གླེང་གཞི།
ཉེ་ཆར་སྤྱི་ཟླ་འདིའི་ཚེས་ ༤ ཉིན་མོར་བལ་ཡུལ་གྱི་གསར་འགོད་པ་གྲགས་ཅན་བྷཱ་གྱ་ནེའུ་པཱ་ནེ་ལགས་ཀྱིས་རང་གི་གསར་འགྱུར་བརྙན་འཕྲིན་བརྒྱུད་ལམ་དུ་པྲེན་སཱ་རེག་མཱི་ཞེས་པའི་བུ་མོ་ལོ་བརྒྱད་ཅན་ཞིག་ངོ་སྤྲོད་དང་འབྲེལ་བཅར་འདྲི་བྱས་ཡོད་པ་ཞིག་ངོ་དེབ་ཐོག་ཁྱབ་བསྒྲགས་འགྲོ་བཞིན་འདུག རྒྱུ་མཚན་ནི་བུ་མོ་དེ་ད་ཆ་ཏོག་དབྱིབས་ནད་ཡམས་ཀྱི་གཉེན་འཕྲང་འདི་ལྟ་བུའི་དུས་སུའང་། རང་ཉིད་གཅིག་པུས་སྤྱི་ཚོགས་ཀྱི་ཞབས་ཞུ་སྒྲུབ་བཞིན་པས་རེད། དེ་ཡང་མོ་རང་གི་ཕ་མས་ལེགས་སྐྱེས་དོད་དུ་གནང་བའི་སྒོར་མོས་འགྲོ་གྲོན་བཏང་སྟེ། གཙོ་བོ་མོ་རང་རང་གིས་ཞབས་ཞུ་སྒྲུབ་བཞིན་པ་དང་། མོ་རང་གི་གཅེན་པོས་མོའི་ལས་འགུལ་རྣམས་བརྙན་ལེན་སྒྲིག་སྦྱོར་བྱས་ནས་ཡུ་ཊུབ་བརྒྱུད་ཁྱབ་སྤེལ་བྱེད་ཀྱི་ཡོད་པ་རེད། གསར་འགོད་པ་གྲགས་ཅན་བྷཱ་གྱ་ནེའུ་པཱ་ནེ་ལགས་ཀྱིས་ཁོང་མོར་བཅར་འདྲི་བྱེད་སྐབས་ཀྱི་མཐའ་མར། ཁོང་མོའི་བྱས་རྗེས་ལ་ཡི་རང་དང་ཞལ་འདེབས་མཚོན་བྱེད་བལ་སྒོར་སྔ་སྟོང་ཐམ་པ་འབུལ་ལམ་ཞུས་ཀྱང་། ཁོང་གིས་ʺང་རང་གི་ལས་འགན་དེ་ང་རང་རང་ནས་གཙང་དག་ཁུར་གྱི་ཡིན་ʺཟེར་ནས་དང་ལེན་གཏན་ནས་གནང་མེད་པ་རེད། དེ་ལྟར་རིམ་བཞིན་ཕྱིས་སུ་བལ་ཡུལ་ཁྱོན་ཡོངས་ལ་མོའི་སྐད་གྲགས་ཆོད་དུས། གསར་འགྱུར་བརྒྱུད་ལམ་ཁག་དུ་མར་མོ་ལ་བཅར་འདྲི་བྱེད་པ་སོགས་བྱུང་ཡོད། གཤམ་འདིར་ངོས་ནས་«ཁ་བར་བུལླེཊིན་ཊི་ཝི་»ཞེས་པའི་ཡུ་ཊུབ་བརྒྱུད་ལམ་ནང་ཁོང་མོས་གསུངས་པའི་གཏམ་བཤད་རྣམས་གོ་བདེ་པོའི་ཐོག་ནས་ཐད་བསྒྱུར་བྱས་ཡོད་པས། ལྷན་རྒྱས་སྤྱི་དང་ཁྱད་པར་གཞོན་སྐྱེས་ཚོར་དགའ་པོ་ཡོང་བ་དང་སེམས་ལ་ཚོར་སྣང་མི་འདྲ་བ་རེ་བྱིན་ཐུབ་པའི་རེ་བ་ཞུ།
བསྒྱུར་དངོས་གཞི།
དང་པོ། ཁོང་གི་ངོ་སྤྲོད་མདོར་བསྡུས་དང་འབྲེལ་སྤྱི་ཚོགས་ཞབས་ཞུ་སྒྲུབ་པའི་རྒྱུ་རྐྱེན་གླེང་བ།
དགུན་ཟླ་གྲང་མོའི་དུས་ཚོད་འདིར་རྣམ་པ་ཐམས་ཅད་ལ་ཕྲན་ནས་མཚམས་འདྲི་ཞུ། ངའི་མིང་ལ་པྲེན་སཱ་རེག་མཱི་ཟེར་གྱི་ཡོད་ལ། ད་ཆ་རང་ཉིད་ལོ་ངོ་བརྒྱད་ཅན་ཡིན་པས། སློབ་ཆུང་འཛིན་གྲྭ་གསུམ་པར་སློབ་སྦྱོང་བྱེད་བཞིན་པ་ཡིན། ཕྲན་གྱི་སློབ་གྲྭའི་མིང་ནི་ཤི་ཤུ་ནི་ཀེ་ཏན་དབྱིན་ཇི་སློབ་གྲྭ་ཡིན། ངའི་པ་ཕའི་མིང་ལ་རཱམ་ཀྲིཥྣ་རེག་མཱི་དང་།
ཨ་མའི་མིང་ལ་ཇ་ཡནྟཱི་སཱཔ་ཀོ་ཊཱ་དང་། གཅེན་པོའི་མིང་ལ་པྲ་ཀཱཤ་(?གསལ་པོ་མ་ཐོས།)རེག་མཱི་ཟེར།
