ཡེ་ལུགས་བགྲང་བྱའི་ཕུང་པོ་བརྒྱ་ཕྲག་བཞི་པ་ལྔ་པ་ཙམ་ནས་བཟུང་སྟེ། མཁས་གྲུབ་ཐམས་ཅད་ཀྱི་རྒྱལ་པོ་ཀླུ་ཐོགས་ཞི་འཚོ་ལ་སོགས་པས་གཙོས། རྒྱན་དྲུག་ཟེར་ནའང་འདྲ། གཞན་ཡང་པཎ་གྲུབ་བཅུ་བདུན་དང་། པཎྜིཏ་ལྔ་བརྒྱ་དང་། གྲུབ་ཐོབ་བརྒྱད་ཅུ་ཟེར་ནའང་འདྲ། གང་ལྟར་ནཱ་ལནྡཱ་དང་། ཝི་ཀྲ་མ་ཤཱི་ལ། ཨོ་ཏནྟ་པུ་རི། ཨ་ཇནྟ་ལ་སོགས་པས་གཙོས་པའི་འཕགས་ཡུལ་གཙུག་ལག་ཁང་དང་སྒྲུབ་གནས་དག་ན་བཞུགས་པའི་མཁས་པའི་དབང་པོ་དང་གྲུབ་པའི་ཁྱུ་མཆོག་ཀུན་གྱིས་ནང་བསྟན་གསེར་བཙོ་མ་དེ་རི་དབང་ལྷུན་པོ་ལྟར་སྲ་ཞིང་བརྟན་པར་བཟུང་བ་ལྟ་བུ་བྱུང་ཡོད་ཀྱང་། ནཱ་ལནྡཱས་གཙོས་པའི་གཙུག་ལག་སློབ་ཁང་དག་ནས་མཁས་པའི་གོ་སར་བསྙེགས་པའི་པཎྜིཏའི་མཚན་ཅན་རྣམས་ཀྱིས། སངས་རྒྱས་ཀྱི་བཀའ་ཡི་དགོངས་པ་རྣམས་ལ་ཐོག་མར་གཞུང་བྱེད་པ་པོ་ཟེར་བ་ཞིག་གིས་འགྲེལ་བ་མཛད་པ་དང་། དེ་ལའང་འགྲེལ་བ་བྱེད་པ་པོ་ཟེར་བ་དག་གིས་ཨ་འགྲེལ་དང་ཡང་འགྲེལ་གྱིས་ཕུ་ཐག་ཆོད་རྒྱུ་གཏན་ནས་མེད་པར་རིམ་བཞིན་གྲུབ་མཐའི་སྒྲོ་འདོགས་ཅི་རིགས་པས་འགྲེལ་བ་སྣ་ཚོགས་པ་མཛད་ཡོད་པ་དང་། དུས་དེ་ནས་བཟུང་ད་ལ་ཐུག་གི་བར་གོ་ལ་འདིའི་ཡ་གླིང་གི་ཁྱོན་ཡོངས་སུ་བཤད་པའི་གྲྭ་མང་དུ་ཕྱིན་ཅིང་། སྣང་ཚོད་ལ་ལུང་གི་བསྟན་པ་ཤིན་ཏུ་དར་རྒྱས་བྱུང་བ་ལྟ་བུ་ཡིན་ཡང་། ཞིབ་པར་བརྟགས་ན་ལུང་གི་བསྟན་པ་ཆེས་ཆེར་དར་བ་ཙམ་ལས། ཡང་དག་པའི་ལུང་གི་བསྟན་པ་ནི་བཤད་གྲྭ་དེ་དག་གི་ཉེར་ལེན་ལས་རིམ་བཞིན་རྒུད་པ་རྒུད་པར་ཕྱིན་པ་བྱུང་ཡོད། དེ་དག་ཀྱང་བསྟན་པའི་ནང་གི་རྩ་བ་རྟོགས་པའི་བསྟན་པ་ཉམས་རིམ་བཞིན་ལུང་གི་བསྟན་པར་ཡང་ཉམས་རྒུད་དེ་ལྟ་དེ་ལྟར་བྱུང་གི་ཡོད་པ་དང། རྟོགས་པའི་བསྟན་པའི་ཉེར་ལེན་གྱི་རྒྱུ་སྒོམ་སྒྲུབ་བྱ་རྒྱུ་ཡིན་ཞིང་། གང་ཞིག་སྒོམ་སྒྲུབ་བྱ་རྒྱུ་དེའང་ཐོག་དང་པོའི་གཞི་རྩ་ཪིགས་པས་ཕུ་ཐག