[སྨྲ།]
བོད་ཀྱི་ཡིག་སྐད་ཁྲོད་ཀྱི་"སྨྲ་"དང་འབྲེལ་བའི་དུས་གསུམ་གྱི་ལས་ཚིག་སྟེ། "སྨྲ་བྱ་སྨྲ་བྱེད་སྨྲས་སྨྲོས་ཤིག" ཅེས་པའི་ཚིག་འདི་དག་ལས་འཕྲོས་ཏེ་བཤད་ན། སྤྱིར་ནས་དེང་སང་དོལ་པོ་བ་མང་ཆེ་བས་ཡི་གེ་བྲི་དུས། "གནའ། གནས། གནོས། ལྟ་བུའམ་ཡང་ན། མནའ། མནས། མནོས།" ལྟ་བུ་གང་རུང་བེད་སྤྱོད་ཀྱི་འདུག་ལ། དེ་སྔ་ངས་ཀྱང་ལོ་ངོ་ལྔ་དྲུག་སྔོན་ནས འཐམ་འཐོམ་ངང་གོང་གི་འབྲི་ཚུལ་གཉིས་པ་ལྟར་ལན་ཤས་བེད་སྤྱད་ཡོད་མོད། འོན་ཏེ་ཕྱིས་སུ་བསམ་གཞིག་ཅིག་བྱེད་ཞོར། དེ་ནི་བྱ་ཚིག་ཅིག་ཡིན་པས་ན། "མནོས་"ཀྱི་མ་འོངས་པའི་བྱ་ཚིག་ལ་"མནའ་"ཞེས་བྲིས་པ་ཡིན་ན། "མནའ་"ནི་སྤྱིར་བཏང་དམ་བཅའི་དོན་ལ་གོ་བ་ཡིན་པ་དང་། དེ་བཞིན་"གནའ་"དང་"གནས་"སོགས་ཏེ། དེ་དག་འཁྲུལ་གཞིར་འགྱུར་ཉེན་ཆེ་བར་དོགས་ནས་འབྲི་བར་མ་ཕོད་ལ། མ་ཟད་འཐད་པོའང་དེ་ཙམ་མ་མཐོང་ནས། དེ་ལྟར་འབྲི་རྒྱུ་བོར་བཞག་པ་ཡིན།
དོན་དངོས་ལ་བསམ་གཞིག་བྱས་ན། ལ་དྭགས་དང་སྦལ་ཏི་བ་མ་གཏོགས་གཞན་ཧི་མཱ་ལ་ཡའི་བོད་མི་རིགས་ཀྱི་སྐད་རིགས་ཕལ་ཆེ་བར། "སྨྲ་"ཡི་སྒྲ་གདངས་ཇི་བཞིན་འཕྲལ་ནས་ཀློག་སྲོལ་མེད་པར་སྙམ་མོད་ཀྱང་། བལ་ཡུལ་གྱི་ཤར་པ་རྣམས་ཀྱིས་ཡི་གེ་ཀློག་དུས་དང་སྐད་ཆ་བཤད་དུས། "སྨྲ་བ་"ཞེས་འབོད་པའི་ཚབ་ཏུ་"སྨར་བ་"ཞེས་"སྨ་"ལ་"ར་"རྗེས་འཇུག་ཏུ་བྱས་ནས་མགོ་ཅན་"ས་"མ་གཏོགས་གཞན་འཕྲལ་ནས་ཀློག་པའི་བཟོ་འདྲ་ཡོད་པ་རེད།
དེ་བཞིན་དོལ་པོར་ཡི་གེ་ཀློག་པའི་ཚེ་ན་"སྨྲ་བ་"ཡི་སྒྲ་འདོན་ཚུལ་དབུས་སྐད་ལྟར་"སྨ་"ལ་"ར་"བཏགས་མི་མངོན་པའི་ཚུལ་དུ་ཀློག་གི་ཡོད་ཀྱང་། དུས་རྒྱུན་ཁ་སྐད་ཁྲོད་ཤར་པ་ནང་བཞིན་"སྨ་"ལ་"ར་"རྗེས་འཇུག་ཏུ་བྱས་ནས་"སྨར་བ་"ཞེས་གཙོ་བོ་བཀའ་བཀྱོན་ལྟ་བུའི་ཐ་སྙད་ལ་བེད་སྤྱོད་པ་ལས། སྐད་ཆ་བཤད་པ་ལྟ་བུའི་བྱ་ཚིག་ཏུ་བེད་སྤྱོད་ཀྱི་མེད་པ་རེད། དཔེར་ན། "ཁོང་གིས་ང་ལ་བཀའ་བཀྱོན་གནང་སོང་།" ཟེར་དུས། དོལ་པོ་ཚོས་"ཁོང་གིས་ང་ལེ་སྨར་བ་(སྨྲ་བ་)བཙལ་བྱུང་''ཞེས་ཟེར།
འོན་ཀྱང་གལ་ཏེ་བྱ་ཚིག་ཏུ་ཐ་སྙད་དེ་བེད་སྤྱོད་དགོས་ན། ཁམས་པ་འགས་ཡི་གེ་ཀློག་དུས་"སྨྲ་"ཡོད་ས་ལ་"སྣ་"ལྟ་བུའི་སྒྲ་ཡོང་བསྡད་པ་རྒྱུན་ལྡན་རེད་དེ། ཁོང་ཚོས་དུས་རྒྱུན་ཁ་སྐད་ཁྲོད་"སྨྲ་"ཡི་ཚབ་ཏུ་"སྣ་"བེད་སྤྱོད་ཀྱི་ཡོད་མེད་མི་ཤེས། དོལ་པོ་བས་ནི་དུས་རྒྱུན་ཁ་སྐད་ཁྲོད་དུ་"སྣ་"ལྟ་བུའི་སྒྲ་གདངས་འདོན་གྱི་ཡོད། རེད་དེ། དེ་ནི་ངས་བསམ་ན་"སྨྲ་"ནས་སྒྲ་ཉམས་པ་སོང་ཙང་། གལ་ཏེ་ཁ་སྐད་དེ་ཡི་གེར་ཕབ་དགོས་ན། "སྣྲ་"ཞེས་བྲིས་ན་ལེགས་ཤིང་། དེ་ལ་འཁྲུལ་གཞིར་གྱུར་པའི་བརྡ་གཞན་ནི་མེད་པ་རེད་ལ། མ་ཟད་སྣྲ་ཡིག་དེ་བོད་ཡིག་ཐོག་མེད་པ་ནི་གཏན་ནས་མ་རེད།
དེས་ན་དོལ་པོ་ཚོས་བྱ་ཚིག་དེ་དག་བེད་སྤྱོད་དུས། ང་ཁོ་ལེ་སྣྲ་རྒྱུ་ཡིན། ཁོ་སྣྲན་འདུག ཁྱོས་སྣྲས་བས། མགྱོགས་བོ་སྣྲོས་ལེ། ཞེས། ལས་ཚིག་མ་འོངས་པ་དང་ད་ལྟ་བར་"སྣྲ"། འདས་པར་"སྣྲས"། སྐུལ་ཚིག་ལ་"སྣྲོས་"བཅས་འབྲི་དགོས་པ་རེད། དེ་དག་ལས་ལས་ཚིག་ད་ལྟ་བ་བེད་སྤྱོད་སྟངས་ལ་བསམ་ན། ཁོ་སྣྲན་འདུག(ཁོ་བཤད་ཀྱི་འདུག) སྣྲ་བཀོད་པ་ར་གྱིན་འདུག(བཤད་པའི་ཁུལ་འདྲ་བྱེད་ཀྱི་འདུག) སྣྲ་འདི།(ཟེར་བ་འདི།) སྣྲ་ཞིག(ཟེར་བ་ཞིག) ཞེས་སོགས་ཡོད་པ་ལས། "ཁོ་སྣྲན་འདུག་"ཅེས་པའི་"སྣྲན་"དེ་ཇི་ལྟར་ཡིན་ཞེ་ན། ལས་ཚིག་ད་ལྟ་བ་"སྣྲ་"དང་། དེའི་ཚིག་གྲོགས་ལས་ཚིག་ད་ལྟ་བ་མཚོན་བྱེད་"བཞིན་"སྒྲའི་ཚབ་མཚོན་ཡི་གེ་"ན་"གཉིས་བསྡུས་ཏེ་སྦྱར་བས་"སྣྲན་"ཞེས་གྱུར་བ་ཡིན་པའི་སྐོར་དེ་སྔ་ཡང་གསལ་བཤད་ཞུས་ཟིན།
