རྩོམ་འབྲིའི་ཆུ་ཚད་མཐོ་རུ་གཏོང་བའི་ཐབས་ལམ་བཅོ་ལྔ་།

རྩོམ་པ་པོ་མི་གསལ། བདེ་ཁང་བྱམས་པས་བསྒྱུར།

དང་པོ། རྩོམ་པ་པོ་ཕུལ་བྱུང་གི་བརྩམས་ཆོས་མང་ཙམ་བཀླགས་པ།

འདི་ནི་མིག་མཐོང་གསལ་གྲུབ་ཅིག་རེད་ལ།ཕན་ནུས་མྱུར་དུ་ཐོན་པའི་ཐབས་ལམ་ཞིག་ཀྱང་རེད་དེ། གལ་ཏེ་ཁྱེད་རང་གིས་བརྩམས་ཆོས་ལེགས་པོ་ཇི་སྙེད་ཅིག་མ་བཀླག་ན། ཁྱེད་ཀྱིས་རྩོམ་ཡིག་ལེགས་པོ་ཞིག་འབྲི་མི་ཐུབ་པ་ཡིན་ཏེ། རྩོམ་པ་པོ་ཕུལ་དུ་བྱུང་བ་དེ་དག་ནི་མི་གཞན་ཀྱི་བརྩམས་ཆོས་ལེགས་པོ་ཇི་སྙེད་བཀླགས་པ་ནས་འགོ་འཛུགས་ཏེ་རིམ་བཞིན་ལད་མོ་བྱེད་པ་དང་། དེ་རྗེས་ཐོད་རྒལ་ཐུབ་པ་བྱས་ནས་རང་ཉིད་ཀྱི་ཁྱད་གཤིས་གྲུབ་པ་ཡིན་ཕྱིར། རྩོམ་ཡིག་ལེགས་པོ་གང་མང་བཀླགས་དགོས་ལ། ཀློག་པའི་སྐབས་སུ་རྩོམ་ཡིག་དེའི་ཕྱོགས་གང་ཅིའི་ཐད་ཀྱི་གནད་དོན་དང་རྩོམ་རྩལ་ལ་དོ་སྣང་བྱེད་དགོས་པ་ཡིན།

གཉིས་པ། མང་ཙམ་འབྲི་དགོས།

ཉིན་ལྟར་རྒྱུན་ཆད་མེད་པར་འབྲི་དགོས་ལ། གལ་ཏེ་དུས་ཚོད་ཡོད་ན།  ཉིན་གཅིག་ལ་ཐེངས་ཁ་ཤས་འབྲི་དགོས་ཤིང་།  རྩོམ་རིག་འབྲི་རྒྱུ་ནི་ལག་རྩལ་སྦྱོང་བ་དང་གནས་ལུགས་གཅིག་པ་ཡིན་ཏེ། གོམས་ན་བྱང་ཆུབ་པར་འགྱུར་བ་ཡིན། དེས་ན་ཁྱེད་ཀྱིས་རང་ཉིད་ཀྱི་སྐོར་དང་། པོད་ཁུག་ལ་སོགས་བྲིས་ནས་དཔེ་བསྐྲུན་ཁང་དུ་བསྐུར་ལ། མུ་ནས་མུ་དང་། བློ་གཅིག་སེམས་གཅིག་གིས་བྲིས་དང་། ག་ཚོད་མང་བ་བྲིས་ན་དེ་རྩིས་ཆུ་ཚད་མཐོ་རུ་འགྲོ་ངེས།

