༈ བོད་མིའི་རང་བཞིན་སྐད་བརྡ་དེ།
རིམ་བཞིན་ཉམས་པར་གྱུར་པ་ཡིས།།
ཟུར་ཆག་གྱུར་པ་དོལ་སྐད་ཀྱི།།
སྤ་སྒྲ་རེ་འགའ་དབའ་སྒྲ་དང་།།
སྦ་སྒྲ་རེ་འགའ་ཝ་ཕྱེད་གྱུར།།
དཔེར་ན་སྤགས་ནི་དབགས་སུ་གྱུར།།
ཆུ་ལ་སྦངས་པ་བངས་སུ་གྱུར།།
དེ་བཞིན་ད་འོག་པ་ལས་ནི།།
བསྒྲུབས་པའི་ཚིག་རྣམས་རེ་འགའང་།།
དབའ་སྒྲར་གྱུར་པ་མཆིས་ཏེ་དཔེར།།
དཔེ་ལ་དབེ་རུ་འབོད་པ་བཞིན།།
སྐྲ་དང་སྤྲ་རྣམས་སྲ་རུ་གྱུར།།
སྒྲ་དང་སྦྲ་རྣམས་ཟྲ་རུ་གྱུར།།
དཔེར་ན་སྐྲ་ལ་སྲ་དང་ནི།།
སྤྲིན་ལ་སྲིན་ཞེས་བྱ་བ་དང་།།
སྒྲོ་ལ་ཟྲོ་དང་སྦྲང་མ་ལ།།
ཟྲང་མ་ཞེས་སུ་འབོད་པ་སྟེ།།
ས་ལ་ར་ཡིག་བཏགས་པ་ནི།།
དབུས་ཀྱི་ཤ་ཡི་སྒྲ་དང་འདྲ།།
ཟ་ལ་ར་ཡིག་བཏགས་པ་ནི།།
དབུས་ཀྱི་ཞ་ཡི་སྒྲ་དང་འདྲའོ།།
ཟྲ་ཞེས་བྱ་བའི་ཡི་གེ་ནི།།
ཁ་ཅིག་མ་མཐོང་རྒྱུ་མཚན་གྱིས།།
མེད་པ་ཁོ་ནར་འདོད་མོད་ཀྱང་།།
ཡིག་རྙིང་འགའ་རུ་ཡོད་པར་གྲགས།།
དེ་བཞིན་གཞན་ཡང་རྣམ་མང་སྟེ།།
ཆེ་ལོང་ཙམ་ཞིག་འདིར་བསྟན་ཏོ།།
འདི་ཡང་དོལ་སྐད་མི་ཉམས་པའི།།
ས་བོན་ཙམ་དུ་བྲིས་པ་ལས།།
མི་མཁས་མཁས་མདོག་ཨུ་ཚུགས་ཀྱིས།།
མཁས་གཏམ་བཤད་པ་མ་ཡིན་པས།།
གཟུར་གནས་བློ་ལྡན་སྤྱན་སྔ་རུ།།
དཔྱད་གཞིར་ཕུལ་བ་ཙམ་ལགས་སོ།།
༡༡:༠༠། ༠༧།༠༡།༢༠༢༡
No comments:
Post a Comment