སློབ་གྲྭའི་མི་ཚེ་ཟེར་བ་དེ་ག་འདྲ་ཡིན་མིན་སྐོར་ཁྱེད་རྣམ་པས་ཕལ་ཆེར་མཁྱེན་ངེས་རེད། རྒྱུན་ལྡན་ལྟར་ན་ང་ཚོ་སློབ་ཕྲུག་རྣམས་སློབ་གྲྭར་འགྲོ་ཞིང་། དུས་ཚོད་མང་ཆེ་བ་སློབ་གྲྭ་རང་དུ་གཏོང་གི་ཡོད་ལ། སློབ་སྦྱོང་རང་ལ་དུས་ཚོད་འཁྱོལ་འགྲོ་གི་ཡོད་པ་རེད། འོན་ཀྱང་འདི་ལོ་ཏོག་དབྱིབས་གཉན་རིམས་ཁྱབ་པ་དང་། དེ་བཞིན་འགྲོ་འོག་བཀག་སྡོམ་དང་ཁྱིམ་སྡོད་བཀག་རྒྱ་སོགས་བྱུང་བ་རེད། རྐྱེན་དེ་ཡིས་ཟླ་བ་གཅིག་གཉིས་རིང་དྲྭ་ཐོག་འཛིན་གྲྭ་ཡང་མེད་པར་ང་ཚོ་ལྷག་པ་རེད། དེའི་རྗེས་སུ་བལ་ཡུལ་གྱི་ལོ་གསར་འགོ་ཚུགས་པ་དང་། ངའི་ཕ་མས་ང་ལ་ལོ་གསར་གྱི་བརྔན་པ་གནང་སོང་ལ། བརྔན་པ་དེ་ངས་ཉར་ཚགས་བྱས་ནས་ཡུན་རིང་མ་འགོར་བར་ཁ་ཕྱེ་དུས་བལ་སྒོར་ ༡༥་༠༠༠ ཐམ་པ་ཏག་ཏག་འདུག
གཉིས་པ། ཁོང་གིས་སྤྱི་ཚོགས་ཞབས་ཞུའི་ལས་འགུལ་སྣ་ག་མི་འདྲ་བ་བདུན་སྤེལ་བའི་སྐོར།
༡༽
ཏག་ཏག་སྔོན་མ་ངས་ང་རང་གི་ཕ་མར་ནད་ཡམས་ཀྱི་དུས་ཚོད་འདིར་ཁ་རས་འགྲེམ་རྒྱུའི་རེ་བ་བརྒྱབ་པ་ཡིན། གང་ཡིན་ཟེར་ན། ཏོག་དབྱིབས་ནད་ཡམས་སླེབས་ཚར་བ་རེད་ལ། སོ་སོ་གཅིག་པུ་ནད་ཡམས་འདི་ལས་ཐར་བས་མི་འགྲིག་པར། གཞན་ལ་ཡང་ཐར་ཐབས་བྱེད་དགོས་བསམ་པའི་ལས་འགུལ་སྤེལ་འདོད་ཅིག་ཡོད། གང་ཡིན་ཟེར་ན། གལ་སྲིད་མི་ཞིག་གིས་ཁ་རས་མེད་པའི་ཐོག་ནས་ཚོང་ཁང་ཞིག་ཏུ་ཕྱིན་ཏེ། དེ་ནས་ཅ་ལག་ཉོས་ཏེ་ཕྱིར་ལོག་འགྲོ་བ་དང་། ང་ཚོས་ཀྱང་ཚོང་ཁང་དེ་རང་དུ་ཕྱིན་ནས་ཅ་ལག་ཉོ་བ་ལ་སོགས་པ་བྱས་ན། ང་ཚོ་ལ་ཡང་ནད་ཡམས་དེ་ཕལ་ཆེར་འགོས་སྲིད་པ་རེད་བསམ་པའི་ཐོག་ནས། ʺརང་ཉིད་ཀྱང་ཐར་བ་དང་། གཞན་ལ་ཡང་སྐྱོབ་ཀྱི་ཡིན་ʺབསམ་པའི་གུས་མོས་ལས་འགན་ཞིག་ཕྲག་ཏུ་ཁུར་ཡིན། དེར་བརྟེན་ངས་དུས་དེ་ནས་ག་ས་གང་དུ་ཁ་རས་སྐྱེལ་འགྲེམས་བྱས་པ་ཡིན།
༢༽
རིམ་པ་བཞིན་མི་རྣམས་ནི་ནད་ཡམས་ལས་ཀྱང་ཞེད་སྣང་ཚ་བ་ཁ་ཟས་མ་རག་པའི་རྐྱེན་གྱིས་ཕྱི་ལོག་ཏུ་འཁྱམས་མྱུལ་བྱེད་པ་ཤུགས་ཆེ་རུ་འགྲོ་གི་འདུག དེ་འདྲ་ཆགས་ཡོང་དུས་ང་རང་ཨར་མ་གཏད་ནས། ངས་འབྲས་དང་དཱ་ལི། སྣུམ། ཚྭ་བཅས་ཉོས་ནས་སྐྱེལ་འགྲེམས་བྱས་པ་ཡིན། ང་རང་སོ་སོའི་ཁང་པའི་ནང་བཟའ་རྒྱུ་འཐུང་རྒྱུ་རག་གི་ཡོད་ལ། བཟའ་ཆས་ཐོབ་ཆའི་ལག་དེབ་ཀྱང་ཡོད། འོན་ཀྱང་ཁྱིམ་ཚང་གཞན་རྣམས་ལ་ལག་དེབ་དེ་མེད་དྲོ་བསམ་ནས། ངས་ཟས་རིགས་དེ་དག་སྐྱེལ་འགྲེམས་བྱས་པ་ཡིན།
༣༽
དེ་བཞིན་ང་རང་པོཁ་རཱའི་ནང་དེབ་ཆས་ཚོང་ཁང་ཞིག་གཉེར་ནས། ཚོང་ཁང་དེར་ང་རང་གཅིག་པུ་ཚོང་རྒྱག་གིན་བསྡད་པ་ཡིན། དེ་དུས་སྐབས་ཤིག་ལ་ང་རང་དང་ལོ་ཚད་མཉམ་པའི་གྲོགས་པོ་གཉིས་ངའི་ཚོང་ཁང་དུ་སླེབས་སོང་ལ། ཁོ་ཚོས་འབྲི་དེབ་སློང་སོང་། ངས་ཁོང་ཚོར་སྒོར་མོ་ལྔ་བཅུ་དྲུག་ཅུའི་གོང་ཚད་ཅན་གྱི་འབྲི་དེབ་རྣམས་བསྟན་པས།
ཁོང་ཚོས་གོང་ཚད་ཆེ་དྲགས་འདུག་ཟེར། དེའི་རྗེས་སུམ་ཅུ་བཞི་བཅུ་བྱས་པ་བསྟན་དུས་ཀྱང་གོང་ཆེ་དྲགས་འདུག་ཟེར་བ་དང་། དེ་ལྟར་རིམ་བཞིན་ཁོ་ཚོའི་འདོད་པ་ལྟར་ཆག་ཡངས་བཏང་སྟེ་མཐར་སྒོར་ཉི་ཤུ་ལེན་རྒྱུ་བྱས་ཀྱང་། ད་དུང་གོང་ཚད་ཆེ་དྲགས་འདུག་ཟེར་གྱི་འདུག
ཡིན་ན་ཡང་འདི་བ་ལ་མ་མཐར་སྒོར་མོ་ཉི་ཤུ་ཅན་གྱི་དེབ་འདྲ་རག་གི་རེད་མ་གཏོགས། བཅུ་བཅོ་ལྔ་ཅན་གྱི་དེབ་ནི་རག་ཐབས་ཁོ་རང་ཡོད་མ་རེད། འོན་ཀྱང་ཁོང་ཚོར་གོང་ཚད་དེ་ཙམ་ཡང་ཆེ་དྲགས་ཡོང་དུས། ངས་ཁོང་ཚོར་ʺཁྱེད་ཚོའི་ཕ་མ་ག་རེ་བྱེད་བཞིན་བཞུགས་ཡོད་རེད།ʺ
ཟེར་ནས་དྲི་བ་དྲིས་པས། ཁོང་ཚོས་ʺང་ཚོར་ཕ་མ་ཁོ་རང་མེད།ʺ
ཟེར་ནས་གསུངས་སོང་། དེ་འདྲ་ཡིན་དུས། ང་ལ་ནི་ཕ་མ་ཡང་ཡོད་ཅིང་། ངའི་ཡོད་ཚད་ང་རང་གི་ཕ་མས་གནང་བ་ཡིན་པ་དང་། ང་རང་གི་འདོད་པ་ཐམས་ཅད་སོ་སོའི་ཕ་མས་སྒྲུབ་བཞིན་པ་རེད། ཡིན་ནའང་ཁོང་རྣམ་པ་ལྟ་བུའི་ཕ་མ་ཁོ་རང་མེད་པའི་བུ་ཕྲུག་རྣམས་ཀྱི་གནས་སྟངས་ག་འདྲ་ཡོད་ན། ཁོང་རྣམ་པའི་འདོད་པ་ཅུང་ཙམ་རེ་སྒྲུབ་ཐུབ་ན་ག་འདྲ་ཡོད་ན། མ་མཐའ་ལ་ཡང་ཁོང་ཚོར་སློབ་སྦྱོང་སྦྱོང་རྒྱུའི་གོ་སྐབས་རག་རོགས་བྱས་ན་བསམས་ནས། ངས་འབྲི་དེབ་དང་སྙུག་གུ་རྣམས་འགྲེམས་སྤེལ་བྱས་པ་ཡིན། ʺང་རང་གཅིག་པུ་ཤེས་ཡོན་པ་ཆགས་ན་མི་འགྲིག་པས། གཞན་ཡང་ཤེས་ཡོན་པ་ཆགས་ན་བསམས་ʺནས་ཀྱང་ངས་དེ་ལྟར་བྱས་པ་ཡིན།
༤༽
དེའི་རྗེས་རིམ་བཞིན་བལ་ཡུལ་གྱི་ལོ་གསར་ཚེས་སོང་། ངའི་མི་ཚེའི་ནང་ལོ་བདུན་གྱི་བར་དུ་ལོ་གསར་སྐབས་གྱོན་ཆས་གསར་པ་རེ་གོན་ཡོད་ཀྱང་། འདི་ལོའི་ལོ་སར་སྐབས་ངས་ང་རང་གི་ཆེད་དུ་དུག་ལོག་གསར་པ་མ་ཉོས་པར།
ང་རང་དང་ན་ཚོད་མཉམ་པའི་སོ་སོའི་གྲོགས་པོ་དང་། ཕུ་བོ་ཕུ་མོ། ནུ་བོ་ནུ་མོ། ཨ་ནེ་ཨ་ཞང་བཅས་ལ་དུག་ལོག་གསར་པ་ཉོས་ནས་བགོ་འགྲེམས་བྱས་པ་ཡིན། ང་རང་ལ་ནི་དུས་རྒྱུན་དུ་དུག་ལོག་བརྗེ་གིན་བརྗེ་གིན་གྱོན་རྒྱུ་རག་གི་ཡོད། ཡིན་ནའང་གཞན་རྣམས་ཀྱིས་དུས་ཡུན་ག་ཚོད་བར་དུ་དུག་ལོག་རྙིང་པ་རལ་ཚར་བའི་རིགས་དྲས་བྲུབས་བྱས་ནས་གོན་ཡོད་ན། དེ་དུས་གནམ་གཤིས་གྲང་མོ་འདི་སླེབས་བཞིན་པ་རེད་ལ། ད་ལྟ་ནི་སླེབས་ཚར་བ་རེད། ཁོང་ཚོའི་ཁྱིམ་ཚང་དུ་ག་ཚོད་གྲང་མོ་ཡོད་ན། ཁོང་ཚོ་ལ་ཡང་ལོ་གསར་ཡོད་ན་ཡག་ག་ལ། རང་ཉིད་ཀྱི་དམངས་མི་སེར་རྣམས་ངུ་བཞིན་བསྡད་དུས། སོ་སོ་གཅིག་པུ་གད་མོ་བགད་བསྡད་ན་མི་འགྲིག་པས། ʺརང་ཡང་བགད་མོ་བགད་བཞིན། གཞན་ལ་ཡང་བགད་མོ་བགད་བཅུག་ན་བསམས་ʺནས། ངས་གྱོན་ཆས་ཀྱི་མཛོད་ཁང་ཞིག་སྒོ་ཕྱེས་པ་དང་ཕར་ཚུར་འགྲེམས་སྤེལ་བྱས་པ་ཡིན།