སྣྲ་སྣྲ་སྣྲས་སྣྲོས་བཅས་ཀྱི་བྱ་ཚིག་འདི་དག་རྩ་བའི་ལས་ཚིག་གཅིག་ཡིན་པས། སྤྱིར་བཏང་དོལ་པོ་བས་བཀོལ་ན་བཀོལ་མཉམ་བྱེད་དགོས་པ་ཡིན་ཀྱང་། དོལ་པོ་ནང་ཁོང་བའི་ཁ་རྒྱུན་ལ། དེའི་འདས་ཚིག་དང་སྐུལ་ཚིག་གཉིས་པོ་ལས་གཞན་ཁ་རྒྱུན་དུ་མེད་ཅིང་། རྟ་རབ་པ་རྣམས་ཀྱི་ཁ་རྒྱུན་ལ་བྱ་ཚིག་དེ་དག་བཞི་ཀ་བེད་སྤྱོད་ཀྱི་འདུག དཔེར་ན་ནང་ཁོང་བས་"སྣྲ་རྒྱུ་ཡིན། སྣྲན་འདུག" ཅེས་པའི་བྱ་བྱེད་ཀྱི་ལས་ཚིག་འདི་གཉིས་པོ་མི་བཀོལ་བར་རྒྱུན་དུ་ནས། "ཟེར་རྒྱུ་ཡིན། ཟིན་འདུག" གཉིས་པོ་བཀོལ་སྲོལ་ཤུགས་ཆེ་ཞིང་། འདས་ཚིག་ལ། "བཤད་དིན། བཤད་བྱུང་། སྣྲས་བིན། སྣྲས་བྱུང་།" ཞེས་དང་། སྐུལ་ཚིག་ལ། "ཤོད་ལེ། སྣྲོས་ལེ།" ཞེས་བཀོལ་བར་བྱེད། མདོར་ན་ལས་ཚིག་མ་འོངས་པ་དང་ད་ལྟ་བར་"ཟེར"། འདས་པ་ལ་"བཤད་དམ་སྣྲས"། སྐུལ་ཚིག་ལ་"ཤོད་དམ་སྣྲོས"། ཞེས་དོལ་པོ་ནང་ཁོང་བའི་ཁྲོད་སྨྲ་ཟེར་བཤད་གསུམ་ལས། སྨྲ་ཟེར་གཉིས་ཀྱི་དུས་གསུམ་སྐུལ་ཚིག་དང་བཅས་པའི་བྱ་ཚིག་ཆ་ཚང་བ་ཞིག་བཀོལ་གྱི་མི་འདུག་ལ། དེ་དག་གི་བྱ་ཚིག་ཕན་ཚུན་འཁྲུགས་ནས་བཀོལ་གྱི་འདུག
འདིར་ཆོབ་ཟེར་དགོས་སམ་ཡང་ན་གནས་ཚུལ་ངོ་ཐོག་ཟེར་དགོས་མིན་གང་ལྟར་ཡང་། ནང་ཁོང་བ་རྣམས་ཀྱི་དམངས་ཁྲོད་ཀྱི་གསང་བ་ཞིག་བརྟོལ་ན། སོ་སོས་ཐ་སྙད་དེ་དག་ཆ་ཚང་བ་ཞིག་མི་བཀོལ་ཞིང་ཕན་ཚུན་འཁྲུགས་ནས་བེད་སྤྱོད་བཞིན་དུ། ད་དུང་རྟ་རབ་པས་"སྣྲ་རྒྱུ་ཡིན། སྣྲ་དགོས་འདུག སྣྲན་འདུག་"ཅེས་སྣྲའི་བྱ་བྱེད་ཀྱི་ལས་ཚིག་རྣམས་བེད་སྤྱད་ཚུལ་ལ་མི་འཐད་སྣང་དང་ཕྱ་ལེ་རྒྱག་པའི་ལུགས་འདྲ་ཏོག་ཙམ་ཡོང་གི་འདུག་པ་ཁོ་བོ་ཆུང་དུས་ལོ་ངོ་དགུའམ་བཅུའི་སྐབས་ཀྱི་མཐོང་ཐོས་ཀྱི་ཉམས་མྱོང་ཞིག་ཡིན། ངོ་མ་ཆུང་དུས་ཀྱི་དྲན་པ་ཟེར་བ་རླབས་ཆེན་པོ་ཞིག་ཡིན་པ་འདི་དག་ལ་བརྟེན་ནས་ཧ་གོ་གི སྤྱིར་བཏང་འཇིག་རྟེན་དམངས་ཁྲོད་པས་སྐད་རིགས་ཀྱི་གནས་ཚད་དང་ལྗིད་གོག་ལེགས་པར་མི་ཤེས་ལ། ཇི་ལྟར་བེད་སྤྱོད་གཏོང་དགོས་མིན་སོགས་ལ་དོ་སྣང་གཏིང་ཟབ་མེད་ཁར། གནའ་བོའི་སྐད་ཆ་བཤད་སྲོལ་གྱི་རྒྱུན་རྣམས་བསྟུད་མར་སོ་སོས་གང་བདེ་བདེ་རུ་བེད་སྤྱོད་པ་ཙམ་རེད་པས་ན། འཇིག་རྟེན་པ་རྣམས་ལ་ཁག་ཁྱོན་ནས་མེད་པ་རེད།
