་ཡོད་པར་ལོ་རྒྱུས་དག་ཏུ་གསལ་ཁ་ཡོད་ལ།
དེ་དག་ལས་རྙིང་མར་གཏོགས་པ་རྣམས་ཀྱིས་དཔེ་ཆ་བརྩམས་པ་དེ་ཙམ་མེད།
གལ་ཏེ་ཡོད་དུ་ཆུག་ཀྱང་འོ་ཅག་གི་ལས་དང་སྐལ་བས་དབེན་པས་ད་ཆ་མཐོང་རྒྱུ་རིག་རྒྱུ་མེད།
ཕྱིས་སུ་རོང་ཟོམ་ཉིད་ཀྱི་གསུང་ཡིན་པར་ཞལ་བཞེས་མཛད་པ་པོ་ནི་རོང་ཟོམ་གཤེགས་ནས་ལོ་གྲངས་བདུན་ཙམ་གྱི་རྗེས་སུ་བྱོན་པའི་«རོག་བན་དེ་ཤེས་རབ་འོད་»དེ།
ཁོང་གི་གསུང་འབུམ་«ཆོས་འབྱུང་བསྟན་པའི་སྒྲོན་མེ་»ཞེས་བྱ་བར་ལུང་ཚིག་ཇི་བཞིན་བཀོད་མེད་ཀྱང་།
རོང་ཟོམ་ཉིད་ཀྱི་ཞལ་རྒྱུན་ཞིག་ཡིན་པའི་ཚུལ་དུ་དྲངས་ཡོད། དེས་ན་སྔ་འགྱུར་ཆེ་བ་དྲུག་ལྡན་ཞེས་བྱ་བ་ཉིད་རོང་ཟོམ་པའི་ཞལ་རྒྱུན་ཡིན་པ་ཙམ་ལས།
རོང་ཟོམ་པས་དཔེ་ཆ་གང་དུ་ཚུལ་ཇི་ལྟར་གསུངས་པའི་ལུང་ཚིག་ཇི་མ་ཇི་བཞིན་ཞིག་དྲང་རྒྱུ་མེད་ཅིང་དྲངས་པའི་དཔེ་ཆའང་མེད་ཅེས་སྨྲས་ཀྱང་ཕལ་ཆེར་འཐད་སྙམ་མོ།།
ཡོངས་གྲགས་ལྟར་རོང་ཟོམ་དང་རོག་བན་གཉིས་ཀྱི་འཁྲུངས་འདས་ལོ་ཚིགས་ཟུར་བཀོད།
རོང་ཟོམ་མ་ཧཱ་པཎྜིཏ། ༼༡༠༤༠ - ༡༡༥༩༽
རོག་བན་དེ་ཤེས་རབ་འོད། ༼༡༡༦༦ - ༡༢༤༤༽
མཁས་པའི་དབང་པོ་དང་གྲུབ་པའི་ཁྱུ་མཆོག་དུ་མས་ཡོངས་སུ་གང་བའི་ཀློང་ཆེན་ལྟ་གྲུབ་གླིང་གི་འཕྲིན་ཕྲན་དྲྭ་ཚོམས་ཆེན་མོར་དྲྭ་མིང་མི་ཡུལ་མགྲོན་པོའམ་སྐྱེས་ཡུལ་དང་གདན་ས་གཉིས་ཀ་གཅིག་པའི་མཆེད་གྲོགས་དྷྭ་ཛ་དོལ་པོའི་ཞུ་ལན་དུ་ཕུལ་བ་དགེའོ།།
