Tuesday, 12 January 2021

ས་ཀི་ནཱ་བྷཱཊ་ཟེར་བ་དེ་ད་རིང་གཞི་ནས་ངོ་འཕྲོད་སོང་།


མི་རིགས་འདྲེས་མའི་བུ་རབས་ཚ་བརྒྱུད་ཟེར་བ་དེ་མི་འདྲ་བ་ཞིག་ཡོད་པ་གོ་མྱོང་ཡོད་ལ་ཏན་ཏན་རང་རེད་འདུག འདས་པའི་ཟླ་བ་ཁ་ཤས་ནང་བོད་ཀྱི་བརྙན་འཕྲིན་གྱི་དབྱིན་སྐད་ཚན་པའི་བཅར་འདྲིས་གཙོས་པའི་གསར་འགྱུར་རེ་འགའ་ལྟ་ཉན་བྱས་པ་ཡིན། དེའི་བརྒྱུད་ངོས་རང་ཅུང་ཧ་ལས་ཤིང་དོགས་པ་ཟ་ཡུལ་དུ་གྱུར་པ་ནི། དབྱིན་སྐད་ཚན་པ་དེའི་ལས་རིམ་གཙོ་སྐྱོང་བ་བུད་མེད་ན་གཞོན་མ་སྟེ། མིང་ལ་ས་ཀི་ནཱ་བྷཊ་[Sakina Bhatt]ཟེར་བ་དེ་རེད།

     རྒྱུ་མཚན་གང་ཡིན་ཟེར་ན། མོའི་ངོ་དབྱིབས་ལ་བལྟས་ན་མོ་རང་བོད་པ་ཞིག་ད་ཏན་ཏན་ཡིན་ས་རེད་བསམ་པ་ལྟ་བུ་བྱུང་ཡང་། མོའི་མིང་དེས་རྐྱེན་བྱས་ཏེ། དངོས་གནས་ཁོ་མོ་བོད་པ་རང་ད་ཨ་ཡིན་ན་བསམ་པའི་སོམ་ཉིའི་ཀློང་དུ་ཚུད་པ་ཉུང་ཉུང་མིན། མོའི་དབྱིན་སྐད་བཤད་སྟངས་ཀྱི་སྒྲ་གདངས་དེར་བལྟས་ན་བོད་རིགས་ཤིག་ནི་རེད་འདུག་ཀྱང་། མོའི་མིང་དེ་མི་རིགས་གཞན་གྱི་མིང་ཐོགས་དོན་དེ་འདྲ་ག་རེ་ཡིན་ན་བསམ་པ་དང་། གཅིག་བྱས་ན་བོད་མིང་དེ་མི་རིགས་གཞན་གྱིས་འབོད་ཤེས་པར་དཀའ་ལས་ཡོད་ཙང་གནས་སྐབས་མིང་དེ་འཕོ་འགྱུར་བྱས་པ་ཡིན་ས་རེད་བསམ་པ་སོགས་བྱུང་བ་ལས། གཞན་བསམ་བློ་ཁ་ཁ་ཞིག་གཏན་ནས་འཁོར་མ་སོང་།

