གལ་ཏེ་བདག་སྐྱེ་བོ་ཐ་མལ་པ་ཞིག་ལས་ཀྱང་ཆེས་ཐ་མལ་པ་ཞིག་ཡིན་ན། བདག་གིས་ཅིས་ཀྱང་ཤིན་ཏུ་འཁོན་པར་བྱ་བའི་ཡུལ་ནི་རང་ཉིད་ཀྱི་ཨ་ཕ་ལགས་ཡིན་མོད། འོན་ཀྱང་བདག་ལ་མཚོན་ན་འཇིག་རྟེན་འདིར་སྐྱེས་ནས་བཟུང་སྙིང་ནས་སྡང་བར་བྱ་བ་དང་འཁོན་པར་བྱ་བའི་གནས་སུ་ཞིག་ཀྱང་ཡེ་ནས་མེད་པས། བདག་དང་འབྲེལ་བ་ཐོགས་ཚད་བདེ་བར་བཞུགས་ཤིག
ཅི་སྟེ་བདག་སྤུན་མཆེད་ཕན་ཚུན་དང་གྲོགས་པོ་ཕན་ཚུན་མ་རིག་མ་ཤེས་པའི་དབང་གིས་ཅུང་ཟད་མ་བྱུང་བ་རེ་ཡོང་ནའང་རིམ་བཞིན་མཐོལ་བཤགས་ཀྱིས་མཐུན་པར་བྱེད་མོད། འོན་ཀྱང་དེ་ལྟར་བདག་གིས་ཅི་འདོད་པའི་བསམ་པ་ཕལ་ཆེ་བས་མཁྱེན་ཚོད་གདའ་མི་གདའ་ཅི་རིགས་འོང་བས། ཁྱེད་ཅག་ལས་འགའ་ཞིག་གི་ཐུགས་ན་བདག་འཁོན་པ་ཅན་ཞིག་དང་གཡོ་སྒྱུ་ཅན་ཞིག་ཏུ་མཐོང་མཁན་མཆིས་ན། ད་ནས་བཟུང་ཐུགས་དོགས་དེ་དག་གཏན་ནས་བསྐྱུར་བར་མཛོད་ཅིག
མཚམས་རེ་བདག་གིས་གཞན་སེམས་ཆུང་ཙག་རེ་ཡིས་ཀུན་ནས་བསླངས་ཏེ་ཁྱེད་དང་ཁྱེད་ལ་ཕན་པའི་ཆ་སྒྲུབ་ཁུལ་ཞུས་ཀྱང་། དེས་ཁྱེད་ལ་ཕན་པའི་ཚབ་ཏུ་གནོད་པ་བྱུང་སྲིད་ན། དེ་ནི་གཅིག་ནས་བདག་གིས་ཕན་པ་སྒྲུབ་མ་ཤེས་པས་ཀྱང་ཡིན་སྲིད་ལ། ཡང་ན་འུ་ཅག་ཕན་ཚུན་ལས་འབྲེལ་མེད་པས་ཀྱང་ལན་སྲིད། མདོར་ན་མཁྱེན་པའི་བདག་པོ་མ་ཡིན་ཙང་རྒྱུ་མཚན་འདི་རེད་ཟེར་ནས་བཙལ་ནས་རྙེད་རྒྱུ་མེད་མོད། འོན་ཀྱང་རྒྱུན་དུ་རང་གཞན་ཕན་ཚུན་ལྷིང་འཇགས་ངང་གནས་ཕྱིར་བསམ་ཤེས་ལྡན་པ་དགོས་གལ་ཆེ་བས་དེ་དོན་དགོངས་བཞེས་གནོངས་ཤིག
འདི་ལྟར་བདག་ལ་འཁོན་པར་བྱ་བའི་གནས་ཡེ་ནས་མེད་ཟེར་ཚེ། བདག་སྐྱེ་བོ་ཡང་དག་པ་ཅན་ཞིག་ཡིན་ཟེར་བའང་ལར་ནས་མ་ཡིན་ཏེ། རང་སེམས་ཀྱི་གཤིས་ཀ་ནི་འཇིག་རྟེན་འདིར་ཐོག་མའི་ལྟེ་མཚལ་འཐོར་དུས་ནས་བཟུང་རང་བཞིན་ལྷན་སྐྱེས་ཀྱིས་ལྷོད་དེ་འབོལ་ལེ་བ་ཞིག་ཡིན་པས་ཡིན་ལ། དེའི་སྟེང་ཚེ་འདིའི་སྦྱོར་བྱུང་གི་དགེ་བས་ཀྱང་རང་སེམས་ཅུང་ཞི་བར་གནས་ཡོད་སྲིད། དེས་ན་ཐམས་ཅད་ཀྱིས་བདག་ཆེན་པོར་རློམ་བཞིན་འདུག་པར་གཏན་ནས་མ་དགོངས་ཤིག
གལ་ཏེ་རང་གི་སེམས་ཉིད་ལྷོད་དེ་བ་ཞིག་མེད་ན་སྡང་ཁྲོའི་འཇུག་པ་སྣ་ཚོགས་པས་འཁོན་པ་སྐྱེ་བར་འོང་བ་ལོས་དང་ལོས་ཏེ་སྨོས་ཅི་དགོས། དེས་ན་བདག་འདི་ལྟར་རང་སེམས་ལྷོད་དེ་འབོལ་ལེར་གནས་པ་འདི། བདག་རང་ཉིད་སྐྱེ་བ་ཐ་མལ་པ་ཞིག་ཡིན་རུང་ཆེས་ཐ་མལ་བ་ཞིག་མ་ཡིན་པར་མཐོང་བ་དང་གནས་པ་འདི་ནི། ཚེ་རབས་ནས་ཚེ་རབས་སུ་དགེ་བར་གོམས་པའི་རང་དྲིན་རང་ལ་ཆེ་བ་ཞིག་ལོས་ཡིན་ཏེ་ཅིས་ཀྱང་ཡིན་ནོ། །དེ་དག་གི་ཕྱིར་ན་ཁྱེད་ཅག་བདག་ལ་འཁོན་རུང་མི་འཁོན་རུང་། བདག་ནི་ཁྱེད་ཅག་སུ་ཞིག་ལའང་སྡང་ཞིང་རྒོལ་བར་བྱ་བའི་གནས་སྐབས་གཞར་ཡང་མེད་པ་ལགས་ན། ཐམས་ཅད་གནས་བཟོད་བདེ་བར་མཛོད་ཅིག་གུ།
༢༠༢༡།༠༡།༣༡ ཉིན་བྲིས།
No comments:
Post a Comment