རཏྣ་ཤྲཱི་རིན་པོ་ཆེ།
སྔོན་མའི་གནས་སྐབས་ཀྱི་རྒྱ་གར་རྒྱལ་ཁམས་ཆེན་པོ་རུ། བྲམ་ཟེའི་རིགས་བརྒྱུད་དང་། དགེ་སྦྱོང་གི་རིགས་བརྒྱུད་སོགས་ཡོད་པ་ཡིན་ཅིང་། བྲམ་ཟེའི་རིགས་བརྒྱུད་རྣམས་ནི་སྤྱི་ལོའི་སྔོན་གྱི་ལོ་ངོ་ ༢༠༠༠ དེ་བར་རྒྱལ་ཁམས་གཞན་ནས་རྒྱ་གར་སིནྡྷུའི་ཆུ་བོ་བརྒྱུད་གནས་མཆོག་མ་གྷ་དྷ་རུ་རིམ་བཞིན་འཛུལ་བ་ཞིག་ཡིན་པ་དང་། དེ་དུས་ཁོང་ཚོས་འཁྱེར་ཡོང་བའི་ཆོས་ནི་རྀག་ཝེད་དེ་རིག་བྱེད་བཞིའི་ནང་གསེས་ངེས་བརྗོད་ཀྱི་རིག་བྱེད་དེ་ཡིན། དེའི་ཚེ་ན་ཁོང་ཚོའི་རིག་བྱེད་ཀྱི་ཡན་ལག་ཡོངས་སུ་གྲུབ་མེད་ལ། ཕྱིས་སུ་རིམ་གྱིས་རིག་བྱེད་གཞན་རྣམས་ཀྱང་ཆ་ཚང་བར་གྲུབ། རིག་བྱེད་དེའི་རིང་ལུགས་པ་ནི་དེང་སང་ཇཻན་དུ་གྲགས་པའི་གཅེར་བུ་པ་དག་གི་ཆོས་ཡིན་པ་དང་། གཅེར་བུ་པ་དེ་དག་དང་རིག་བྱེད་བསྟན་བཅོས་ནང་གི་སྐད་རྣམས་ནི་ཧ་ཅང་མཐུན་པོ་ཡོད་པ་རེད། ཡིན་ནའང་ཕྱིས་ཕྱིས་ཀྱི་རིག་བྱེད་བསྟན་བཅོས་རྣམས་ནི་གནའ་བོའི་རིག་བྱེད་ཀྱི་སྐད་ལས་ཅུང་ལོགས་སུ་གྱུར་ཡོད་པ་མ་ཟད། རིག་བྱེད་བཞི་པོ་ཐམས་ཅད་རྒྱ་གར་ལེགས་སྦྱར་གྱི་སྐད་དུ་བྲིས་ཡོད་པ་མ་ཡིན་པར་ཚནྡ་ཞེས་པའི་སྐད་ཡིག་ཏུ་བྲིས་ཡོད་པ་རེད། སངས་རྒྱས་བཅོམ་ལྡན་འདས་ཀྱི་དུས་སུའང་དེ་ལ་ཚནྡ་ཞེས་གྲགས་ཏེ། པཱ་ལི། སཾསྐྲྀཏ། པྲ་ཀྲི་ཏ། པཻ་ཤཱ་ཙི་ལ་སོགས་པའི་སྐད་དུ་གསུངས་པའི་སངས་རྒྱས་ཀྱི་བཀའ་རྣམས་སུ། རིག་བྱེད་ཀྱི་སྐད་ལ་ཚནྡ་ཞེས་གསུངས་ཡོད། ལེགས་སྦྱར་རམ་སཾསྐྲྀཏ་སྐད་ནི་དེའི་ཕྱིས་སུ་བྱུང་བ་ཡིན་པ་དང་། ལེགས་སྦྱར་གྱི་བརྡ་སྤྲོད་ཀྱི་འགྲོས་རྣམས་རིག་བྱེད་ཀྱི་ཚནྡའི་སྐད་ཡིག་གི་བརྡ་སྤྲོད་ལས་གཞན་དུ་ཡོད་པ་རེད། མདོ་དོན་བྲམ་ཟེའི་མི་རིགས་རྣམས་རྒྱལ་ཁམས་གཞན་ནས་རྒྱ་གར་དུ་འཛུལ་ཞུགས་བྱས་པ་རེད་ལ། ཤྲ་མཱ་ཎ་སྟེ་དགེ་སྦྱོང་མགོ་རེག་གི་རིང་ལུགས་ནི་སྔ་མོ་ནས་ཡོད་པ་རེད།
