ཝཻ་ཤཱ་ཁ་འམ་ཝི་ཤཱ་ཁ།།
གང་རུང་ལས་ནི་ཟུར་ཆག་ཏེ།།
རྒྱ་གར་སྐད་ཀྱི་མིང་དེ་ནི།།
འདོད་རྒྱལ་རྗེས་གྲུབ་གང་ཡིན་མིན།།
མི་ཤེས་འོན་ཏེ་བོད་མིང་འདི།།
ཕལ་ཆེར་འདོད་རྒྱལ་མིང་ཡིན་ནོ།།
ངེས་ཚིག་ཅེས་པ་སྒྲ་བཤད་དེ།།
ས་ག་ལ་ནི་ངེས་ཚིག་མེད།།
སྐད་རིགས་གཞན་ནས་གཞན་དག་ཏུ།།
ཟུར་ཆག་སྒྲ་ལ་བཤད་པ་མེད།།
ཝཻ་ཤཱ་ཁ་འམ་ས་ག་སྟེ།།
སྒྱུ་སྐར་ཉེར་བརྒྱད་ཡ་རྒྱལ་ཏེ།།
རྒྱ་གར་རྩིས་ལུགས་གཞིར་བཞག་ན།།
བཅུ་གཉིས་ཟླ་བའི་དང་པོར་རྩི།།
བོད་ཀྱི་རྩིས་ལུགས་གཞིར་བཞག་ན།།
བཅུ་གཉིས་ཟླ་བའི་བཞི་བར་རྩི།།
གཉིས་ཀའི་ལུགས་ལ་ཟླ་བ་དེར།།
ས་གའི་སྐར་མ་འཆར་བས་སོ།།
དེ་ལྟར་བདག་གི་རྨོངས་འཆར་ཙམ།།
འཕུལ་བ་ལགས་པས་ནོངས་མཆིས་ན།།
ཐུགས་རྗེས་ཡོ་བསྲང་གནང་རོགས་མཁྱེན།།
ལམ་སྟོན་ལམ་སྣ་འདྲེན་རོགས་མཛད།།
ཅེས་མཁས་དབང་རྡོ་རྗེ་དབང་ཕྱུག་ལགས་ནས་ཉིད་ཀྱི་ངོ་དེབ་དྲྭ་བར་ས་ག་ཟླ་བ་ཞེས་པའི་སྐབས་ཀྱི་ས་ག་དེ་ལ་ངེས་ཚིག་ཡོད་དམ་མེད་ཅེས་པའི་བཀའ་འདྲི་དེར་མི་ཤེས་ཤེས་མདོག་གིས་ལན་ཞིག་ཕུལ་ཁ་བྱས་སོ།།
No comments:
Post a Comment