༥༽
དེའི་རྗེས་སུ་ཡང་ངས་ལོ་ངོ་བཅུ་དྲུག་མ་ཟིན་གོང་གི་ང་རང་འདྲ་བའི་ཕྲུ་གུ་ཆུང་ཆུང་ཚོ་ལ་ཐ་མག་དང་ཉལ་ཐ་སོགས་རྗས་ངན་རིགས་མ་ཚོང་རོགས་ཟེར་ཡས་ཀྱི་ལས་འགུལ་ཞིག་སྤེལ་འཆར་བྱས་པ་ཡིན།
གང་ཡིན་ཟེར་ན། ཕྲུ་གུ་ཆུང་ཆུང་གི་དུས་སྐབས་ནས་ང་ཚོས་ཁོང་ཚོར་ཐ་མག་སོགས་བཙོངས་པ་ཡིན་ན།
དེ་ནི་ནག་ཉེས་བསགས་པ་དང་ཁྲིམས་འགལ་རང་རེད་པ་ལགས།
ངས་རྨོ་རྨོ་ཐ་མག་འཐེན་མཁན་ཞིག་ལ།
ཁྱེད་རང་གིས་ཐ་མག་འཐེན་རྒྱུ་ག་བ་ནས་སྦྱངས་ཡིན་ཞེས་ཞུ་དུས།
ʺངའི་པ་ཕས་ཐ་མག་འཐེན་གྱི་ཡོད་རེད་ལ། ང་ལ་ཡང་ཉོས་ནས་སྤྲད་མྱོང་། མཚམས་རེ་ང་ལ་ཐ་མག་ཉོ་རུ་བཅུག་པ་དང་སྤར་བཅུག་གི་ཡོད།
ངས་ཐ་མག་མེ་ལ་སྤར་དུས་མ་འབར་བས། ང་རང་རང་གིས་ཐ་མག་འཐེན་ནས་སྤར་མྱོང་། དེ་འདྲ་བྱེད་དུས་ངས་ལོ་ངོ་དགུ་ནས་ཐ་མག་འཐེན་རྒྱུར་སྦྱངས་མ་ཆགས་སོང་།ʺ ཞེས་གསུངས་སོང་། བྱས་ཙང་ང་ཚོའི་ཕ་མས་གང་བཞེས་པ་དང་མཆོད་པ་དེ་ཏན་ཏན་རང་ཞིམ་པོ་ཡོད་རེད་བསམས་ནས།
ང་ཚོས་ཀྱང་དགའ་བཞིན་སྤྲོ་བཞིན་དེ་དག་བེད་སྤྱད་ནས་ངན་ལོབས་ཤོར་སྲིད་པ་རེད། དེ་འདྲའི་རིགས་ང་ཚོས་ཆུང་དུས་ནས་སྦྱངས་མ་ཆགས་ཀྱིན་འགྲོ་ན།
ཕྱིས་སུ་ང་ཚོས་དེ་དག་སྤོང་ཐུབ་རྒྱུར་ཁག་པོ་ཆགས་ཀྱི་རེད་ལ།
གལ་སྲིད་ཆུང་དུས་ནས་དེ་འདྲ་ལ་ངན་ལོབས་སུ་མ་ཤོར་ན།
ང་ཚོ་ཆེན་པོ་ཆགས་དུས་དེ་དག་བེད་སྤྱད་རྒྱུར་སྤྲོ་སྣང་ཡོང་གི་མ་རེད།
བྱས་ཙང་ཡག་སྡུག་ག་རེའི་སྐོར་ཡིན་ནའང་ང་ཚོས་ཆུང་དུས་ནས་སྦྱོང་བཞིན་འགྲོ་དགོས་ཀྱི་ཡོད།
ཡག་ག་གང་དང་སྡུག་ག་གང་ཡིན་པའི་སྐོར་ང་ཚོས་ཆུང་དུས་ནས་མ་སྦྱངས་ན།
ཕྱིས་སུ་རིམ་བཞིན་ང་ཚོ་སྐྱག་ལང་ཤོར་སྲིད་པ་རེད།
༦༽
ཡང་དེའི་རྗེས་སུ་ངས་ཁོར་ཡུག་སྲུང་སྐྱོབ་ཆེད་ག་ས་གང་དུ་གད་སྙིགས་བླུག་སའི་སླེལ་པོ་རེ་བཞག་རྒྱུ་བྱས་པ་ཡིན།
པོཁ་རཱ་དང་རུ་ཀུམ་སོགས་ས་ཆ་མང་པོར་ʺང་ཚོས་ཁོར་ཡུག་གཙང་ཉར་བྱེད་དགོས་རེད་ʺཟེར་བའི་ཡི་གེ་རེ་སྦྱར་ནས་བཞག་ཡོད་རེད།
འོན་ཀྱང་ཡི་གེ་སྦྱར་བ་ཙམ་གྱིས་ཕན་གྱི་མ་རེད་པ།
བཙོག་པ་ནི་ཆགས་བསྡད་ཀྱི་རེད། ཡི་གེ་སྦྱར་བ་དེ་ནི་མང་ཆེ་བས་མཐོང་གི་མ་རེད།
དེ་བཞིན་བཙོག་པའི་རིགས་གཡུག་ནི་གཡུག་དགོས་ཀྱང་།