སྟོན་པ་བཅོམ་ལྡན་སྐབས་ནས་བྲམ་ཟེ་དང་དགེ་སྦྱོང་གཉིས་ཀའི་ལམ་ལུགས་ཡོད་ཡོད་པ་རེད་ལ། བྲམ་ཟེའི་རིང་ལུགས་པ་ཞེས་པ་རླུང་དང་མེའི་མཆོད་སྦྱིན་བྱས་ཏེ་རང་རང་གི་ལྷ་རྣམས་དགའ་བར་བྱས་ཤིང་དེ་ལྟར་དོན་དུ་གཉེར་མཁན་ལ་ཟེར་ཞིང་། དེ་ལ་ནང་གསེས་རིང་ལུགས་ཧ་ཅང་མང་པོ་ཡོད་པ་ཡིན། དགེ་སྦྱོང་གི་རིང་ལུགས་ཞེས་པ་ནི་ཚེ་འདི་གང་ཡིན་པ་དང་། སྔ་མ་གང་ནས་བྱུང་བ་དང་། ཚེ་འདི་ཙམ་ཡིན་ནམ་ལ་སོགས་པའི་གནད་དོན་བཙལ་ནས་དེའི་ཐོག་སྒོམ་པས་ཉམས་སུ་ལེན་མཁན་ཞིག་ཡིན་པ་རེད། རིང་ལུགས་འདི་ནི་རིག་བྱེད་བྱུང་ནས་ལོ་ངོ་གཅིག་སྟོང་ཙམ་གྱི་རྗེས་སུ་བྱུང་ཡོད་ཤག་ཡིན། བྲམ་ཟེའི་རིགས་ཅན་རྣམས་རྒྱ་གར་དུ་འཛུལ་ཞོར་ཨརྱན་མི་རིགས་དང་འདྲེས་རིམ་བཞིན་ཕྱིས་སུ་རིགས་དེ་གཉིས་ཀའི་ཁྲོད་ནས་དགེ་སྦྱོང་གི་རིང་ལུགས་པ་ཆགས་མཁན་ཡང་ཡོད་པ་རེད། དེ་ཡི་རྗེས་རིག་བྱེད་བཞི་ལས་འཕྲོས་ཏེ་ཨུ་པ་ནི་ཥཏ་ཅེས་པའི་ཆོས་ལུགས་གསར་པ་ཞིག་ཀྱང་ཕྱིས་སུ་བྱུང་བ་རེད།
རི་དང་ནགས་ཚལ་ལ་འགྲོ་བ་དང་སྒོམ་རྒྱག་པ་སོགས་ནི་དགེ་སྦྱོང་རིང་ལུགས་ཏེ་ནང་ཆོས་ཀྱི་ལུགས་སྲོལ་ཡིན་པ་དང་། ཞིབ་པར་བལྟས་ན་ལྷ་ཆེན་དབང་ཕྱུག་དང་ཁྱབ་འཇུག་སོགས་ནི་དགེ་སྦྱོང་རིང་ལུགས་ཀྱི་ལྷ་རྣམས་རེད། བར་སྐབས་ཤིག་ཏུ་བྲམ་ཟེ་དང་ནང་པའི་བར་རྩོད་ཉོག་རབ་དང་རིམ་པ་བྱུང་བའི་དུས་སྐབས་ཏེ། རིག་བྱེད་ནང་གསལ་བ་ལྟར་དེའི་རིང་ལུགས