དོལ་སྐད་ཁྲོད་ཀྱི་བྱ་ཚིག་དང་འབྲེལ་བའི་ཚིག་སྡུད་ཁག

དཔྱད་གཞིའི་ཚུལ་དུ་བྲིས།

① ཚིག་སྡུད་སྡེ་ཚན་དང་པོ། 

[བྱ་ཚིག་ད་ལྟ་བ་དང་ཚིག་ཕྲད་འདྲེས་མ། ༡]

གཅོག་གི་འདུག = གཅོག་གྱིག

གསུང་གི་འདུག = གསུང་གྱིག

སྡོད་ཀྱི་འདུག = སྡོད་ཀྱིག

སྟོན་གྱི་འདུག = སྟོན་གྱིག

གཏུབ་ཀྱི་འདུག = གཏུབ་ཀྱིག

གཅོམ་གྱི་འདུག = གཅོམ་གྱིག

འགེབས་ཀྱི་འདུག = འགེབས་ཀྱིག

འགེགས་ཀྱི་འདུག = འགེགས་ཀྱིག

     འདི་དག་ནི། རྗེས་འཇུག་ཅན་གྱི་བྱ་ཚིག་ད་ལྟ་བ་རྣམས་ཀྱི་རྗེས་སུ། ཨི་ལྡན་གྱི་ཕྲད་"གྱི་ཀྱི་"གཉིས་འཇུག་ཅིང་། དེ་ལ་བསྒྲུབ་བྱའི་ཕྲད་"འདུག་"བཅས་སྦྲེལ་བས། "གྱིག་"དང་"ཀྱིག་"བཅས་སུ་གྱུར་བར་སྟོན་པ་ཡིན།

སྨྲ་ཟེར་བཤད་གསུམ་དང་འབྲེལ་བའི་དོལ་སྐད་ཀྱི་ཐ་སྙད་ལ་དཔྱད་པ།

[སྨྲ།]

བོད་ཀྱི་ཡིག་སྐད་ཁྲོད་ཀྱི་"སྨྲ་"དང་འབྲེལ་བའི་དུས་གསུམ་གྱི་ལས་ཚིག་སྟེ། "སྨྲ་བྱ་སྨྲ་བྱེད་སྨྲས་སྨྲོས་ཤིག" ཅེས་པའི་ཚིག་འདི་དག་ལས་འཕྲོས་ཏེ་བཤད་ན། སྤྱིར་ནས་དེང་སང་དོལ་པོ་བ་མང་ཆེ་བས་ཡི་གེ་བྲི་དུས། "གནའ། གནས། གནོས། ལྟ་བུའམ་ཡང་ན། མནའ། མནས། མནོས།" ལྟ་བུ་གང་རུང་བེད་སྤྱོད་ཀྱི་འདུག་ལ། དེ་སྔ་ངས་ཀྱང་ལོ་ངོ་ལྔ་དྲུག་སྔོན་ནས འཐམ་འཐོམ་ངང་གོང་གི་འབྲི་ཚུལ་གཉིས་པ་ལྟར་ལན་ཤས་བེད་སྤྱད་ཡོད་མོད། འོན་ཏེ་ཕྱིས་སུ་བསམ་གཞིག་ཅིག་བྱེད་ཞོར། དེ་ནི་བྱ་ཚིག་ཅིག་ཡིན་པས་ན། "མནོས་"ཀྱི་མ་འོངས་པའི་བྱ་ཚིག་ལ་"མནའ་"ཞེས་བྲིས་པ་ཡིན་ན། "མནའ་"ནི་སྤྱིར་བཏང་དམ་བཅའི་དོན་ལ་གོ་བ་ཡིན་པ་དང་། དེ་བཞིན་"གནའ་"དང་"གནས་"སོགས་ཏེ། དེ་དག་འཁྲུལ་གཞིར་འགྱུར་ཉེན་ཆེ་བར་དོགས་ནས་འབྲི་བར་མ་ཕོད་ལ། མ་ཟད་འཐད་པོའང་དེ་ཙམ་མ་མཐོང་ནས། དེ་ལྟར་འབྲི་རྒྱུ་བོར་བཞག་པ་ཡིན། 

ཡིག་གཟུགས་ལ་གུས་ཚུལ།

ཆོས་ལུགས་དང་ནི་འབྲེལ་རུང་མ་འབྲེལ་རུང་།།

ཡིག་གཟུགས་རྣམས་ལ་གུས་པ་ལོས་དགོས་ཏེ།།

ཡིག་གཟུགས་ཇི་ཙམ་སྤྱོད་པ་དེ་ག་ཡིས།།

ཡིག་གཟུགས་ལ་ནི་མཐོང་ཆེན་སྤྲོད་པ་ཡིན།།