བཙོག་པ་བླུག་ས་ཁོ་རང་མེད་ཡོང་དུས།
ག་བ་གཡུག་དགོས་རེད་དམ། ལམ་ཀ་རང་ལ་མ་གཡུག་ཀ་མེད་རེད། གད་སྙིགས་དེ་རིགས་རང་ཉིད་ཀྱི་ཨམ་ཕྲག་ལ་ནི་བླུག་ལོག་གི་མ་རེད་པ་ལགས།
དེ་འདྲ་ཡིན་དུས་ངས་ལམ་ཟུར་རེ་རེ་ལ་སླེལ་པོ་རེ་བཞག་པ་ཡིན་ལ།
བཞག་པ་ནང་བཞིན་རིམ་པས་གད་སྙིགས་བླུག་མཁན་ཡང་བྱུང་སོང་།
ཡིན་ན་ཡང་སླེལ་པོ་ཚང་མར་གད་སྙིགས་གང་ནས་ས་ལ་བོ་ཡོང་དུས།
ཡང་བསྐྱར་ཛོར་བོ་ཆགས་སོང་བས། དེའི་ཆེད་ངས་ང་ཚོའི་ཡུལ་སྡེའི་འགོ་ཁྲིད་ལ་རེ་བ་ཞུས་ནས།
གད་སྙིགས་འདི་ཚོ་གཡུག་ས་ཞིག་ལ་གཡུག་རོགས་གནང་ཞེས་ཞུས་པ་ཡིན།
ཞུས་པ་ནང་བཞིན་ཁོང་རྣམ་པས་རོགས་སྐྱོར་གནང་སོང་ལ།
དེའི་རྗེས་རིམ་བཞིན་ཁོར་ཡུག་དེར་གཙང་མ་ཆགས་ཀྱིན་འགྲོ་སོང་།
༧༽
དེའི་རྗེས་ལ་མཐའ་མར་ངས་དེབ་ཀྱི་མཛོད་ཁང་ཞིག་གཉེར་བ་ཡིན།
དེབ་ཀྱི་མཛོད་ཁང་དེར་སློབ་དེབ་རིགས་བཞག་ནས་གཞན་ལ་བགོ་འགྲེམས་བྱེད་རྒྱུ་རེད།
འོ་ན་ངས་གང་འདྲ་བྱས་ནས་སློབ་དེབ་རིགས་བགོ་འགྲེམས་བྱས་ཡོད་ཟེར་ན།
ང་རང་རང་གིས་སྦྱངས་དང་སྦྱོང་བཞིན་པའི་སློབ་དེབ་རིགས་ལ་རིན་གོང་ལྔ་སྟོང་དྲུག་སྟོང་ཙམ་ཡང་འགྲོ་གི་ཡོད་མ་རེད་ལ།
གཞན་གྱི་སློབ་དེབ་རིགས་ཁྱེར་རྗེས་མཛོད་ཁང་དེ་རུ་བཞག་ཐུབ་ཀྱི་ཡང་མ་རེད།
དེའི་རྒྱུ་མཚན་གྱིས། ང་རང་ད་ལྟ་འཛིན་གྲྭ་གསུམ་པར་ཡོད་ལ། ང་ལ་འཛིན་གྲྭ་དང་པོ་དང་གཉིས་པའི་སློབ་དེབ་དག་ཀྱང་ཡོད་པས།
དེ་དག་ནི་གནས་སྐབས་ང་ལ་བེད་སྤྱོད་མེད་པ་ཆགས་པ་རེད་དེ།
འོན་ཀྱང་གཞན་དག་གི་ཆེད་དུ་དགོས་མཁོ་ཅན་ཆགས་ཀྱི་རེད་པ་ལགས།
སློབ་དེབ་ནི་ནམ་ཡང་རྙིང་པ་ཆགས་ཀྱི་མ་རེད་ལ།
དེ་བཞིན་ཤེས་ཡོན་ཡང་རྩ་བ་ནས་རྙིང་པ་ཆགས་ཀྱི་མ་རེད།
དེས་ན་གཞན་ལ་ཡང་ཤེས་ཡོན་སྦྱང་རྒྱུའི་གོ་སྐབས་རག་ཐུབ་ན་བསམ་པ་དང་།
མི་གཞན་གྱི་ཁྱིམ་ཚང་ན་སློབ་སྦྱོང་སྦྱང་རྒྱུའི་གོ་སྐབས་མ་རག་ནས་ག་ཚོད་ཀྱི་དཀའ་ངལ་ཡོད་ན་བསམ་པའི་ཐོག
དེ་ཚོ་ལ་ངས་དེབ་ཁང་ཞིག་སྒོ་ཕྱེས་པ་དང་།
དེའི་ཆེད་དུ་ཕན་ཚུན་ནས་རོགས་སྐྱོར་གནང་མཁན་ཡང་མང་པོ་བྱུང་སོང་བས།
ལས་ཀ་དེ་གོ་སྒྲིག་ཡག་པོ་བྱེད་ཐུབ་པ་བྱུང་སོང་།
གསུམ་པ།
མཐར་ཁོང་གི་རེ་བསྐུལ་ཚིག་གཅིག་དང་དཔེ་གསུམ།
༡༽
ད་ནི་ང་ལ་སྒྲུང་ཞིག་བཤད་ཡ་ཡོད། དེ་ཡང་གལ་སྲིད་ཁྱེད་རང་གིས་སོ་སོར་ʺང་དབུལ་པོ་ཞེད་པོ་ཞིག་ཡིན།
ང་ལ་ཅི་གང་མེད།ʺ ཅེས་དྲན་གྱི་འདུག་ན། སྒྲུང་འདིས་ཁྱེད་རང་ལ་སྐར་མ་གཅིག་གི་ནང་ཕྱུག་པོ་བཟོ་གི་རེད།
དེ་ཡང་གྲོང་གསེབ་ཞིག་གི་ནང་དུ་མི་དཔེ་མ་སྲིད་པའི་དབུལ་པོ་ཞིག་སྡོད་ཀྱི་ཡོད་པ་དང་།