་ཆོད་པའི་ཐོས་བསམ་དཔྱིས་ཕྱིན་པ་ཞིག་བྱས་པ་དེའི་སྟེང་བསྒྲུབ་རྒྱུ་ཡིན་པར་གདོན་མི་ཟ་མོད། འོན་ཀྱང་གཙུག་ལག་དེ་དག་ཏུ་ལུང་གི་བསྟན་པ་གཙོ་བོར་མཛད་པའི་ཉེར་ལེན་ལས། ད་ཆར་གཞིགས་ན་རིམ་བཞིན་རྟོགས་པའི་བསྟན་པ་དེའང་རིང་ས་རིང་སར་གྱུར་པ་དང་། ལུང་གི་བསྟན་པའི་གནས་ཚད་ཀྱང་རབ་འབྲིང་ཐ་གསུམ་དགུ་ཕྲུགས་སུ་ཕྱེ་བའི་ཐ་མའི་འབྲིང་པོ་ལྟ་བུར་བསླེབ་པའི་ཚོད་དུ་གདའ།
ད་ལྟའི་ཆར་སངས་རྒྱས་བསྟན་པ་ལྷོ་བརྒྱུད་ནང་བསྟན་དང་རྒྱ་བརྒྱུད་ནང་བསྟན་བོད་བརྒྱུད་ནང་བསྟན་བཅས་སུ་ལུང་རྟོགས་ཀྱི་བསྟན་པ་རྩ་བ་ནས་མ་ཉམས་ཙམ་ལས་དོན་དུ་ཉམས་ལ་ཁད་པ་ལྟ་བུའི་གནས་སུ་གྱར་ཡོད་པ་ལོས་ཡིན། ཐུབ་རིག་སྨྲ་བའི་སྲོལ་འཛིན་པ་འུ་ཚོའི་བྱ་བ་ནི་སྤོང་ཀློག་གཉིས་ལས་མེད་མོད། དེ་གཉིས་ལས་ཀློག་པ་ཙམ་ལ་བསམས་ནའང་གཞུང་ཆེན་ཞིག་གི་ནང་དོན་གྱི་ཀློང་ཆེན་པོར་འཐུམས་བསྡད་པ་གཅིག་པུ་མ་ཡིན་པར་རྒྱ་ཆེ་ས་ནས་‹‹ཐུབ་བསྟན་རིག་གནས་ཀྱི་སྤྱི་ཚོགས་ཀྱི་ཤེས་བྱ་››དག་ལ་ཤེས་འཚོལ་བྱ་དགོས་ཀྱི། ད་ལྟའི་བར་ནང་བསྟན་སློབ་ཆེན་ཟེར་ནའང་འདྲ་གདན་ས་ཆེན་པོའི་བཤད་གྲྭ་དག་གི་ཁྲོད་དུ་གཞུང་ཆེན་རེ་རེའི་ནང་དོན་རེ་རེ་ནས་རེ་རེར་ཀློང་ནས་ཀློང་དུ་མུན་འཐིབས་ཀྱི་ངང་ཐོས་བརྩོན་ཤེས་འཚོལ་གྱི་ཁུལ་འདྲ་བགྱིད་བཞིན་པ་ལས་རྩ་བའི་ཆ་ནས་སམ་སྤྱི་ཡོངས་ཀྱི་ཤེས་བྱར་ཐོས་བསམ་གཉེར་མཁན་དཀོན་ཚོད་དུ་མཐོང་། མ་གཞི་ནས་འུ་ཚོའི་སྦྱང་གཞི་སློབ་ཚན་དག་ཀྱང་དེ་འདྲ་དང་དེ་འདྲ་ལས་མེད་པས་རེད། ཕྱི་གླིང་སློབ་ཆེན་སློབ་ཆུང་གང་ནའང་སྤྱི་ཚོགས་རིག་གནས་ཀྱི་སློབ་ཚན་ཞིག་དམིགས་བསལ་འཁོལ་འདོན་གྱིས་སློབ་གཉེར་བྱེད་བཅུག་གི་ཡོད། སྤྱི་ཚོགས་ཤེས་བྱའམ་སྤྱི་ཚོགས་རིག་གནས་ཀྱི་རྒྱབ་བསྙེས་བྱེད་སའམ་རྨང་གཞི་ལྟ་བུ་ནི་‹‹ལོ་རྒྱུས་སློབ་སྦྱོང་››དག་ཡིན། ཆོས་འཇིག་རྟེན་གང་དང་