་པ་རྣམས་ནི་ལྷ་ལ་གཙོ་བོར་འཛིན་ཞིང་། མིའི་རིགས་ནང་གསེས་དབྱེན་འབྱེད་བྱེད་པ་ལ་སོགས་པ་བྱུང་རིམ་བཞིན། རིག་བྱེད་པ་དག་གིས་གཙོས་གཞན་རྣམས་ཀྱང་རིམ་བཞིན་ལྷ་ཆེན་དབང་ཕྱུག་སོགས་ལ་དགའ་དད་ཆེ་རུ་འགྲོ་དུས། རིག་བྱེད་པ་དང་ནང་པ་རྣམས་ལྷ་ཆེན་དབང་ཕྱུག་ལ་སོགས་ལྷར་འཛིན་པ་ལ་གཅིག་གྱུར་ཆགས་ཡོད།
མནའ་སྔ་མོའི་ལོ་རྒྱུས་ལ་བལྟས་ན། སྟོན་པ་བཅོམ་ལྡན་འདས་ནི་བྲམ་ཟེའི་རིགས་བརྒྱུད་མ་རེད་ལ། འོ་ན་གང་ཞེ་ན་མི་རིགས་འདྲེས་མའི་རིགས་ཅན་ཞིག་རེད། མ་ཟད་དེ་དག་ཐམས་ཅད་དགེ་སྦྱོང་རིང་ལུགས་ཀྱི་ཁྱིམ་རྒྱུད་པ་རེད། གཞན་ཡང་སངས་རྒྱས་ཤཱཀྱ་ཐུབ་པས་ཁྱིམ་ནས་རབ་ཏུ་བྱུང་བའི་སྐབས་ཐད་ཀར་སུའི་ལུགས་ཀྱི་བླ་མའི་དྲུང་དུ་བཅར་བ་རེད་དམ་ཟེར་ན། ནང་པའི་བླ་མའི་དྲུང་དུ་ཕྱིན་པ་རང་རེད། རྣམ་པ་ལ་བྲམ་ཟེ་ལྟ་བུ་ཡོད་ཀྱང་དོན་དངོས་ལ་དགེ་སྦྱོང་རིང་ལུགས་པ་རེད། སངས་རྒྱས་ཀྱིས་དགེ་སྦྱོང་རིང་ལུགས་པའི་བླ་མ་རང་བཙལ་ཞིང་དེའི་དྲུང་དུ་ཕེབས་ནས་སྦྱངས་པ་དང་། ཁོང་གི་བླ་མ་དེ་རིང་འཕུར་དང་ལྷག་སྤྱོད་གཉིས་ཏེ་ཚངས་པ་ཆེན་པོའི་སློབ་མ་ཡིན་ཞིང་། རྣམ་པ་ལ་བྲམ་ཟེ་ཡིན་ནའང་དོན་ལ་དགེ་སྦྱོང་བ་རེད། སངས་རྒྱས་ཁོང་ཅིའི་ཕྱིར་བླ་མ་དེ་དག་གི་དྲུང་དུ་ཕྱིན་པ་རེད་དམ་ཟེར་ན། དེ་དག་ནི་དགེ་སྦྱོང་བའི་རིགས་བརྒྱུད་པ་དང་རིང་ལུགས་པ་ཡིན་པས་རེད། སྐབས་དེ་དུས་མི་རྣམས་ཀྱིས་སྤྱིར་བཏང་བྲམ་ཟེ་དང་དགེ་སྦྱོང་བ་གཉིས་ཀ་ལ་གོང་བཀུར་ཞུ་གི་ཡོད་པ་རེད་ལ། སངས་རྒྱས་ཉིད་ཀྱིས་གསུངས་པའི་པཱ་ལིའི་གསུང་རབ་རྣམས་གཙོས་པའི་སྡེ་སྣོད་རྣམས་སུ་ཡང་དེའི་སྐོར་ཡོང་བསྡད་ཀྱི་ཡོད་པ་རེད། སངས་རྒྱས་ཤཱཀྱ་ཐུབ་པའི་ཡར་སྔོན་ནས་དགེ་སྦྱོང་བའི་རིགས་བརྒྱུད་ཧ་ཅང་མང་པོ་ཡོད་ལ། འདས་མ་ད་གསུམ་གྱི་སངས་རྒྱས་ཐམས་ཅད་ཀྱང་དགེ་སྦྱོང་བའི་རིགས་བརྒྱུད་ལས་བྲམ་ཟེ་དང་ཨརྱན་སོགས་སུ་མི་འཁྲུངས་པ་འདི་ནི་ཐུན་མིན་གྱི་འགྲོ་སྟངས་ཤིག་རེད། (འདིའི་བར་མཚམས་སུ། ཁོང་གིས་རིག་བྱེད་དང་སངས་རྒྱས་གསུང་རབ་སོགས་ལས་ལེགས་སྦྱར་སྐད་ཐོག་གི་ལུང་ཁུངས་དུ་མ་བགྲངས་ཏེ་འགྲེལ་བཤད་གནང་ཡང་། བདག་ལ་དེ་དག་གོ་ཐུབ་པའི་རྣམ་དཔྱོད་བྲལ་བས་འགོད་མ་ཐུབ།)
དེས་ན་གནས་ཚུལ་འདི་དག་ལ་ལྟོས་ནས་ནང་ཆོས་ནི་རིག་བྱེད་སོགས་ལས་བྱུང་བ་མ་ཡིན་པར་དཔོག་ཐུབ། བྲམ་ཟེ་དང་དེའི་རིག་བྱེད་ནི་སྔ་མོ་ནས་བྱུང་ཞིང་ནང་ཆོས་དེའི་ཕྱིས་སུ་བྱུང་བ་ཡིན་ཀྱང་། དེ་དག་ཕན་ཚུན་བར་འབྲེལ་བ་མེད་པས་ན། ནང་ཆོས་དང་ཧིན་དུའི་ཆོས་རྣམས་དེ་བས་མཐུན་ཐབས་མེད་རེད། ལོ་རྒྱུས་གཞིར་བཞག་བྱས་དུས་བྲམ་ཟེའི་ཆོས་ལུགས་སྔོན་དུ་བྱུང་བ་ཡིན་ཀྱང་སངས་རྒྱས་ཤཱཀྱ་ཐུབ་པ་ནི་དེའི་རིགས་བརྒྱུད་པ་མ་ཡིན་པས། ཁོང་གིས་ཐོག་མཐའ་བར་གསུམ་དུ་དགེ་སྦྱོང་གི་ལམ་རང་བསྟེན་ཏེ་གོ་འཕང་བརྙེས་པ་རེད། ཧིན་དུའི་ཆོས་ནི་གནའ་བོའི་བྲམ་ཟེ་རྣམས་ཀྱི་རིག་བྱེད་ཀྱི་ཆོས་དེ་ཡར་རྒྱས་སུ་ཕྱིན་པའི་རྣམ་པ་ཞིག་སྟེ། ནང་པ་དང་ཇཻན་ལ་སོགས་པའི་ཆོས་ལུགས་སྣ་མང་གི་དོད་པོ་ཞིག་རེད། དེས་ན་ཧིན་དུའི་ཆོས་ལས་ནང་པ་བྱུང་བ་རེད་སོགས་བཤད་པ་ནི་ལྐུགས་པའི་སྐད་ཆ་ཡིན་ལ། གལ་ཏེ་གནའ་བོའི་རིག་བྱེད་དག་ལས་ནང་པ་བྱུང་བ་རེད་ཟེར་ན་ཚིག་ཙམ་དུ་བཤད་ན་འགྲིག་མོད། རྒྱུ་མཚན་ནི་གནའ་བོའི་རིག་བྱེད་དག་ནང་པ་ལས་ཀྱང་ལོ་ངོ་དུ་མའི་སྔོན་དུ་བྱུང་བ་ཞིག་རེད། འོན་ཀྱང་གཤིབ་སྡུར་བྱས་ན་འདྲ་ས་སྣེ་རེ་ཙམ་ལས་མི་འདྲ་ས་མང་པོ་ཡོད།