ཁོ་རང་ལ་གཉེན་ཚན་ཉེ་འཁོར་སུ་ཡང་མེད་པས།
ཁེར་རྐྱང་ཉམས་ཐག་ཅན་ཞིག་ཆགས་བསྡད་ཡོད་པ་རེད།
ཉིན་ཞིག་ཁོས་བློ་ཁོག་ཆེན་པོའི་ངང་སངས་རྒྱས་གཽ་ཏ་མའི་དྲུང་དུ་ཕྱིན་ནས།
ʺསངས་རྒྱས་ལགས། ང་དབུལ་པོ་གང་འདྲ་བྱས་ནས་ཆགས་པ་རེད་དམ།ʺ ཟེར་ནས་ཁ་ཐུག་བཀའ་འདྲི་ཞིག་ཞུས་པ་རེད། དེའི་ལན་དུ་སངས་རྒྱས་ཀྱིས་ག་རེ་གསུངས་པ་རེད་དམ་ཟེར་ན།
ʺཁྱེད་རང་གིས་ད་ལྟ་བར་དུ་མི་གཞན་དག་སུ་ལ་ཡང་རོགས་སྐྱོར་ཁོ་རང་བྱས་མི་འདུག་ལ།
སྦྱིན་པ་ཡང་རྩ་ནས་བཏང་མི་འདུག་ག བྱས་ཙང་ཁྱེད་རང་གང་འདྲ་བྱས་ནས་ཕྱུག་པོ་ཆགས་ཀྱི་རེད།ʺ ཞེས་གསུང་དུས། མི་དེ་ཚ་ག་ཚི་གེའི་ངང་འདི་ལྟར་ལན་ཞུས་པ་རེད།
ʺང་ལ་ཅི་གང་མེད། མཐའ་ན་ཁང་པ་ཡང་མེད་ལ་རྒྱུ་ནོར་ཡང་མེད། ཉིན་རེ་ཉིན་རེའི་ལྟོ་ཆས་རྣམས་ཀྱང་ངས་དཀའ་ལས་ཚད་མེད་ནས་ཚད་མེད་རྒྱབ་ནས་ཟ་གི་ཡོད་པས།
ང་རང་ལ་མེད་པ་ཞིག་ངས་གང་འདྲ་བྱས་ནས་སྦྱིན་པ་གཏོང་ཐུབ་བམ།
ངས་རོགས་སྐྱོར་ཁོ་རང་བྱེད་ཐུབ་ཐབས་ཡོད་མ་རེད།
གང་ཡིན་ཟེར་ན། དཀོན་མཆོག་གིས་ང་ལ་ཅི་གང་གནང་ཡོད་མ་རེད།
ངས་གང་འདྲ་བྱས་ནས་གཞན་ལ་རོགས་སྐྱོར་བྱེད་ཐུབ་བམ།
ང་རང་རང་ལ་མ་འདང་ཡོད་དུས། ངས་གཞན་ལ་གང་འདྲ་བྱེད་ནས་འདང་བ་བྱེད་ཐུབ།ʺ ཟེར་ནས་སེམས་འཚབ་ངང་ཞུ་དུས། སངས་རྒྱས་གཽ་ཏ་མས་རྒྱུན་ལྡན་རང་ཉིད་ཀྱི་གསུང་སྐད་ཆུང་ངུའི་སྒོ་ནས་ལན་འདི་ལྟར་བཏབ་པ་རེད།
ʺཁྱེད་རང་ལ་ཁ་ཡོད་རེད་ལ། ཁྱེད་རང་གི་ཁ་ཡིས་གཞན་ལ་འཛུམ་མདངས་སྟོན་ཐུབ་པ་རེད།
དེ་བཞིན་ཁྱེད་རང་ལ་ལྕེ་ལེ་ཡོད་རེད་ལ།
ཁྱེད་རང་གི་ལྕེ་ལེས་གཞན་ལ་སྟོད་བསྔགས་བྱེད་ཐུབ་པ་རེད།
དེ་བཞིན་ཁྱེད་རང་ལ་ལག་པ་ཡོད་རེད་ལ།
ཁྱེད་རང་གི་ལག་པས་གཞན་ལ་གང་མཁོ་བའི་སྐབས་རོགས་སྐྱོར་བྱེད་ཐུབ་པ་རེད།ʺ ཅེས་གསུངས་པ་རེད།
༢༽
དེ་བཞིན་ཁྱེད་རང་ཕྱུག་པོ་ཆགས་ཐབས་སྐོར་དཔེ་གཞན་ཞིག་ཀྱང་འགོད་རྒྱུ་ཡོད།
དཔེར་ན་ཁྱེད་རང་ལས་གནས་ཤིག་ཏུ་ལས་ཀ་བྱེད་བཞིན་ཡོད་པ་རེད།
དེ་དུས་ཁྱེད་རང་གིས་སོ་སོའི་ལས་གནས་འཛིན་སྐྱོང་བ་དེར་སྟོད་བསྔགས་རེ་བརྗོད་དང་།
ཁྱེད་རང་གི་གླ་ཕོགས་མཐོ་རུ་གཏོང་གི་རེད།
གལ་སྲིད་ཁྱེད་རང་གིས་འཛིན་སྐྱོང་བ་དེར་སྤྲོ་ལང་གིན་རྣམ་འགྱུར་སྡུག་ཅག་བསྟན་ན།
ཁྱེད་རང་གི་གླ་ཕོགས་སྤྲད་རྒྱུ་ཕར་ཞོག
ལས་གནས་ནས་སྤུད་བཞག་གི་རེད། དེ་འདྲ་བྱེད་དུས་ཁྱེད་རང་དབུལ་པོ་ཆགས་རྒྱུ་རེད།
སངས་རྒྱས་གཽ་ཏ་མས་ག་རེ་གསུངས་ཡོད་རེད་ཟེར་ན།