གང་གི་སྤྱི་ཚོགས་ཀྱི་ཤེས་བྱ་དག་ལ་ཤེས་འཚོལ་བྱ་འདོད་མཆིས་པ་དེ་ཀུན་གྱི་གཞི་མ་ལོ་རྒྱུས་དག་ཡིན་ཞིང་། ལོ་རྒྱུས་དག་ཀྱང་གོ་རིམ་ཡོད་པ་ལྟ་བུ་ཙམ་གྱིས་མི་འགྲིག་པར་ལོ་ཚིགས་ཀྱིས་ས་གཅད་རྒྱུ་གལ་ཆེ། ལོ་རྒྱུས་ཤིག་ཡིན་ཕྱིན་ལོ་ཚིགས་ཀྱིས་ས་གཅད་རྒྱུ་མེད་ཚེ་ལོ་རྒྱུས་དེ་ཇི་ཙམ་གྱིས་མཚར་མཚར་རྫིག་རྫིག་འདྲ་བཤད་རྒྱུ་ཡོད་ནའང་ཕལ་ཆེར་ཡིད་ཆེས་བྱ་རིན་བྲལ་བའི་གནས་སྟངས་སུ་སླེབས་ཡོད་པར་བཤད་ཚུལ་མཆིས།
གཙོ་རྒྱུགས་སྤྱི་ཚོགས་ཀྱི་ཤེས་བྱའི་འདུ་རའི་ཁྲོད་དུ་གཙོ་རྒྱུགས་སྤྱི་ཚོགས་ཀྱི་འགྲོ་སྟངས་དང་གཙོ་རྒྱུགས་སྤྱི་ཚོགས་ཀྱི་བསམ་བློ་གཏོང་སྟངས་རྣམས་ཤེས་ནས་ཚུལ་བཞིན་སྤྱོད་རྒྱུ་གལ་ཆེ། གསར་གཏོད་ཁོ་ནར་ཞེན་པའི་རིང་ལུགས་པ་རྣམས་ཀྱི་རྗེས་སུ་མ་འབྲངས་པར་ལེགས་ཆ་ཅན་གྱི་སྲོལ་གསར་ལུགས་བཟང་ཞིག་སུ་ལ་མཆིས་ནའང་དེ་དག་ལེན་མི་ཆོག་པ་མིན་པར་བརྟེན། འོ་རང་ཚོ་ཐུབ་བསྟན་པ་གཤའ་མ་ཞིག་དང་དྲ་མ་ཞིག་ཡིན་པར་འདོད་ན། ནམ་ཞར་ཀུན་ཏུ་སྤྱིར་སྟོན་པ་ཐུབ་པའི་དབང་པོ་དང་ཁྱད་པར་གངས་ལྗོངས་རྒྱལ་བསྟན་ཡོངས་རྫོགས་ཀྱི་ཆུ་འགོ་མཁན་སློབ་ཆོས་གསུམ་གྱི་བསྟན་ཞབས་སུ་གཏོགས་པའི་ཧི་མཱ་ལ་ཡའི་མི་རིགས་སུ་ཞིག་ཡིན་རུང་། སྐྱབས་ཀྱི་མཆོག་གྱུར་སྟོན་པ་ཐུབ་དབང་ཉིད་ལ་གཙིགས་ཆེར་བཟུང་བའི་སྟེང་གནའ་དེང་གི་ལྷོ་བྱང་ནང་བསྟན་སྤྱི་དང་། ཁྱད་པར་དུ་བོད་བརྒྱུད་ནང་བསྟན་དང་། དེའི་ནང་ནས་དམིགས་བསལ་གྱི་རང་ཉིད་ཀྱི་ཆོས་བརྒྱུད་དེ་གང་དང་གང་དུ་དར་བ་དེ་དང་དེ་འཛིན་གྱི་མཁས་གྲུབ་དམ་པ་དག་གི་ལོ་རྒྱུས་ལ། དངོས་ཐོག་བདེན་འཚོལ་གྱི་སྒོ་ནས་ཤེས་བརྩོན་དགའ་རབ་ཅིག་བྱ་དགོས་པ་དང་། སློབ་གླིང་སོ་སོའི་འཛིན་གྲྭ་སོ་སོའི་དགེ་བའི་བཤེས་གཉེན་གང་དག་གིས་ཀྱང་སློབ་ཁྲིད་བྱེད་པའི་ཚེ་ན། ཐུབ་བསྟན་རིག་གནས་ཀྱི་ལོ་རྒྱུས་སྤྱི་དང་ཁྱད་པར་སྐབས་ཏོག་འཛིན་སྐྱོང་བྱ་ཡུལ་འཛིན་གྲྭ་སོ་སོའི་སློབ་ཚན་དག་དང་འབྲེལ་བའི་ལོ་རྒྱུས་སྦྱར་དགོས་ས་དག་ཏུ། གང་ཐུབ་ཀྱིས་ལོ་རྒྱུས་ཀྱི་རྒྱབ་ལྗོངས་རྣམ་པར་དག་པས་མཚམས་སྦྱར་ཏེ་གཞུང་བཤད་བྱ་རྒྱུ་གལ་ཆེན་ནང་གི་དོན་ཆེན་དུ་མཐོང་།
ལར་དེང་སང་འུ་ཅག་ཐུབ་བསྟན་རིང་ལུགས་ཀྱི་ཁྲོད། དགོན་པ་དང་། ཆོས་ཚོགས། སེར་མོ་བའི་གྲས་དག ཇེ་མང་དང་ཇེ་མང་དུ་འགྲོ་བཞིན་ཡོད་པ་དངོས་དངོས་རྗེན་རྗེན་ཡིན་ཞིང་། ངོ་ཐོག་སངས་རྒྱས་ཀྱི་བསྟན་པ་ཇི་བཞིན་སྐྱོང་བའི་དགོན་སྡེ་ཁག་དང་། མང་ཚོགས་ལ་ནང་ཆོས་ངོ་སྤྲོད་ཇི་བཞིན་གནང་མཁན་གྱི་ཆོས་ཚོགས་ཁག་དང་། ཕྱག་དཔེར་དོ་དབྱིངས་ཟབ་པོ་དང་བློ་སྦྱོང་གཤའ་མའི་ལམ་ལ་འབད་པ་ལྷུར་ལྷུར་གནང་མཁན་གྱི་སེར་མོ་བའི་རིགས་འདི་དག་ནི། ཧ་ཅང་གིས་དཀོན་དུ་དང་ཉུང་དུ་འགྲོ་ཡི་ཡོད་པར་སྨྲོས་ག་ལ་དགོས། བློ་ཆོས་ལ་སྐུལ་མ་ཐུབ་ནའང་འདྲ། དཔེ་ཆ་གཏིང་ཟབ་པོ་ཞིག་མ་ཤེས་ནའང་འདྲ། མ་མཐར་ཡང་ཐུབ་བསྟན་རིག་གནས་ཀྱི་ལོ་རྒྱུས་སློབ་སྦྱོང་དག་ལ་དོ་སྣང་དགའ་རབ་ཀྱིས་རགས་ཚོད་ཙམ་དང་འོལ་སྤྱི་ཙམ་དུ་བཤད་རྒྱུ་ཡོད་ན་དེས་འགྲིག་པ་རེད། དེ་ཙམ་གྱི་སློབ་སྦྱོང་མེད་ན། ལོ་ནས་ལོར་གཞི་རིམ་ནས་བཟུང་སྟེ་མཐོ་སློབ་ཆེན་མོ་སོགས་ཇི་ཙམ་མཐར་ཕྱིན་ནའང་། རང་རང་གི་ལོ་ཚོད་དང་ན་ཚོད་འཕར་བ་ཙམ་ལས། རང་ཉིད་མི་ཞིག་དང་ཁྱད་པར་ནང་བསྟན་པ་ཞིག་ཡིན་པར་མཚོན་པའི་ཤེས་ཡོན་སྤྱི་བམ་པ་ཞིག་ཀྱང་ལོན་མ་ཐུབ་ཚེ། རང་གཞན་སུའི་ངོར་ཡང་ཆེས་ཡིད་ཕམ་པའི་གནས་སུ་གྱུར་པ་ཡིན་པར་གདོན་མི་ཟ། དེས་ན་སུ་ཡིན་རུང་སོས་དལ་དུ་མ་བཞུགས་པར་དཀའ་སྤྱད་འབད་འབུངས་དུ་མར་བརྒྱུད་དེ་དཀོར་མཛོད་གླིང་དུ་ཕྱིན་ནས་དཀོར་བུ་ལོན་དུ་མ་གྱུར་བར་དཀོར་ལ་རང་དབང་གིས་སྤྱོད་ཐུབ་པའི་དཀོར་གཟན་པ་ཞིག་ཏུ་གྱུར་བར་བརྩོན་རོགས།
No comments:
Post a Comment