དཔལ་ལྡན་བླ་མ་བརྒྱུད་པར་བཅས་པ་ཡི།།
གདམས་ངག་གཅིག་ཆོག་དྲན་རྒྱུ་མ་མང་ཨ།།
ཞེས་འདི་དོན་དུ་གནས་ཀྱང་དཔེ་ཆ་བས།།
ཐོས་པ་བྱེད་ཚེ་དཔེ་ཆ་ཀློག་ཙམ་ལས།།
དྲན་པ་མ་བསྟེན་མི་ཆོག་དེའི་ཐབས་སུ།།
བཀླགས་དོན་ཡང་ཡང་སེམས་ཤིང་དྲན་པ་དེ།།
དཔེ་ཆ་ཤེས་པའི་རྒྱུ་རྐྱེན་བླ་མེད་ཡིན།།
དེ་མིན་ཚིགས་བཅད་རྐང་བཞི་གཅིག་ལའང་།།
ཀློག་འདོན་ཇི་ཙམ་བྱས་རུང་བཟང་བསྐྱེད་མེད།།
དེའི་ཕྱིར་དཔེ་ཆ་ཡང་ཡང་ཀློག་པ་དང་།།
དེ་དོན་ཡང་ཡང་སེམས་པས་དྲན་པར་བསྟེན།།
ཇི་ཙམ་སེམས་པར་བྱེད་པ་དེ་སྲིད་དུ།།
བསམ་ཐེངས་རེ་ལ་བློ་བསྐྱེད་འཕར་མ་རེ།།
ཡོང་བར་གདོན་མི་ཟ་བར་ཤེས་གྱིས་ལ།།
རྒྱུན་དུ་དྲན་པ་བསྟེན་རྒྱུར་འབད་བརྩོན་བྱོས།།
བླ་མས་དྲན་རྒྱུ་མ་མང་གསུངས་པ་དེ།།
མི་དྲན་དགུ་དྲན་འཇིག་རྟེན་དོན་གཉེར་དང་།།
ངས་ནི་དྲན་པ་བསྟེན་དགོས་ཞུས་པ་འདི།།
ཐོས་རྩོད་འཆད་རྩོམ་དོན་དུ་ཞུས་པ་ཡིན།།
དེའི་ཕྱིར་ཐོས་པ་བྱེད་ཚེ་དྲན་པ་ནི།།
མཆོག་ཏུ་བསྟེན་པར་འོས་ཤིང་མཚམས་མོད་ཀྱང་།།
ནམ་ཞར་ཀུན་ཏུ་འཇིག་རྟེན་དོན་གཉེར་ཆེད།།
ཅིས་ཀྱང་དྲན་རྒྱུ་མི་མང་ཐབས་ལ་འབད།།
ཚིག་སྦྱོར་ལེགས་པས་སྙན་པ་མ་ལགས་མོད།།
ཤ་ཚའི་ཁ་ནས་སྙན་པའི་གཏམ་ཞིག་ཕུལ།།
གང་གི་རྣར་སོན་སྙན་པར་ཐོས་གྱུར་ན།།
དེའི་ཚེ་འདི་ནི་སྙན་པར་ཆོག་ཤེས་སོ།།
ཨོ་རྒྱན་འཇིགས་མེད་ཚེ་དབང་དགྲ་འདུལ་གྱིས་རང་འདྲིས་ཨེན་ཆུང་འགའ་ཞིག་ལ་ལན་དུ་ཕུལ་ལོ།།
No comments:
Post a Comment