"ལོ་གསར་ལོ་སར་གང་ཡང་རུང་།།" ཟེར་བ་ལྟ་བུའི་བོད་ཡིག་ཏུ་ཡི་གེ་གདམ་ང་ཅན་དེ་འདྲ་ཇི་ཙམ་མང་བ་དེ་ཙམ་རྙོག་གྲ་ཆེ་རོགས་རེད་འདུག
དུས་རབས་ཉི་ཤུའི་སྔོན་གྱི་བོད་ཀྱི་ཡིག་མཁན་མཁས་གྲུབ་ཕལ་ཆེ་བས་བོད་ཡིག་འབྲི་དུས་མཉམ་འཇོག་དེ་ཙམ་གནང་མི་འདུག ལྷག་པར་ལོ་མང་ཐོས་བསམ་གྱི་ངལ་བ་ལ་མ་བརྟེན་པའི་རྣལ་འབྱོར་པ་དང་གྲུབ་ཐོབ་ཚོས་བྲིས་པའི་ཡི་གེ་ཕལ་ཆེ་བར་གཅིག་གྱུར་རང་བཞིན་ཅན་གྱི་མཉམ་འཇོག་གནང་བ་དཀོན་པོ་རེད། དཔེར་ན་འཕྲིན་ལས་དང་ཕྲིན་ལས། འཕྲེང་བ་དང་ཕྲེང་བ་དང་། འཕྲིན་ཡིག་དང་ཕྲིན་ཡིག་སོགས། གོ་ཡུལ་གཅིག་པ་ཡིན་ཀྱང་འ་སྔོན་འཇུག་ཡོད་མེད་ལ་མཉམ་འཇོག་གནང་མེད་པ་དང་། མགོ་དཔོན་དང་འགོ་དཔོན། མགོ་བརྗོད་དང་འགོ་བརྗོད། མགོ་མཇུག་དང་འགོ་མཇུག་སོགས། མིང་གི་ཐོག་མ་དང་བྱ་བའི་ཐོག་མའི་དོན་ཅན་གྱི་ཚིག་རྣམས་ཕན་ཚུན་འཁྲུགས་པ་དང་། གཞན་ཡང་འདི་དང་འདི་ལྟ་བུའི་ནོར་སོ་ཅན་མང་དག་མཆིས་པ་དེ་དག་ཐམས་ཅད་མཉམ་འཇོག་མ་བྱས་པ་འབའ་ཞིག་ལས་བྱུང་བ་ཡིན།
དེའི་རྐྱེན་གྱིས་བོད་ཀྱི་བརྡ་དག་གི་སྡོམ་ཚིག་མཛད་མཁན་རྣམས་དང་། ཚིག་མཛོད་སྒྲིག་མཁན་རྣམས་ཀྱང་ཅི་བྱ་གཏོལ་མེད་དུ་གྱུར་ཏེ། སྐྱེ་དགུ་ར་རྒུ་གང་ཡང་རུང་། །ཞེས་པ་སོགས་དང་། སྐྱེ་དགུ་ནི། སྐྱེ་རྒུའི་འབྲི་ཚུལ་གཞན་ནོ། ཟེར་བ་སོགས་བྱུང་ཡོད། འདི་ལྟ་བུ་རེ་ཟུང་འདྲ་ཡོད་ནའང་ཐང་མོད། ད་ལྟའི་ཆར་འདི་ལྟ་བུའི་ཡི་གེ་མང་ཐག་ཆོད་འདུག་ལ། འདི་དང་འདི་ལྟ་བུའི་ཡི་གེ་ནི་བོད་ཡིག་གཙང་མ་འབྲི་བར་འབད་མཁན་དང་རྩོམ་སྒྲིག་པ་སོགས་ལ་དཀའ་རྙོག་ཆེ་ཤོས་ཤིག་ཡིན་པ་དང་། མཁས་པ་ཉམས་མྱོང་ཅན་ཁ་ཤས་ཀྱིས་འདི་དག་གིས་ནི་བོད་ཡིག་ལ་གུ་ཡངས་ཡོད་པར་མཚོན་པ་རེད་ལ། གང་སྟབས་བདེ་བདེར་སྤྱོད་དགོས་ཞེས་བཤད་པར་བྱེད་ཀྱང་། གུ་ཡངས་དགོས་ས་ལ་དགོས་པ་ལས་ཡོད་ཚད་གུ་ཡངས་སུ་བཏང་ན་ཁྲིམས་མེད་ལུགས་མེད་དུ་འགྲོ་སྲིད་པ་ཡིན་པས། གང་ལྟར་སྔ་མོ་བོད་ཀྱི་ཆོས་རྒྱལ་རྣམས་ཀྱི་སྐབས་ནི་བཀས་བཅད་བྱེད་རྒྱུ་ཡོད་ཀྱང་། ད་ནི་བཀས་བཅད་བྱེད་མཁན་མེད་པས་ན། རིམ་བཞིན་ད་དུང་དེ་དག་ལས་སྡུག་ཏུ་མི་འགྲོ་ནའང་ཡག་ཏུ་འགྲོ་རྒྱུ་ཁག་པོ་རེད།
No comments:
Post a Comment