སྭཱ་མི་ཝི་ཝེཀ་ཨ་ནནྡ་(༡༨༦༣-༡༩༠༢ ཧིན་དུའི་ཆོས་པ།)ཞུ་བ་ཞིག་གིས། “སངས་རྒྱས་ཀྱིས་གང་གསུངས་པའི་དོན་ནི་ངས་ཤེས་ཀྱང་། ཁོང་གི་སློབ་མ་རྣམས་ཀྱིས་ནི་ཤེས་མི་འདུག’’ ཅེས་ཟེར་བཞིན། ཁོང་གིས་གང་ཤེས་པ་དེ་ནི། “ནང་ཆོས་ནི་ཧིན་དུའི་ཆོས་ལས་བྱུང་བ་རེད།’’ ཟེར་བའི་སྐད་ཆ་དེ་རེད། འོན་ཀྱང་ཁོང་ནི་སངས་རྒྱས་ཀྱིས་གསུང་ལ་ཐོས་བསམ་ཁྱོན་ནས་བྱེད་མ་མྱོང་མཁན་ཞིག་ཡིན་པ་རེད་ལ། གོང་དུ་ཁོང་གིས་གསུངས་པ་དེ་དག་རྒྱུ་མཚན་གང་ཞིག་ལ་བརྟེན་ནས་གསུངས་པ་ཡིན་རུང་ཆ་འཇོག་བྱེད་རུང་བ་ཞིག་མ་རེད།
སངས་རྒྱས་ཀྱིས་གསུངས་པའི་ཡོན་ཏན་རྣམས་རང་རྒྱུད་ལ་འབད་མེད་ལྷུན་འགྲུབ་ཏུ་སྐྱེས་ཡོང་གི་མེད་པ་རེད། སངས་རྒྱས་ཉིད་ཀྱིས་འདི་ལྟར་གསུངས་ཡོད་དེ། ངས་ནི་ཁྱེད་ཅག་ལ་གཏན་བདེའི་གོ་འཕང་མཆོག་ལ་རེག་ཕྱིར་ཚོགས་སྦྱོར་མཐོང་སྒོམ་གྱི་ལམ་བཞིར་བསྟན་ཟིན་པས། དཀའ་སྤྱད་འབད་འབུངས་དྲག་པོས་བརྩོན་ནས་ལམ་དེ་དག་མཐར་ཕྱིན་པ་གྱིས་ཤིག ཅེས་གསུངས་ཡོད། གལ་ཏེ་སངས་རྒྱས་ཀྱིས་རིག་བྱེད་ལ་ཁུངས་གཏུགས་ནས་ནང་ཆོས་གསུངས་པ་ཡིན་ན། ད་བར་ཧིན་དུའི་བཀའ་བསྟན་གང་དུའང་སངས་རྒྱས་ཤཱཀྱ་ཐུབ་པར་བརྩི་འཇོག་བྱས་མེད། རཱ་མཱ་ཡན་དང་མ་ཧཱ་བྷཱ་རཏ་སོགས་སུ་སངས་རྒྱས་ལ་བསྟོད་བསྔགས་ཅུང་ཟད་རེ་བརྗོད་ཡོད་ཀྱང་། དེ་དག་ནི་སངས་རྒྱས་བྱུང་ནས་ཀྱང་ཧ་ཅང་ལོ་མང་རྗེས་སུ་བཟོས་པའི་ལོ་རྒྱུས་ཁྱོག་བཤད་ཅན་ཞིག་རེད། དེས་ན་ནང་ཆོས་ནི་ཧིན་དུ་ལས་བྱུང་བ་མ་རེད་ལ། ཧིན་དུ་ཞེས་པའི་ཚིག་ཁོ་རང་ཕྱིས་སུ་བྱུང་བ་མ་ཟད། དེའི་ཆོས་ཡང་ཕྱིས་ཕྱིས་སུ་བྱུང་བ་རེད། རྒྱུ་མཚན་དེ་བས་ན་ནང་པ་ནི་ཧིན་དུ་ལས་བྱུང་ཐབས་གཏན་ནས་མེད་པ་ཡིན།
