རྟོག་རླབས་གཟེགས་མ།: ཨ་ནུ་ཡོ་གའི་ཆོས་སྐོར་འདུས་མདོ་དང་འབྲེལ་བའི་སྐོར་གྱི་དྲི་ལན།

«ཕྲིན་ཕྲན་ནང་གི་དྲྭ་ཚོམས་དག་ཏུ་འདུས་མདོའི་སྐོར་གྱི་བཀའ་འདྲི་རོབ་ཙམ་ཞུས་པ་ལས་བྱུང་བའི་དོགས་ལན།»

དྲི་བ། ལྷན་རྒྱས་ཉིན་མོ་བདེ་ལེགས། ཀུན་རྟོག་གི་འཆར་སྣང་འགའ་ཞིག་ཞུ་བར་འདོད་པས། བཀའ་ལན་ཡོད་པར་འཚལ།

སློབ་དཔོན་ཆེན་པོ་གུ་རུ་པདྨ་འབྱུང་གནས་ཀྱི་གསོལ་འདེབས་ལེའུ་བདུན་མའི་ནང་གསེས་ལེའུ་བཞི་པ་གསང་བ་རིག་འཛིན་བརྒྱུད་པའི་གསོལ་འདེབས་སྐབས། སྔ་འགྱུར་བཀའ་མ་མདོ་རྒྱུད་སེམས་གསུམ་གྱི་རིམ་བརྒྱུད་རྣམས་ལས། རྫོགས་ཆེན་དང་སྒྱུ་འཕྲུལ་བརྒྱུད་པའི་བླ་མ་ལ་གསོལ་འདེབས་རེ་མཛད་ཡོད་ཅིང་། འདུས་མདོ་བརྒྱུད་པའི་བླ་མ་ལ་གསོལ་འདེབས་མཛད་པ་ཡེ་ནས་མི་གསལ་བས། འདི་ཡི་རྒྱུ་མཚན་གང་ལ་ཐུག་གམ།
དེ་བཞིན་ལོ་རྒྱུས་རྣམས་ལས་མངའ་བདག་ཁྲི་རལ་གྱིས་བཀས་བཅད་དུ་མ་ཞིག་མཛད་པའི་ནང་བཀས་བཅད་གཅིག་ནི། གསང་སྔགས་བླ་མེད་མ་རྒྱུད་རྣམས་བསྒྱུར་མི་ཆོག་པའི་བཀས་བཅད་མཛད་པར་གསལ་བ་དེ་དངོས་གནས་ཡིན་ནམ་མིན། གལ་ཏེ་དངོས་ཡིན་ན་དེའི་རྒྱུ་མཚན་གང་ལ་ཐུག་གམ།
སྤྱིར་གསང་སྔགས་རྙིང་མའི་ཨ་ནུ་ཡོ་གའི་སྤྱི་མདོ་དགོངས་པ་འདུས་པ་ནི་མ་རྒྱུད་ཡིན་ལ། དེ་ནི་བཙན་པོ་ཁྲི་རལ་སྐབས་གླང་དར་མས་དམ་པའི་ཆོས་བསྣུབས་དང་སྣུབ་བཞིན་པ་དེའི་ཚེ་དེའི་དུས་ན། རྒྱུད་འགའ་ཞིག་བསྒྱུར་དབང་མ་བྱུང་ནས་བྲུ་ཤའི་ཡུལ་གྱི་ཁྲོམ་དུ་བྱོན་ཏེ་བྲུ་ཤའི་སྐད་ལས་བསྒྱུར་བར་མཛད་ཅེས་ཡོངས་སུ་གྲགས་ན། དེའི་སྔོན་མངའ་བདག་ཁྲི་རལ་ཞབས་ནས་གསང་སྔགས་མ་རྒྱུད་བསྒྱུར་མི་ཆོག་པའི་བཀས་བཅད་མཛད་པ་ལ་དགོས་དབང་མེད་པར་འགྱུར་བ་མ་ཡིན་ནམ། ཡང་ན་དེ་ལ་ལན་ཇི་ལྟ་བ་ཞིག་འདེབས་དགོས་སམ།