གསུམ་པ། དུས་ཚོད་དང་ས་ཆ་ངེས་མེད་དུ་ཁྱེད་རང་གི་བསམ་ཚུལ་གསར་པ་ཟིན་བྲིས་སུ་འགོད་དང་།

བྲིས་དེབ་ཆུང་ངུ་ཞིག་ལུས་དང་བྲལ་མེད་དུ་༼ན་པོ་ཁ་ཧྥུའི་ལུས་ཐོག་ཏུ་བྱང་བུ་ཆུང་ངུས་ཁེངས་ཡོད།༽འཁྱེར་ནས། ཁྱེད་རང་གིས་བརྩམས་སྒྲུང་དང་། རྩོམ་ལུས་གཞན། ཡང་ན་བརྩམས་སྒྲུང་ནང་གི་མི་སྣ་ཞིག་ལ་བསམ་ཚུལ་གསར་པ་འཆར་སྐབས། དེ་ལམ་སེང་ཟིན་བྲིས་སུ་འགོད་དགོས།དེ་མིན་ཁྱེད་རང་དང་མི་གཞན་གླེང་མོལ་བྱེད་སྐབས་གོ་རྟོགས་གསར་པ་རྙེད་པའམ། ལྷུག་རྩོམ་སྙན་ངག་དུམ་བུ་གཅིག་གམ་གླུ་ཚིག་གཅིག་གིས་ཁྱེད་རང་ལ་སེམས་འགུལ་ཐེབས་སྐབས།ཚང་མ་དེ་མུར་ཟིན་བྲིས་སུ་འགོད་དགོས་པ་ཡིན། མིའི་བསམ་ཚུལ་ནི་སྐད་ཅིག་ཉིད་དུ་འགྱུར་འགྲོ་བས། ཁྱེད་ཀྱིས་དུས་ཐོག་ཏུ་ཟིན་བྲིས་བཀོད་ན། རྩོམ་ཡིག་གི་རྒྱུ་ཆ་མང་པོ་ཞིག་གསོག་ཐུབ་པ་ཡིན། ང་རང་གི་གོམས་གཤིས་ནི། ང་རང་གིས་འབྲི་བསམ་པའི་རྩོམ་ཡིག་རྩིས་ཕྲ་བཟོས་ནས། ཟམ་མི་ཆད་པར་ཁ་གསབ་བྱེད་ཀྱི་ཡོད།

བཞི་པ། རྩོམ་འབྲིའི་དུས་ཚོད་གཏན་ཁེལ་བྱེད་དགོས།

ཉིན་ལྟར་མི་གཞན་གྱིས་སུན་པོ་མི་བཟོ་བའི་དུས་ཚོད་གཅིག་རྩོམ་འབྲིའི་དུས་ཚོད་ལ་གཏན་ཁེལ་བྱེད་དགོས་པ་མ་ཟད། དེ་གོམས་གཤིས་འཇགས་པ་བྱེད་དགོས། རྩོམ་འབྲིའི་དུས་ཚོད་ཡག་ཤོས་ནི་སྔ་དྲོ་དང་དེ་ནས་ཉིན་དགུང་ཡིན་ལ། ཕྱི་དྲོའམ་དགོང་མོའི་དུས་ཚོད་བེད་སྤྱད་ཀྱང་ཆོག་པ་ཡིན། ཉིན་ལྟར་རྩོམ་ཡིག་འབྲི་རྒྱུ་དེ་ལས་འགན་ཆེན་པོ་ཞིག་ལ་འཛིན་ནས་འགྲུབ་དགོས་ལ། མ་མཐར་ཡང་ཉིན་ལྟར་ཆུ་ཚོད་ཕྱེད་ཀ་འབྲི་དགོས་ཤིང་། ཆུ་ཚོད་གཅིག་གཉིས་འབྲི་ཐུབ་ན་ལྷ་རབ་རེད།དེ་ལྟར་རྒྱུན་འཁྱོངས་བྱས་ན། ཁྱེད་ལ་འབྲས་བཟང་སྨིན་ངེས་རེད།

ལྔ་པ། རང་འདོད་ལྟར་བྲིས་དང་།

ཤོག་བུ་དཀར་པོ་ཞིག་གམ་བརྙན་ཤེལ་དཀར་པོ་ཞིག་ལ་ཁ་གཏད་སྐབས། དངོས་གནས་འཇིགས་སུ་རུང་བ་ཞིག་རེད་དེ། ཁྱེད་ཀྱིས། ངས་སྐད་འཕྲིན་ལ་འཁྱུག་ཙམ་ལྟ་བའམ་གཉིད་ཅུང་ཟད་ཉལ་བསམས་སྲིད། དེ་འདྲ་གཏན་ནས་བྱ་མི་ཉན་པར་ལམ་སེང་འབྲི་བ་དང་། ལམ་སེང་ཡི་གེ་བཏགས་དགོས། ཁྱེད་རང་གིས་ནང་དོན་ག་རེ་བྲིས་ནའང་གནད་དགག་ཆེན་པོ་མེད་དེ། ཡི་གེ་འབྲི་འགོ་འཛུགས་པ་དེ་གས་ཆོག་པ་ཡིན། ང་ལ་ཆ་བཞག་ནས་བཤད་ན། ངས་སྔོན་ལ་ང་རང་གི་མིང་དང་རྩོམ་གྱི་ཁ་བྱང་བཀོད་རྗེས་དེ་ནས་ནང་དོན་འབྲི་གི་ཡོད་ལ། བློ་གཅིག་སེམས་གཅིག་གིས་འབྲི་གི་ཡོད། གལ་ཆེ་ཤོས་ནི་ཁྱེད་ཀྱིས་ནང་དོན་རང་འདོད་ལྟར་བྲིས་ནའང་ཆོག་སྟེ། གང་ལྟར་ལམ་སེང་འབྲི་འགོ་འཛུགས་དགོས།

དྲུག་པ། བློ་རྩེ་གཅིག་སྒྲིམ།

རྩོམ་ཡིག་འབྲི་རྒྱུ་ནི་བློ་གཅིག་སེམས་གཅིག་གི་བྱ་བ་ཞིག་ཡིན་ཞིང་། འདུ་འཛི་ཆེ་བའི་ཁོར་ཡུག་གམ་ཡང་ན་དུས་གཅིག་ཏུ་བྱ་བ་གཞན་སྒྲུབ་ན། རྩོམ་ཡིག་ལེགས་པོ་འབྲི་ཐབས་བྲལ་བ་ཡིན། དེས་ན་རྩོམ་ཡིག་འབྲི་སྐབས་ཁ་ཁུ་སིམ་པའི་ཁོར་ཡུག་ཅིག་ཡོད་དགོས་ཤིང་། སྙན་འཇེབས་ལྡན་པའི་རྒྱབ་ལྗོངས་རོལ་དབྱངས་ཆུང་ངུ་ཞིག་ཀྱང་ཡོད་དགོས་པ་ཡིན། མ་མཐར་ཡང་། མི་གཞན་གྱིས་སུན་པོ་མི་བཟོ་བའི་ཆ་རྐྱེན་འོག་རྩོམ་ཡིག་འབྲི་དགོས་ལ། རྩོམ་ཡིག་འབྲི་སྐབས་སྒྲོག་རྩེའི་སྟེང་གི་འབྲེལ་མེད་ཀྱི་དངོས་པོ་དང་བསམ་བློ་ཡོངས་སུ་དོར་ནས། བྲག་ཕུག་ནང་དུ་འཛུལ་བ་ལྟར་གྱི་ཁ་ཁུ་སིམ་པའི་ཁོར་ཡུག་ཅིག་ཏུ་རྩོམ་ཡིག་འབྲི་དགོས་པ་ཡིན།