ཞེས་རཏྣ་ཤྲཱི་རིན་པོ་ཆེས་སྤྱི་ལོ་ ༢༠༢༠ ཟླ་བ་ ༡༠ ཚེས་ ༡༦ ཉིན་ཁྱེད་བརྙན་བརྒྱུད་ནས་གསུངས་པའི་གསུང་ཆོས་ཚན་པ་ ༧༠ པ་ལས་བཏུས་བསྒྱུར་བྱས། ༢༠༢༠།༠༢།༡༣ ལོ་སར་ཚེས་པ་དང་པོའི་མཚན་མོར་ཁོང་གི་གསུང་བཤད་ཉན་ཞོར་ཡི་གེར་ཕབ།
རཏྣ་རིན་པོ་ཆེའི་ངོ་སྤྲོད་མདོར་བསྡུས།
༈ རཏྣ་རིན་པོ་ཆེ་ཁོང་ནི་བྲམ་ཟེའི་རིགས་བརྒྱུད་ཡིན་པ་དང་། ཆུང་དུས་ནས་རིག་བྱེད་དང་ཧིན་དུའི་ཆོས་སོགས་ལ་བསླབས་རིམ་བཞིན། རྗེས་སུ་ལྷོ་བརྒྱུད་ནང་བསྟན་དང་། རྒྱ་བརྒྱུད་ནང་བསྟན། བོད་བརྒྱུད་ནང་བསྟན་གྱི་རིས་མེད་དགེ་བའི་བཤེས་གཉེན་གྱི་ཞབས་ལ་གཏུགས་ཏེ། ནང་བསྟན་དེ་དག་གི་གསུང་རབ་བཀའ་བསྟན་སོགས་ལ་སྦྱངས་པ་མཐར་ཕྱིན་པ་མ་ཟད། དེ་དག་གི་ཐོག་ལ་མཁྱེན་རྒྱ་རབ་ཏུ་ཡངས་པའི་མཁས་པའི་དབང་པོ་ཚད་ལྡན་ཞིག་ཡིན་ཞིང་། ད་ལྟ་རང་ཉིད་བོད་བརྒྱུད་ནང་བསྟན་རྡོ་རྗེ་ཐེག་པའི་རིག་འཛིན་རྣལ་འབྱོར་པ་ཞིག་ཡིན་ཀྱང་། ལྷོ་བརྒྱུད་ནང་བསྟན་དང་རྒྱ་བརྒྱུད་ནང་བསྟན་ལ་ཧ་ཅང་ཙིགས་ཆེར་འཛིན་ཅིང་། བལ་ཡུལ་དུ་གཙོ་བོ་ལེགས་སྦྱར་སྐད་དང་བལ་སྐད་ཐོག་ནས་བོད་བརྒྱུད་རྡོ་རྗེ་ཐེག་པའི་བསྟན་པའི་བརྒྱུད་འཛིན་གནང་དང་གནང་བཞིན་པ་ཞིག་རེད།
ངོ་སྤྲོད་མདོར་བསྡུས་འདི་«ནང་ཚན་གྱི་ཁྱད་ནོར་»ཞེས་པའི་དྲྭ་བ་ནང་འཁོད་པའི་ཁོང་གི་ལོ་རྒྱུས་དབྱིན་ཡིག་ཅན་ཞིག་ལས་བཏུས་སོ།།
 |
| ཁོང་གི་གསུང་དངོས་གསན་འདོད་ན་པར་འདིར་སྣོན་དང་གསན་ཐུབ། |
No comments:
Post a Comment