ངའམ་ང་ལྟ་བུའི་གང་ཟག་དཀྱུས་མའི་དཀྱུས་མ་རྣམས་སྤྱི་ཡོངས་གཞིར་བཞག་ནས་བཤད་ན། ཚེ་རབས་ནས་ཚེ་བརྒྱུད་ཐམས་ཅད་དུ་བདག་སོགས་ལ་གོས་ཤིང་གོམས་པའི་གཤིས་རྒྱུད་ངན་པ་ནི། ལྡོག་ཐུབ་པར་དེ་ཙམ་ལས་སླ་པོ་ཡོད་ས་མི་འདུག་སྟེ། ཚེ་འདིའི་གློ་བུར་གྱི་གོམས་གཤིས་ངན་པ་རྣམས་ནི། ཕལ་ཆེར་ལྡོག་མི་ཐུབ་པ་དེ་འདྲ་ཅང་མེད་དྲོ་སེམས། རྒྱུ་མཚན་ནི། ཇི་ལྟར་ཚེ་རབས་མང་པོར་ལས་ངན་མུ་མཐུད་བསགས་པ། དེའི་ཚོད་ཀྱིས་གཤིས་ངན་དེ་ཐུ་རུ་འགྲོ་བ་དང་། དེའི་རྐྱེན་གྱིས་རང་དང་རང་གཤིས་ངན་པ་དེ་གཉིས་པོ་མཉམ་དུ་སྦྲེལ་བས། ཁྱོད་ལ་སྤྱོད་ངན་དང་གཤིས་ངན་འདི་འདྲ་ཞིག་འདུག་ཟེར་ཀྱང་ང་ཚོས་ཧ་གོ་ཡི་མེད་ལ། དེ་ལ་བརྟེན་ནས་ང་ཚོས་སོ་སོའི་སྤྱོད་ངན་དེ་དག་སོ་སོ་ལ་ཡོད་པར་ངོས་ལེན་གཏན་ནས་བྱེད་ཀྱི་མེད། གང་ཡིན་ཟེར་ན། གང་ཟག་སུ་ལའང་ལྷན་སྐྱེས་ཀྱི་ང་རྒྱལ་ཞིག་ཡོད་ཅིང་། དེ་ལ་བརྟེན་ནས་རང་ཉིད་ནམ་ཡང་སྐྱོན་མེད་ཁོ་ན་ཡིན་པར་དྲན་གྱི་ཡོད་པས་རེད། ཕྱོགས་གཅིག་ནས་ཚེ་འདི་རང་ལ་ཉོན་མོངས་རང་མཚན་པ་ཐུ་ཆེ་བར་གོམས་པ་རྣམས་ཀྱང་། རང་གོས་དྲི་མ་དེ་དག་གཙང་ཁྲུས་རྒྱག་རྒྱུར་ཐབས་ལམ་དམིགས་བསལ་ཞིག་མ་བསྟེན་ན། དེ་ཡང་དཀའ་ལས་ཁག་པའི་ཚོད་དུ་གདའ།
སྤྱིར་ནས་མི་ཚང་མར་སོ་སོས་ལས་བསགས་ཚུལ་དང་མཐུན་པའི་གོམས་གཤིས་ངན་པ་ཆེ་ཆུང་ཅི་རིགས་ཡོད་མོད་ཀྱང་། གང་ཟག་དེ་དང་དེའི་གོམས་གཤིས་ངན་པ་དེ་དག་ལ་ང་ཚོས་ཁག་གཡར་ནས་"མི་དེ་ཡག་པོ་མི་འདུག་"ཟེར་བ་ནི་ཏན་ཏན་རང་ནོར་བ་ཡིན། ཅིའི་ཕྱིར་ན་གང་ཟག་ཅི་འདྲ་ཞིག་ཡིན་རུང་དེ་དང་དེས་ཚེ་རབས་ཐོག་མེད་ནས་བསགས་པའི་རང་གཤིས་ཐ་མལ་བས་བསྒྲིབས་པའི་དྲི་མ་རྣམས་ནི་རང་ལ་འགོས་བསྡད་ཡོད་རུང་། རང་ལ་དྲི་མ་དེ་དང་དེ་འགོས་ཡོད་པ་ནི་ཤེས་ཀྱི་མེད། དེ་མ་ཤེས་དུས་དྲི་མ་དེ་རྒྱུ་གང་ལ་བརྟེན་ནས་ཚུལ་ཇི་ལྟར་འགོས་ལུགས་ཀྱང་ཤེས་ཐབས་བྲལ་བ་རེད། དེ་ཡིན་དུས་གང་ཟག་དེ་དང་དེའི་ཕྱིའི་སྤྱོད་ཚུལ་ཐ་མལ་བ་འགའ་ཞིག་ལ་དཔག་ནས། མི་དེ་ཡག་པོ་མི་འདུག་ཟེར་བ་དང་། ལྐུགས་པ་རེད། སྤྱོད་ངན་རེད་ཟེར་ནས་ཐད་ཀར་བསྙད་འདོགས་པ་གཏན་ནས་མི་རུང་། དེས་ན་གང་མ་ཤེས་བཞིན་དུ་ནོར་འཁྲུལ་བྱེད་པ་དང་སྤྱོད་ངན་སྟོན་པ་སོགས་ནི། གང་ཟག་ཁོ་རང་གིས་མ་ཤེས་བཞིན་དུ་བྱས་པ་ཡིན་པས་ན། ཁོ་རང་ལ་ཁག་གཏན་ནས་མེད་པ་རེད།
དཔེར་ན་རྩ་སྒྲིབ་འཕོག་མཁན་ཚོར་རྩ་སྒྲིབ་དེ་ཡར་ནམ་ལངས་པའི་ཚེ་ན། ཁོ་རང་ལ་རང་དབང་ཁྱོན་ནས་མེད་པར་རྩ་སྒྲིབ་དེ་མ་ཡལ་བར་དུ་ཚུལ་བཞིན་གནས་ཐབས་བྲལ་བ་དང་། དེ་བཞིན་གཟའ་འབབ་མཁན་སོགས་དུས་དང་དུས་སུ་ནད་གཞི་རིགས་ཡར་ལང་བའི་ཚེ་ན་ཁོ་རང་ལ་རང་དབང་གཏན་ནས་བྲལ་བ་བཞིན་དུ། ང་ཚོར་ཚེ་རབས་ནས་ཚེ་རབས་སམ་དུས་ནས་དུས་སུ་གོམས་པའི་གཤིས་བརྒྱུད་ངན་པ་རྣམས་ཕྱིར་མངོན་ཡོང་བའི་ཚེ། དེ་དག་ལ་ང་ཚོས་གདོང་ལེན་བྱེད་རྒྱུར་དཀའ་ལས་ཁག་ཙམ་ཡོད་པ་རེད། ཕྲན་རང་ལ་བསམ་ནའང་སོ་སོ་གཅིག་པུར་བསྡད་དུས་ཨའུ་ཚོད་འདུག་སྟེ། སྤྱི་ཚོགས་དང་མཉམ་དུ་བསྡད་དུས་མཚམས་རེ་དུས་རྒྱུན་དང་མ་འདྲ་བའི་སྤྱོད་པ་ཁྱད་མཚར་ཞིག་ཆགས་ཡོང་གི་འདུག
མདོ་དོན་མི་རྣམས་ཀྱི་བྱ་སྤྱོད་ལ་མ་ཤེས་བཞིན་དུ་བྱེད་པ་དང་ཤེས་བཞིན་དུ་བྱེད་པ་གཉིས་ཡོད་པ་དང་། དེ་ལའང་བཟང་ངན་གཉིས་རེ་ཡོད་པའི་ནང་ནས། གོང་དུ་བཤད་པ་དག་མ་ཤེས་བཞིན་དུ་བྱེད་པའི་ངན་སྤྱོད་ཁག་རེད། ང་ཚོས་གང་ཟག་གང་ཡང་རུང་བ་ཞིག་སོ་སོ་དང་འགྲོགས་ཡུན་རིང་མ་རིང་གི་ཁྱད་པར་གྱིས། ཁོ་དང་ཁོས་བྱས་པའི་སྤྱོད་ངན་དེ་དག་ཤེས་བཞིན་དུ་བྱས་པ་ཡིན་མིན་རོབ་ཙམ་ཤེས་ཀྱི་རེད་ལ། དེ་ཡང་གཙོ་བོ་རྒྱུན་དུ་ཁོའི་གཤིས་ཀ་དེ་གང་འདྲ་རེད་འདུག་མིན་ཐད། ཁོ་རང་གི་ཕྱིའི་སྤྱོད་ཚུལ་དུ་མ་ལ་བརྟེན་ནས་བསམ་གཞིག་བྱེད་མཁན་ཞིག་ཡིན་ན་དེས་ཧ་གོ་འགྲོ་བ་ཡིན། དེ་ཤེས་ཙ་ན་ཁོ་ལ་སྤྱོད་ངན་དང་མ་རབས་ཟེར་དགོས་མིན་གཞི་ནས་ཤེས་ཡོང་། མདོར་ན་སྤྱི་ཚོགས་ནང་བསྡད་ནས་བཟུང་ཕན་ཚུན་བསམ་ཤེས་ལྡན་པས་ལྷིང་འཇགས་ངང་སྡོད་རྒྱུར་གལ་ཆེ་ཞིང་། རང་དང་འགྲོ་རོགས་འདུག་རོགས་རྣམས་ལ་བཟོད་སྒོམ་ཆེ་དགོས་ཤིང་། ཁོ་དང་ཁོའི་སྤྱོད་ངན་དག་ལ་ཐད་ཀར་ཚིག་གིས་མཛུབ་ཚུགས་མི་བྱ་བར། ཁ་འཇམ་ཚིག་འཇམ་གྱིས་ཕན་ཚུན་གྱི་རང་གཤིས་ལྷོད་ཐབས་ལ་འབད་ན། ཕན་ཚུན་སྤུན་མཆེད་དང་གྲོགས་པོའི་ལ་རྒྱ་ཆེ་རུ་འགྲོ་ཞིང་མི་འབྲལ་བའི་འདུ་ཤེས་ཟབ་མོ་འོང་བ་སོགས་དགེ་མཚན་བསམ་གྱིས་མི་ཁྱབ་བོ།།
ད་རིང་ངས་འདི་དག་གླེང་དོན་ནི། ང་རང་རྒྱུན་དུ་སྒོམ་ཉམས་ལེན་སོགས་བྱེད་མི་ཐུབ་ཀྱང་། སོ་སོའི་རང་གཤིས་ཐ་མལ་བ་དེར་ནམ་ཡང་དཔྱད་པ་བྱེད་མཁན་ཞིག་ཡིན་ལ། དེ་དང་ལྷན་གྲོགས་པོ་དང་ལས་རོགས། གཞན་དང་གཞན་ཕན་ཚུན་གྱི་ཕྱི་སྣང་ལུས་ངག་གི་སྤྱོད་ཚུལ་ལ་གཞིགས་ཏེ་བསམ་བློ་གཏོང་ཞིང་བླང་དོར་བྱེད་གང་ཐུབ་དང་། རང་གཤིས་རྒྱོང་པོ་འདི་ཐབས་གཞན་ལ་མ་ལྟོས་པར་རང་ངོས་ནས་ཞིབ་དཔྱད་ཀྱིས་ངོ་ཤེས་ཐབས་ལ་འབད་མཁན་ཞིག་ཡིན་པས་ཡིན།
རང་ཉིད་རྣལ་མའི་སེམས་སུ་མ་འབྱོར་ཡང་།།
དེ་འབྱོར་སླད་དུ་འབད་བརྩོན་བྱེད་པ་དང་།།
གཞན་ལའང་དེ་དོན་བསྐུལ་བཅག་ཐེབས་ཕྱིར་དུ།།
ཚིག་ལྷས་བསླས་འདིས་འགྲོ་ཕན་དགེ་ལེགས་ཤོག།
ཅེས་སྤྱི་ལོ་ ༢༠༢༡ ཟླ་བ་ ༣ ཚེས་ ༣ ཉིན་རང་གཤིས་ཀུན་འབྱེད་དྲན་པའི་མེ་ལོང་ལ་ལྟད་མོ་ལྟ་ཞིང་གློ་བུར་དུ་བསམ་བློ་གཞན་ཞིག་འཁོར་ཞོར་གོང་གི་ཡི་གེ་དེ་འབྲི་འདོད་ཀྱི་འདུན་པས་ཟིན་ཐོར་ཕབ་བོ།།
No comments:
Post a Comment