འཛམ་གླིང་མགོན་པོར་བསྟོད་པ།

རྒྱལ་བའི་རྒྱལ་ཚབ་སེམས་དཔའ་ཆེན་པོ་ཁྱེད།།

རིགས་གསུམ་མགོན་པོའི་མཁྱེན་བརྩེ་ནུས་གསུམ་གྱི།།

དཔལ་ལ་གཅིག་ཏུ་མངའ་དབང་འབྱོར་བར་མཛད།།

གོ་ལ་ཧྲིལ་པོའི་མངའ་བདག་ཁྱེད་ལ་གུས།།

སེམས་བསྐྱེད་སྐོར་ལན་དུ་ཕུལ་བ།

༈ དཔལ་ལྡན་བླ་མ་དམ་པར་ཕྱག་འཚལ་ལོ།།

སེམས་བསྐྱེད་སྐོར་གྱི་དྲིས་ལན་ཅུང་ཞིག་འབུལ།།

གཞན་དོན་དུ་རྫོགས་བྱང་འཐོབ་འདོད་ཀྱི་བློ་སེམས་བསྐྱེད་ཀྱི་མཚན་ཉིད། ཟུར་གསུམ་སྟེ། གཞན་དོན་དུ་ཞེས་པས་རང་དོན་ཞི་བ་ཡིད་བྱེད་གཅོད། རྫོགས་བྱང་འཐོབ་འདོད་ཀྱི་བློ་ཞེས་པས་དངོས་སུ་དོན་དམ་སེམས་བསྐྱེད་གཅོད་ཅིང་། ཤུགས་ལ་འདོད་པའི་བློ་ཞེས་པས་སེམས་སེམས་འབྱུང་རྐྱང་པ་རེ་ལ་སེམས་བསྐྱེད་དུ་འདོད་པ་གཅོད་པ་སྟེ། འདོད་པ་ཞེས་པས་སེམས་བྱུང་འདུན་པ་བསྟན་པ་དང་། བློ་ཞེས་པས་གཙོ་སེམས་བསྟན་པ་ཡིན་པས། དེ་གཉིས་མཚུངས་པ་ལྔ་མཚུངས་ཀྱིས་འབྲལ་མི་ཤེས་པར་གནས་པའོ། །འདུན་པ་ནི་གཉིས་ཏེ། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་དང་། དོན་དུ་གཉེར་བྱ་རྣམ་མཁྱེན་འཐོབ་པའི་དོན་དུ་འདུན་པའོ། །དེ་ལྟར་འདུན་པ་དང་མི་འབྲལ་བའི་སེམས་བསྐྱེད་དགོས་སོ།།

ཡུལ་སྐད་ཡིག་ཐོག་ཏུ་འབྲི་རུང་མིན་སོགས་ལས་འཕྲོས་པའི་ལན་དུ་བྲིས་པ།

༈ སྤྱིར་ཡུལ་སྐད་ཡིག་ཐོག་ཏུ་འབེབས་རྒྱུ་ནི། སྤྱི་སྐད་དམར་གསོད་གཏོང་བའི་རྒྱུ་རྐྱེན་དུ་འགྲོ་བར། སྔོན་བྱོན་མཁས་པ་མང་པོས་གསུངས་པ། ད་ལྟའི་མཁས་པ་ཚོས་ཀྱང་དེ་ལ་རྩི་བཀུར་ཞུ་བཞིན་པ་རེད། འོན་ཀྱང་རང་རེའི་ཡུལ་སྐད་ངེས་པར་དུ་ཡི་གེར་འགོད་དགོས་ན། སྔར་ཡོད་ཟིན་པའི་ཐ་སྙད་ལ་ང་ཚོས་རང་རང་གི་ཁ་ནས་གང་འཐོན་ལྟར་བསྒྱུར་ན་མི་རིགས་ཤིང་། སྒྲ་གདངས་ཀྱི་ཁྱད་པར་ཅུང་ཟད་རེའི་དབང་གིས་བཅོས་དགོས་ན། དཔེར་ན། སྔོན་གྱི་ཡིག་ཆ་རྣམས་སུ་"ཨ་ཇོ་"འབྲི་བ་དེ་ཁྱབ་ཆེ་བ་རེད་མོད། "ཨ་ཇོ་"དང་"ཨ་ཅོ་"གང་ལྟར་བྲིས་ནའང་ཁྱད་པར་མེད།