[ཟེར།]
གང་ལྟར་ཡང་"སྣྲ་"ལ་སོགས་པ་དེ་དག་གི་རྩ་བའི་ལས་ཚིག་གཅིག་ཡིན་ལ། "ཟེར་"དང་"བཤད་"ལ་སོགས་པའི་ལས་ཚིག་ཀྱང་སྣྲ་དང་མ་འདྲེས་པར་སོ་སོར་ཡོད་པ་རེད། དཔེར་ན། མ་འོངས་པ་དང་ད་ལྟ་བར་"ཟེར"། འདས་པར་"ཟིག" ཅེས་ཡིན་ཞིང་དེ་ལ་སྐུལ་ཚིག་མེད། ལས་ཚིག་ད་ལྟ་བར་མཚམས་རེ་"ཟིན་འདུག་"ཅེས་"ཟིན་"འབོད་ཀྱི་ཡོད། དེ་ཡང་ལས་ཚིག་ད་ལྟ་བ་"ཟེར་"དང་། དེའི་ཚིག་གྲོགས་ལས་ཚིག་ད་ལྟ་བ་མཚོན་བྱེད་"བཞིན་"སྒྲའི་ཚབ་མཚོན་ཡི་གེ་"ན་"གཉིས་བསྡུས་ཏེ་སྦྱར་བས་"ཟིན་"ཞེས་གྱུར་བ་ཡིན།
[བཤད།]
དེ་བཞིན་"བཤད་"ཀྱི་རྩ་བའི་ལས་ཚིག་ཀྱང་སོ་སོ་ནས་ཡོད་པ་ཡིན་པས། དཔེར་ན། "བཤད་རྒྱུ་ཡིན། ཤོད་ཀྱིག བཤད་བྱུང་། ཤོད་ལེ།" ཞེས་པ་འདི་དག་ཡིན། ལས་ཚིག་འདི་དག་ཡིན་ན་ནི་ནང་ཁོང་བའི་ཁྲོད་ཆ་ཚང་བ་ཞིག་བེད་སྤྱོད་ཀྱི་ཡོད་པ་རེད། དེ་དག་ལས་"ཤོད་ཀྱིག་"ཅེས་པ་ནི། "ཤོད་ཀྱི་འདུག་"ཅེས་པའི་ཚིག་སྡུད་རྒྱབ་པ་ཡིན།
ལགས་སོ། མདོར་ན་འདི་དག་གིས་¹དོལ་སྐད་ཁྲོད་དུ་བོད་མིའི་ལེགས་པར་སྦྱར་བའི་སྐད་ཀྱི་མིང་བརྡ་"སྨྲ་ཟེར་བཤད་"གསུམ་དང་འབྲེལ་བའི་ཐ་སྙད་བཀོལ་སྤྱོད་བྱེད་ཚུལ་དང་། ²ཐ་སྙད་དེ་དག་ཇི་བཞིན་འཐུས་ཚང་བེད་མི་སྤྱོད་པའི་སྐྱོན་རིགས་གསལ་འདོན། ³རྩ་བའི་བྱ་ཚིག་གང་གི་དུས་གསུམ་སྐུལ་ཚིག་དང་བཅས་པའི་ལས་ཚིག་བཞི་པོ་ཇི་ལྟར་ཡིན་མིན་བཅས་ཀྱི་སྐོར་ལ། གསལ་བཤད་ཞིབ་ཚགས་ཞུས་ཡོད། རང་ཉིད་ལ་སྡེབ་ལེགས་སྙན་པའི་ཚིག་སྦྱོར་གྱི་སྒྱུ་རྩལ་མེད་ནའང་། གང་བྲིས་པ་དག་ཐམས་ཅད་ཀྱིས་མགོ་ཚུགས་པའི་རེ་བ་དང་བཅས་འདིར་མཚམས་འཇོག་ཞུ། ཐུགས་རྗེ་ཆེ། དོལ་སྐད་རྒྱལ་ལོ།། ༢༠༢༠/༡༠/༣༠
No comments:
Post a Comment