     ད་རེས་བར་གསེང་ཞིག་དང་བསྟུན་སྣང་བ་བག་ཡངས་ཤིག་བྱེད་པར་འདོད་ནས། ཁྱེད་བརྙན་[YouTube]ཁ་ཕྱེ་བ་དང་ཏག་ཏག་དབྱིན་མོ་ཞིག་གིས་ཁོ་མོར་བཅར་འདྲི་བྱས་པའི་བརྙན་ཞིག་མཐོང་སོང་བ་དེ་མ་ཐག་བརྙན་དེ་ཁ་ཕྱེས་ཏེ་བལྟ་རྒྱུ་འགོ་བཙུགས་པ་ཡིན། བརྙན་འདི་ལྟ་བཞིན་ལྟ་བཞིན་ངོས་རང་གི་དོགས་ལན་དེ་ཏག་ཏག་རག་སོང་ལ། ཧང་སང་དགོས་པ་བྱུང་སོང་། གང་ཡིན་ཟེར་ན། མོའི་སྤོ་ལགས་ནི་བལ་ཡུལ་གྱི་ནེ་ཝཱ་རཱི་མི་རིགས་རེད་འདུག་ལ། ཨ་མ་བོད་པའི་ནང་པ། ཨ་ཕ་བོད་པ་ཁ་ཆེ་བཅས་ཡིན་པ་དེ་རེད། ཆོབ་ཚ་བོ་མི་འདུག་གམ། ད་རེས་ང་ལ་རྙེད་དགོས་པ་དེ་གནས་ཚུལ་འདི་རང་རེད་ལ། བཤད་རྒྱུ་གཙོ་བོའང་འདི་རང་ཡིན།

     འོན་ཀྱང་ད་དུང་ཞར་དེད་ཅུང་ཙམ་བྱས་ན། མི་རིགས་འདྲེས་མའི་བུ་རབས་ཚ་བརྒྱུད་རྣམས་མི་འདྲ་བ་ཞིག་ཡོད་ཟེར་ཚུལ་ནི། སྤྱིར་བཏང་རིགས་གཅིག་གི་ཕ་མའི་བུ་ཚ་བུ་མོ་རྣམས་ལས། ཁོང་ཚོའི་ནང་ཤེས་རིག་གི་རྣམ་དཔྱོད་ཀྱི་ཆ་ནས་ཡིན་ནའང་འདྲ། ཕྱི་ལུས་པོའི་རྣམ་འགྱུར་གྱི་ཆ་ནས་ཡིན་ནའང་ཅུང་ཁྱད་པར་དུ་འཕགས་པ་ཞིག་ཡོད་པས་རེད། ཁོ་མོ་ལྟ་བུར་བསམ་ན་ཡང་། རིག་པ་དྭངས་པོ། ངོ་མཐོན་པོ། ངག་འཕྲོལ་བོ་སོགས་དང་ལྡན་པས། བློ་ཕྱོགས་སུ་མ་ལྷུང་བར་གཟུ་བོར་གནས་ཤིང་འཛེམ་འབག་མེད་པའི་ཐོག་ནས་དྲི་བ་གང་ལའང་ལན་འདེབས་ཐུབ་པ་སོགས་ཀྱི་ཁྱད་ཆོས་ཡོད་པ་སོགས་རེད། གཞན་ཡང་ཁོ་མོའི་སློབ་སྦྱོང་གི་གནས་ཚད་མཐོ་པོ་ཡོད་པ་དང་། ལས་ཀའི་ཐད་འཇོན་པོ་དང་ཧུར་ཐག་ཡོད་པ། ད་ལྟའི་མོ་རའི་ལས་གནས་ཀྱང་ཡག་ཐག་ཆོད་ཡོད་པ་དེ་དག་སྨོས་མི་དགོས།

     བརྙན་འདི་བལྟས་པ་བརྒྱུད་ང་ལ་ཧང་སང་དགོས་པ་གཞན་དག་ཅིག་ཀྱང་བྱུང་སོང་། དེ་ནི་བོད་པའི་ཁ་ཆེའི་བུ་མོ་ཞིག་བོད་གཞུང་གི་ལས་དོན་ཐད་མཉམ་ཞུགས་ཀྱིས་ལས་ཀ་བྱེད་ཀྱིན་ཡོད་པ་དེ་རེད། དེའི་རྒྱབ་ལྗོངས་སྣ་ཚོགས་ཡོད་མོད་ཀྱང་རེ་ཞིག་གླེང་བར་མི་སྤྲོའོ།

༢༠༢༡།༠༡།༡༢ མཚན་མོར་བྲིས།

No comments:

Post a Comment