བདུན་པ། སྔོན་ལ་འཆར་གཞི་བཀོད་རྗེས། དེ་ནས་འབྲི་བ། 

འདི་གོང་གི་རང་འདོད་ལྟར་འབྲི་བ་ཞེས་པ་དང་འགལ་ཟླ་ཅུང་ཟད་ཡོད་སྲིད། འོན་ཀྱང་དོན་དངོས་ཐོག་དེ་ལྟར་མ་ཡིན། སྔོན་ལ་འཆར་གཞི་བཀོད་པའམ་ཀླད་པའི་ནང་དུ་བྱུང་རིམ་དེ་དག་བསམ་གཞིགས་ཐེངས་གཅིག་བྱ་རྒྱུ་ནི་བྱ་ཐབས་ལེགས་པོ་ཞིག་ཡིན། ཉིན་ལྟར་རྒྱུག་བཤར་གློད་སྐབས་དང་ཡང་ན་འཆམ་འཆམ་དུ་བསྐྱོད་པའི་སྐབས་སུ་བསམ་གཞིག་བྱས་རྗེས་བློ་ཡུལ་དུ་འཆར་བ་རྣམས་ཟིན་བྲིས་སུ་འགོད་དགོས་པ་མ་ཟད་སྤྱི་ཁོག་རགས་ཙམ་ཕུབ་རྗེས་ནང་དོན་མྱུར་དུ་འབྲི་ཆོག་པ་ཡིན།

བརྒྱད་པ། གསར་གཏོད།

ཁྱེད་རང་གིས་རྩོམ་པ་པོ་ཕུལ་དུ་བྱུང་བ་དག་ལ་ལད་མོ་བྱེད་དགོས་པཟེར་ན། ཁྱེད་ཀྱིས་ཡིན་གཅིག་ཁོང་ཚོ་དང་གཅིག་པ་བྲིས་དགོས་པའི་ངེས་པ་མེད་དེ། ཁྱེད་ཀྱིས་འབྲི་ཐབས་གསར་པ་སྣ་ཚོགས་ལྟ་ཚོད་བྱེད་ཆོག་པ་སྟེ། འདི་ནས་ཅུང་ཙམ་དང་། ཕ་གི་ནས་ཕྲན་ཙམ་སྦྱངས་ན་རིམ་བཞིན་ཁྱེད་རང་རང་ཉིད་ཀྱི་ཁྱད་གཤིས་དང་། རྩོམ་ལུས། བསམ་བློ་གྲུབ་ཐུབ་པ་ཡིན། དེ་བཞིན་མཚོན་ཐབས་མི་འདྲ་བ་ཁ་ཤས་གསར་གཏོད་བྱས་ནས་རེ་རེ་བཞིན་ལྟ་ཚོད་བྱོས་དང་། གལ་ཏེ་ཡག་པོ་མེད་ན་བེད་སྤྱོད་མ་བྱས་ན་ཆོག་པ་ཡིན།

དགུ་པ། བཟོ་བཅོས།

རྩོམ་ཡིག་འབྲི་སྐབས་ཁྱེད་རང་གིས་དང་ཐོག་མར་བསམ་གཞིག་བྱེད་པ་དང་། དེ་རྗེས་ནང་དོན་འབྲི་བ། མཇུག་ཏུ་ཁྱེད་ཀྱིས་ནང་དོན་ཇི་ལྟ་བུ་ཞིག་བྲིས་འདུག་པ་ལྟ་དགོས་པ་ཡིན། དེ་ཧ་ཅང་གལ་འགངས་ཆེན་པོ་རེད། རྩོམ་པ་པོ་མང་པོ་ཞིག་གིས་རྩོམ་ཡིག་ཚང་མ་བྲིས་ཚར་ན་བཟོ་བཅོས་བྱེད་ཀྱི་མེད། དུས་ཚོད་མང་པོ་བེད་སྤྱད་ནས་བྲིས་ཚར་བ་ཞིག་ཡིན་པས། ད་དུང་དུས་ཚོད་བེད་སྤྱད་ནས་བཟོ་བཅོས་བྱེད་རྒྱུ་ནི་རང་སྡུག་རང་གིས་ཉོས་པ་རེད་བསམས་མོད། གལ་ཏེ་ཁྱེད་རང་དེ་བས་ལེགས་པ་འབྲི་ཐུབ་དགོས་ན། ཁྱེད་རང་ངེས་པར་དུ་བཟོ་བཅོས་བྱེད་ཤེས་པ་དགོས།བརྩམས་ཆོས་རྨད་དུ་བྱུང་བ་དེ་དག་ནི་ཡང་ནས་བསྐྱར་དུ་བཟོ་བཅོས་བྱས་ནས་གྲུབ་པ་ཞིག་རེད། དེ་ལྟར་བྱས་ན་ཁྱེད་རང་གི་བརྩམས་ཆོས་ཕུལ་དུ་བྱུང་བ་ཞིག་ཏུ་འགྱུར་ཐུབ་པ་ཡིན།དེ་བཞིན།ཁྱེད་རང་གི་རྩོམ་ཡིག་ལ་ལྟ་ཞིབ་བྱེད་སྐབས་སུམ་རྟགས་དག་གསུམ་འགྲིག་ནོར་ཁོ་ན་ཙམ་མ་ཡིན་པར། ད་དུང་དོན་སྙིང་མེད་པའི་ཚིག་དང་གོ་རིམ་འཛོལ་བའི་སྒྲིག་གཞི། ཧ་གོ་འདི་གོ་མེད་པའི་ཚིག་དུམ་སོགས་འཚོལ་དགོས་པ་ཡིན་ཞིང་། བཟོ་བཅོས་བྱེད་པའི་དམིགས་ཡུལ་ནི། བརྗོད་བྱ་ཁ་གསལ་པོ་དང་། གསོན་ཉམས་ལྡན་པ། ཐད་ཀར་མཚོན་ཐུབ་པའི་ཆེད་དུ་ཡིན། 