རྒྱུ་ནོར་ལ་བརྟེན་ནས་ཁྱེད་རང་ཕྱུག་པོ་ནམ་ཡང་ཆགས་ཐབས་ཡོད་མ་རེད།
ཁྱེད་རང་གི་སེམས་དེ་ཕྱུག་པོ་ཡོད་ན།
དེ་ཡིས་ཁྱེད་རང་ལ་འདང་འགྲོ་གི་རེད།
མ་གཏོགས་རྒྱུ་ནོར་གྱིས་ཁྱེད་རང་ལ་ནམ་ཡང་འདང་གི་མ་རེད།
ཉི་མ་གཉིས་གསུམ་མ་གཏོགས་འཚོ་རྒྱུ་མེད་བཞིན་དུ་བསགས་པའི་རྒྱུ་ནོར་དེ་ཤི་འགྲོ་དུས་ཁྱེར་ཐབས་ནི་ཡོད་མ་རེད་པ།
ཁྱེད་རང་གིས་ག་ཚོད་རྒྱུ་ནོར་བསགས་ཡོད་ན་ཡང་།
ཤི་དུས་ཁྱེར་འགྲོ་རྒྱུ་ཅི་གང་མེད་རེད།
ལྷ་ཡུལ་སོགས་གང་དུ་འགྲོ་ནའང་དམར་ཧྲང་ངང་འགྲོ་རྒྱུ་རེད།
ཁྱེད་རང་གིས་ད་ལྟ་དངུལ་དང་དངུལ་ཟེར་ནས།
དེའི་རྗེས་སུ་རྒྱུགས་ཏེ་དུས་ཚོད་འཕྲོ་བརླག་བཏང་བསྡད་ན།
དངུལ་འགྲོ་སོང་གཏོང་རྒྱུའི་དུས་ཚོད་ཁོ་རང་མ་རྙེད་དུས།
དངུལ་བསགས་པས་ཁེ་ཕན་ཅི་ཡོད། དེའི་རྒྱུ་མཚན་གྱིས་ཁྱེད་རང་སོ་སོའི་སེམས་ཕྱུག་པོ་བཟོ་བ་ལས།
དངུལ་དང་རྒྱུ་ནོར་ཕྱུག་པོ་མ་བཟོ་རོགས།
སེམས་ལ་ནམ་ཡང་ཕྱུག་པོ་བཟོས་ནས་ཉར་དགོས་རེད།
༣༽
དེ་ག་ནང་བཞིན་གལ་སྲིད་མི་གཞན་ཞིག་ལམ་ཀར་བརྡབ་སྐྱོན་བྱུང་བ་དང་།
དེ་ཁྱེད་རང་གིས་སྨན་ཁང་དུ་ཁྱེར་ཐུབ་ན།
དེ་ཡང་སེམས་ཀྱི་ཕྱུག་པོ་ཆགས་བསྡད་ཡོད་རེད་པ།
གལ་སྲིད་ཁྱེད་རང་ནད་ན་ཚ་མེད་མཁན་ཞིག་ཡིན་ན།
ཁྱེད་རང་གིས་གཞན་ལ་ཁྲག་སྦྱིན་པ་ཡང་གཏོང་ཐུབ་པ་རེད།
དེ་ཡིས་ཀྱང་ཁྱེད་རང་གི་སེམས་ཕྱུག་པོ་ཆགས་པ་རེད།
བྱས་ཙང་སེམས་ཀྱི་ཕྱུག་པོ་དེ་ཆགས་ན།
སྐད་ཆ་ག་རེ་ཡིན་ནའང་ལེགས་གྲུབ་ཆགས་ཀྱི་རེད།
ང་ཚོས་འཇིག་རྟེན་འདིར་གཞན་ལ་ཕན་པའི་བྱ་བ་གལ་ཆེན་རིགས་སྣ་ཚོགས་བསྒྲུབས་ནས།
གལ་སྲིད་ང་ཚོ་ཤི་ནས་འགྲོ་ན། མི་མང་པོས་ང་ཚོར་དུས་ནས་དུས་སུ་རྗེས་དྲན་བྱེད་ཀྱི་རེད།
དེ་བཞིན་ང་ཚོ་སོ་སོ་ཡང་དེ་འདྲ་ཆགས་རོགས་བྱས་ན་དྲན་མཁན་མང་པོ་ཡོད་པ་རེད་ལ།
དེའི་དབང་གིས་སྤྱི་ཚོགས་ཀྱང་འགྱུར་བ་ཤུགས་ཆེ་རུ་འགྲོ་གི་ཡོད།
གལ་སྲིད་ང་ཚོ་རང་གིས་སོ་སོའི་སྤྱི་ཚོགས་སུ་ཚར་རྒྱུ་མེད་པའི་རང་གི་འདོད་བརྔམ་དེ་མུ་མཐུད་བསྟན་བསྡད་པ་དང་།
སོ་སོའི་བུ་ཕྲུག་དག་གིས་ཀྱང་དེ་རང་ལ་རིམ་བཞིན་ངན་ལོབས་སུ་ཤོར་འགྲོ་ན།
ང་ཚོ་སོ་སོའི་སྤྱི་ཚོགས་དེ་རང་བཞིན་གྱིས་སྡུག་ཅག་ཆགས་འགྲོ་གི་རེད།
གལ་སྲིད་ང་ཚོས་སྤྱོད་པ་བཟང་པོ་རྐྱང་རྐྱང་བྱས་བསྡད་ན།
གཞན་གྱིས་ཀྱང་དེ་རང་ལ་སློབ་འགྲོ་གི་རེད་ལ།
ང་ཚོའི་སྤྱི་ཚོགས་རང་བཞིན་གྱིས་ཡག་པོ་ཆགས་འགྲོ་བ་རེད།
དེའི་རྐྱེན་གྱིས་ནམ་ཡང་རང་གི་སེམས་དེ་ཕྱུག་པོ་བཟོ་ནས་ཉར་རོགས།
