༈ ཚིག་གྲོགས་འཚོལ་བའི་ལམ་ནས་ཚིགས་བཅད་ཧྲིལ་པོ་བརྗོད་བྱ་གཅིག་གི་སྟེང་དཔེར་བརྗོད་འབྲི་ཐབས་ཀྱི་མཚོན་དཔེ།
«མིང་གི་རྗེས་སུ་ཚིག་གྲོགས་འཚོལ་བ།»
(དཀར་.......)
[དཀར་མཛེས་]ཡིད་འཕྲོག་ལྷ་མོ།།
ཁྱེད་རང་གང་དུ་བཞུགས་ཡོད།།
ང་རང་ཁྱེད་རང་མེད་ན།།
བཅོ་ལྔའི་དུང་ཟླ་འདྲ་བའི།།
ཁྱེད་ཀྱི་ཞལ་རས་[དཀར་གསལ]།།
ནམ་ཡང་དྲན་དྲན་ངང་ནས།།
ཁྱོན་ནས་བརྗེད་པ་མི་འདུག།
མདང་དགོང་རྨི་ལམ་ནང་དུ།།
ལྷ་ཡི་སྲས་མོ་འདྲ་བའི།།
[དཀར་འཇམ་]གོས་ཀྱིས་བཀླུབས་པ།།
ཁྱེད་རང་མཇལ་བ་རྨིས་བྱུང་།།
སྤྲིན་པ་ལང་ལིང་ལྡིང་བའི།།
[དཀར་གཙང་]ནམ་མཁའི་ངོགས་སུ།།
ང་གཉིས་མཉམ་དུ་གཤིབས་ནས།།
ཕྱོགས་བཞིར་མྱུལ་བ་རྨིས་བྱུང་།།
འཕགས་མཆོག་སྤྱན་རས་གཟིགས་ལས།།
དམ་ཆོས་དུ་མ་གསན་ནས།།
[དཀར་ཆོས་]དགེ་བ་བསྒྲུབ་རྒྱུའི།།
དམ་བཅའ་བཞག་པ་རྨིས་བྱུང་།།
ཡུན་རིང་མ་འགོར་བ་ལ།།
[དཀར་འབྱམས་]ཡུག་གཅིག་ངང་དུ།།
རྨི་ལམ་སད་པ་དེའི་ཚེ།།
འགྱོད་པ་ཤུགས་དྲག་སྐྱེས་བྱུང་།།
རྨི་ལམ་བདེན་པ་མ་རེད།།
ཁྱེད་རང་མཇལ་བ་མ་རེད།།
འོན་ཀྱང་ནམ་ཞིག་འཕྲད་པའི།།
ལས་འཕྲོར་ངང་སྒུག་བྱས་ཡོད།།
རིག་གནས་དགེ་རྒན་བེ་རི་རྒྱལ་སྲས་ལགས་ཀྱི་བོད་ཀྱི་སྐད་ཡིག་སློབ་ཁྲིད་མན་ངག་ལ་རང་གི་ཐབས་རྩལ་གསར་བསྣན་གྱིས་བྲིས་པ་དོན་གཉེར་འགའ་ལ་ཕན་པར་གྱུར་ཅིག་གུ།།
No comments:
Post a Comment