དོལ་པོའི་སྐད་དུ། སྐྲ་དང་སྨྱུག་མ་སོགས་བསླ་བྱ་སླ་བྱེད་བསླས་སློས་ཞེས་པ་དང་ཚིག་གཅིག་པར། མ་ཎི་བསླ་བྱ་སློ་བྱེད་བསླས་སློས་ཞེས་བེད་སྤྱོད་པར་སྙམ། དཔེར་ན། མ་ཎི་བསླ་རྒྱུ་ཡིན། མ་ཎི་སློ(་བཞི)ན་འོད། བསླས་ཚར་རིན། སློས་ལེད། ཟེར་བ་ལྟ་བུར་རོ།།
དཔེར་ན། གཤམ་གྱི་པར་དེར་གཟིགས་དང་། བོད་རྒྱ་ཚིག་མཛོད་ཆེན་མོར་"སློས་"ནི་"ཟློས་"ཀྱི་བརྡ་རྙིང་ཡིན་པར་བཤད་འདུག ཡིན་ནའང་འགྲེལ་བརྗོད་ཁ་གསལ་མི་འདུག
སྤྱིར་བཏང་རྒྱལ་སྤྱིའི་འགྲོ་ལུགས་ལྟར་ན། ཡུལ་སྐད་གང་ཞིག་ཡི་གེར་ཕབ་འདོད་ནའང་། ཁ་ནས་གང་བརྗོད་པ་ལྟར་ཡི་གེར་ཕབ་དགོས་སྲོལ་ཞིག་ཡོད་པ་དང་། གཞི་ནས་ཡུལ་དེར་སྐད་ཡིག་དེ་གཉིས་ཀ་མཉམ་སྤྱོད་བྱེད་ཆོག་པའི་འགྲོ་ལུགས་ཡོད་པར་བཤད། འོན་ཀྱང་བོད་རིགས་རྣམས་ལ་ཡུལ་ལུང་སོ་སོའི་ཁ་སྐད་དེ་ཡི་གེར་ཕབ་སྲོལ་གནའ་ནས་དེ་ཙམ་མ་བྱུང་ལ། དེང་སང་དེའི་ཐད་ཏོག་ཙམ་དོ་སྣང་བྱེད་བཞིན་པའི་སྒང་རེད་མོད། འུ་ཚོའི་ཁ་སྐད་དག་ནི་ངས་བྱས་ན། ཁ་ནས་གང་ཐོན་ཡི་གེར་ཕབ་ནའང་མི་འགྲིག་ལ། ཡང་བརྡ་དག་དང་བསྟུན་དགོས་ཞེས་ཁ་ནས་གང་འབོད་པ་ལྟར་ཡིག་ཐོག་ཏུ་དེ་དང་ཚིག་ཇི་བཞིན་མི་འདྲ་བ་ཞིག་ཕབ་ནའང་མི་འགྲིག་པ་ཡིན། ཁ་ནས་གང་ཐོན་པའི་ཚིག་དེ་དང་བརྡ་དག་གི་འགྲོས་དེ་དག་ཕན་ཚུན་ལྟོས་བྱ་ལྟོས་བྱེད་ཀྱི་སྒོ་ནས་གཤིབ་བསྡུར་གྱིས་གང་ཞིག་འཐད་པ་དེ་ཡིག་ཐོག་ཏུ་འབེབས་དགོས་པ་ཡིན།
དཔེར་ན། དོལ་པོ་ཀུན་གྱིས་གསུང་རབ་བསྟན་བཅོས་སོགས་ཀློག་དུས་"ཟློས་"ལ་"ཟློས་"རང་ཟེར་གྱི་ཡོད་ཀྱང་། དོལ་ཡུལ་བྱེ་བྲག་སོ་སོའི་ཁ་སྐད་བེད་སྤྱོད་དུས། ནང་གོང་ཕྱོགས་ནས་"སློས་"ཟེར་གྱི་ཡོད་པས། གསུང་རབ་ཀྱི་སྐད་དང་ཡུལ་ལུང་བྱེ་བྲག་པའི་སྐད་གང་ལྟར་ནའང་ཡི་གེ་བྲི་དུས་ཁ་ནས་གང་ཐོན་པ་དེ་དང་སྒྲ་ཉེ་སས་ཡོད་དགོས། དོལ་པོ་ལྟེང་གཤོངས་ཕྱོགས་ནས་"འཛོས་"ཟེར་བ་ལྟ་བུར་ཡོང་གི་ཡོད་ཀྱང་། དེ་ཡིག་ཐོག་ཏུ་ཇི་ལྟར་འབེབས་དགོས་མིན་མི་ཤེས། ལ་དྭགས་ཚོའི་ཁ་སྐད་དུ་"ཟླ་བ་"ལ་"ཙ་བ་"འདྲ་ཟེར་གྱི་འདུག་ཀྱང་ཡིག་ཐོག་ཏུ་ནི་"ཟླ་བ་"རང་འབྲི་བཞིན་འདུག དེ་ཡང་བདེན་པ་ཡིན་མིན་གང་ཤེས་ཏེ། ངས་ཧ་གོ་གསལ་ལ་ལ་དྭགས་པའི་སྐད་དེ་ཡིག་ཐོག་ཕབ་རྒྱུའི་འཆར་གཞི་སྔ་མོ་ནས་ཡོད་ཀྱང་ཕན་ཚུན་གྲོས་མཐུན་མ་བྱུང་བའི་རྐྱེན་གྱིས་ལྷག་ཡོད་རེད་ཟེར། འབྲུག་སྐད་ནི་ཡིག་ཐོག་ཏུ་ཡོད་པ་མ་ཟད་འབྲུག་གཞུང་གིས་བཀོལ་སྤྱོད་བྱེད་བཞིན་པའི་སྐོར་ཚང་མས་ཤེས་གསལ་རེད།
དེས་ན་ང་ཚོར་ཆོས་སྐད་ཟེར་བ་ཞིག་དང་ཡུལ་སྐད་ཟེར་བ་གཉིས་ཡོད་པ་ཡིན་ཙང་། ཆོས་སྐད་ནི་ཆོས་སྐད་རང་ས་ནས་བྲི་དགོས་ལ། དེ་བཞིན་ཡུལ་སྐད་ཀྱང་ཡུལ་སྐད་རང་ས་ནས་བྲི་དགོས་པས། ཆོས་སྐད་ཀྱི་ཡི་གེ་འབྲི་དུས་ཡུལ་སྐད་བྱེ་བྲག་པའི་ཐ་སྙད་བེད་སྤྱོད་པ་དང་། ཡུལ་སྐད་འབྲི་དུས་ཡུལ་སྐད་དེའི་ཐུན་མིན་ཐ་སྙད་ཡོད་བཞིན་ཆོས་ཚིག་བེད་སྤྱོད་པ་དེ་དག་ནོར་བ་རེད་ལ། དེ་བཞིན་བོད་རིགས་ཡོངས་ཀྱི་རང་བཞིན་གྱི་སྐད་དེ། དབུས་གཙང་གི་ལྷ་སའི་སྐད་དེ་དམངས་ཕལ་པ་ནས་བཟུང་དབུ་རྒྱལ་པོ་དང་བླ་མའི་བར་གྱི་བོད་རིགས་ཡོངས་ཀྱི་སྤྱི་སྐད་ཡིན་པས། དེ་ཡིག་ཐོག་ཏུ་འབེབས་དུས་ཀྱང་ཡུལ་སྐད་གཞན་རྣམས་བསྲེས་པར་མི་བྱ་བ་དེ་དག་གི་སྐོར་གལ་ཆེན་ཞིག་རེད།
No comments:
Post a Comment