རྒྱུ་ནོར་ཕྱུག་པོས་ནམ་ཡང་ང་ཚོར་འདང་བའི་ངེས་པ་མེད།
བསྒྱུར་བ་པོའི་མཐའ་མའི་སྐད་ཆ།
ལགས་སོ།
ལྷན་རྒྱས་མཉེས་པོ་བྱུང་སོང་ངམ། ཏན་ཏན་མཉེས་པོ་བྱུང་ཡོད་རྒྱུ་ཉག་ཅིག་རེད།
ངས་སྐད་ཆ་དེ་དག་ཁོང་གིས་གསུངས་པ་ནང་བཞིན་ཚིག་རེ་ཟུང་གཉིས་ཟུང་ལས་མ་ཆད་མ་ལྷག་མེད་པར་ཤར་མར་ཐད་བསྒྱུར་བྱས་པ་ཡིན།
ཁོང་མོས་གསུངས་པའི་གཏམ་བཤད་དེ་དག་རེ་རེ་ལ་ག་ཚོད་ཀྱི་རིན་ཐང་མི་འདུག་གམ་ལགས།
ཁྱེད་རང་གིས་བྱས་ན་ལོ་ཆུང་བྱིས་པ་དེ་འདྲ་ཞིག་གིས་ཀྱང་སྤྱི་ཚོགས་ཞབས་ཞུའི་ལས་འགན་བསྒྲུབས་པ་དེ་དངོས་གནས་ཧ་ལས་ཤིང་ཧོན་འཐོར་རྒྱུའི་གནས་ཚུལ་ཞིག་མ་རེད་དམ།
མདོར་ན་ད་རེས་ཁོང་མོའི་གསུང་སྐད་གནང་སྟངས་ཀྱི་ངག་རྩལ་དང་།
འགན་ཁུར་རང་བཞིན་གྱི་བསམ་བློ་གཏོང་སྟངས།
སྤྱི་ཚོགས་ཞབས་ཞུའི་ལས་དོན་སྒྲུབ་སྟངས་སོགས་གང་ཅིའི་ཐད་ངོ་མཚར་ལྡན་པ་རྐྱང་རྐྱང་ཡིན་པར་ཟུར་བལྟས་ལེབ་མཐོང་ལྟ་བུ་རེད།
རྩོམ་འདིའི་ཁ་བྱང་དུ། «བྱིས་པ་ལོ་བརྒྱད་ཅན་ཞིག་གིས་བལ་ཡུལ་གྱི་གནམ་ས་བསྒུལ་བ།» ཞེས་ཐོགས་པ་དེ་ཡང་དེ་ཙམ་མིན་པར། བལ་ཡུལ་ནང་གི་གསར་འགྱུར་བརྒྱུད་ལམ་ཁག་གིས་ཁོང་མོའི་གཏམ་བཤད་ཀྱི་བརྙན་ཐུང་ཁྱབ་སྤེལ་གཏོང་སྐབས་དང་།
དེ་བཞིན་བལ་ཡུལ་མི་སེར་ཚོས་ཀྱང་བརྙན་ཐུང་དེ་དག་བརྒྱུད་སྤེལ་བྱེད་སྐབས་སུ་མང་ཆེ་བས་བེད་སྤྱོད་བྱེད་པའི་ཁ་བྱང་ཞིག་རེད།
ད་ལྟ་བྱིས་དུས་ཉིད་ནས་ཁོང་མོས་དེ་ལྟར་ཟིང་བསླངས་ཡོང་དུས་མ་འོངས་པ་ན་གང་འདྲ་ཆགས་ཀྱི་ཡོད་ན་ལགས།
རེད། དེའི་ཆེད་དུ་ཁོང་མོས་ཏག་ཏག་ལན་ཞིག་བརྒྱབ་ཡོད་པ་དེ་ནི། མོ་རང་མ་འོངས་པ་ན་གོ་ལ་འདིར་ཚན་རིག་པ་ཧ་ཅང་གྲགས་ཅན་ཞིག་ཆགས་འདོད་ཡོད་ཅེས་གསར་འགོད་པའི་བཅར་འདྲིར་ལན་བཏབ་ཡོད་པ་རེད།
མཐའ་དོན་གལ་ཏེ་ལྷན་རྒྱས་རྣམ་པས་བལ་སྐད་ལེགས་པོ་མཁྱེན་གྱི་ཡོད་པ་དང་།
ངས་བསྒྱུར་པའི་སྐད་ཆ་དེ་དག་གིས་ཁྱེད་རང་ལ་འདོད་པ་ཚིམས་པོ་རང་མ་བྱུང་ན།
ཁོང་མོས་གཏམ་བཤད་བྱས་པའི་བརྙན་ཐུང་གི་དྲྭ་ཐག་གཤམ་དུ་བཞག་ཡོད་པས་དགྱེས་གཟིགས་གནང་རོགས་ཞུ།
བསྒྱུར་གཞི། «ཁ་བར་བུལླེཊིན་ཊི་ཝི་»ཞེས་པའི་ཡུ་ཊུབ་བརྒྱུད་ལམ་ནང་གི་ཁོང་གི་གཏམ་བཤད་སྐར་མ་བཅུ་ཅན་དེ་ལས་བསྒྱུར།
དེའི་དྲྭ་ཐག་ནི། བྱིས་པ་ལོ་བརྒྱད་ཅན་ཞིག་གིས་བལ་ཡུལ་གྱི་གནམ་ས་བསྒུལ་བ།
རྩོམ་ཡིག་འདི་མཚོ་བྱུང་ཨུཏྤལ་ནེའུ་གསིང་དྲྭ་བ་དང་། བོད་ཀྱི་མེས་པོ་དྲྭ་བ། ལུག་ཚང་དཔལ་ཡོན་སྤྱི་སྟེགས་སོགས་སུ་སྤེལ་རྒྱུའི་གོ་སྐབས་རྙེད།
No comments:
Post a Comment