_____ཚེ་དབང་ནོར་བུ་ནས། 13/08/2018

ལན། ལེའུ་བདུན་མར་འདུས་མདོའི་བླ་བརྒྱུད་གསོལ་འདེབས་མེད་དོན།

འདུས་མདོ་འདི་གནུབས་ཆེན་གྱིས་བསྒྱུར་པས་གནུབས་ཆེན་ཁོང་གུ་རུ་པདྨ་དང་དུས་མཉམ་ཡིན་མིན་གསུང་སྲོལ་སྣ་ཚོགས་འདུག བཀའ་ཐང་སོགས་གཏེར་མ་ཁག་ནས་སྒྲུབ་པ་བཀའ་བརྒྱད་ལས་སྐུ་འཇམ་དཔལ་ལ་མེ་ཏོག་ཕོག་པར་གསུངས་ཤིང་རྗེ་འབངས་སྙིང་གི་བུ་དགུ་ཐམས་ཅད་ལྷན་དུ་ཡོད་པ་ལྟ་བུ་གསལ་ཀྱང་། ཕལ་ཆེ་བས་གནུབས་ཆེན་ཁྲི་རལ་སྐབས་སུ་མཛད་འཕྲིན་རྒྱས་པའི་ལོ་རྒྱུས་དང་། རང་རྣམ་བཀའ་ཤོག་རྒྱ་བོ་ཆེ་ལས་ཀྱང་སློབ་དཔོན་པདྨ་རྒྱ་བལ་ས་མཚམས་ཤིག་ཏུ་མཇལ་ཚུལ་གསུངས་ཤིང་། བབས་སོ་དང་པོ་གཉགས་ཛྙཱ་ན་ཀུ་མ་ར་ཡང་དངོས་སུ་མ་མཇལ་བར་གཉགས་ཀྱི་བུ་ཆེན་སོག་པོ་ལྷ་དཔལ་ནས་དབང་ལུང་ཞུས་པར་གསལ། དེ་བས་ན་གསོལ་འདེབས་ལེའུ་བདུན་མ་འདི་གུ་རུ་སྐུ་དངོས་ཀྱིས་བོད་དུ་གསུངས་ཤིང་གཏེར་དུ་སྦས་པ་ཡིན་པས། སྐབས་དེར་གནུབས་ཆེན་གུ་རུའི་སློབ་ཆེན་གྲལ་དུ་ཡོད་པའི་དབང་དུ་བཏང་ཡང་འདུས་མདོ་ཕལ་ཆེར་བསྒྱུར་མེད་པ་འདྲ་སྙམ། སྤྱིར་སློབ་དཔོན་ཆེན་པོའི་ཐུགས་ལ་ཡོ་ག་སྡེ་གསུམ་ཚང་མ་མངའ་ཡང་གདུལ་བྱའི་ཁམས་དབང་བསམ་པ་ལ་དགོངས་ནས་གསུངས་མེད་པ་འདྲ་ལ། རྒྱ་གར་ན་གསང་སྔགས་རྣམས་ཧ་ཅང་གསང་ཞིང་ཡོངས་གྲགས་མེད་པའི་ཁར། དེ་དང་མཐུན་པར་བོད་ནའང་དེ་སྐབས་ཨ་ནུ་ཡོ་གའི་སྐོར་མ་གྲགས་པས་གནས་སྐབས་ཤིག་མ་གསུངས་པ་མིན་ནམ། ལོ་རྒྱུས་ཀྱི་བབས་དང་བསྟུན་ན་འདུས་མདོ་དེ་ཅུང་འགྱུར་ཕྱི་བས་བསམ་བློ་གཏོང་སའི་གཞི་ཅུང་ཙམ་འདུག་སྙམ།

ཁྲི་རལ་སྐབས་ཡོངས་གྲགས་མ་རྒྱུད་བསྒྱུར་མི་ཆོག་པའི་བཀས་བཅད་པ་དེ། མ་བརྒྱུད་ན་རྩ་རླུང་ཐིག་ལེའི་རྫོགས་རིམ་གཙོ་བོར་བསྟན་པས་གསང་སྔགས་ལ་ཁ་གཡར་ཏེ་སྦྱོར་བ་རང་གར་སྤྱད་ནས། བསྟན་པ་ལ་གནོད་སྐྱོན་ཡོང་ཉེན་ལ་དགོངས་ནས་བཀག་པ་རེད་གསུང་མཁན་ཡང་འདུག

སྤྱིར་གསང་སྔགས་ནང་རྒྱུད་ཆ་ཚང་སྐབས་དེ་དུས་བཙན་པོ་སྲིད་གཞུང་གིས་ཙུགས་པའི་ཆོས་ཀྱི་འདུན་སའམ་དགེ་འདུན་མཐུན་ཚོགས་ནས་ཆོག་མཆན་མེད་པར་བསྒྱུར་མི་ཆོག་ཚུལ་སྒྲ་སྦྱོར་བམ་གཉིས་སུའང་གསལ། འོན་ཀྱང་མྱང་ཏིང་འཛིན་སོགས་ཀྱིས་དེ་ལ་ངོ་རྒོལ་ཡང་རྒྱག་གིན་ཡོད་ཚུལ་སྦ་བཞེད་ཞབས་བཏགས་མ་ལས་གསལ་བས། སྔགས་ལ་དད་མོས་ཆེ་བ་ཚོས་སྔགས་ནང་རྒྱུད་རང་གར་སྒྱུར་མི་ཆོག་པ་དེ་དབའ་ཡེ་ཤེས་དབང་པོ་སོགས་མདོ་ལུགས་གཙོ་བོར་འཛིན་པའི་ཆོས་ཀྱི་འདུན་ས་ཆུང་ངུའི་མགོ་གཙོ་རྣམས་ཀྱིས་དྲང་བཞག་མ་བྱས་པ་ཞིག་ལ་ངོས་བཟུང་ནས་མོས་མཐུན་གནང་གི་མེད་པ་འདྲ། དེ་བས་ན་བཙན་པོའི་སྲིད་གཞུང་ཐོར་བ་དང་སྔགས་འཆང་རྣམས་ཀྱིས་ནང་རྒྱུད་ཡོ་ག་སྡེ་གསུམ་ཀ་ཆ་ཚང་བ་ཞིག་མ་སྒྱུར་ན་ཡན་ལག་ཉམས་པ་ལྟ་བུར་གཟིགས་ནས་གལ་ཆེན་དོན་ཆེན་གྱིས་བསྒྱུར་པ་མིན་ནམ་སྙམ། བསམ་ཚུལ་ཙམ་ཡིན།

_____སྤྲུལ་སྐུ་འཆི་མེད་ཚེ་དབང་ནས། 19/08/2018