བཅུ་པ། ཁ་གསལ་གོ་བདེ་ཡོང་བ་བྱེད་དགོས། 

འདི་ནི་ཁྱེད་རང་གིས་བཟོ་བཅོས་བྱེད་པའི་བརྒྱུད་རིམ་ཁྲོད་ཀྱི་གནད་དོན་གལ་ཆེ་ཤོས་ཤིག་ཡིན་ཏེ། ཚིག་རྐང་རེ་རེ་དང་། དུམ་བུ་རེ་རེ་བཞིན་བཅོས་ནས་བརྗོད་བྱ་དང་འབྲེལ་མེད་ཚང་མ་བསུབས་དགོས་པ་ཡིན་ཏེ། ཚིག་རྐང་ཐུང་ངུ་ཞིག་ཚིག་ལྷུག་རིང་མོ་ཞིག་ལས་མཚོན་དོན་རྒྱ་ཆེ་བ་ཡོད་ལ། ཕལ་སྐད་ནི་ཆེད་སྤྱོད་ཚིག་ལས་ནུས་པ་ཆེ་བ་ཡོད་ཕྱིར། ཁ་གསལ་ལ་གོ་བདེ་ན་རྩོམ་ཡིག་གི་ནུས་པ་དེ་བས་ཆེ་བ་ཡོད།

བཅུ་གཅིག་པ། ཚིག་རྒྱན་མང་དུ་སྤྱོད་དགོས། 

ཚིག་རྐང་གི་ནང་དུ་ཚིག་རྒྱན་མང་ཙམ་སྤྱོད་དགོས་པ་ཡིན། ཨ་ཅང་ཅང་། ཚིག་རྐང་ཚང་མར་དེ་ལྟ་བུ་བྱེད་དགོས་པའི་ངེས་པ་མེད་པར་རྔ་ལ་བསྟུན་ནས་འཆམ་བརྒྱབ་ན་འགྲིག་ཀྱང་། ངེས་པར་དུ་ཚིག་ཁ་རྒྱན་ཁ་ཤས་སྤྱོད་ཐུབ་པ་དགོས་ལ། དེ་ཡང་བཟོ་བཅོས་བྱེད་པའི་གནས་སྐབས་སུ་གཞི་ནས་བེད་སྤྱད་མི་དགོས་པར། ་རྩོམ་ཡིག་ཐོག་མར་འབྲི་བའི་སྐབས་སུ་ནས་བསམ་གཞིག་བྱེད་དགོས་པ་ཡིན། 

བཅུ་གཉིས་པ། མི་གཞན་གྱིས་གདེང་འཇོག་བྱེད་དུ་འཇུག་དགོས།

རྩོམ་ཡིག་མི་གཞན་ལ་མ་བསྟན་ན། ཡར་རྒྱས་གང་ཡང་ཡོང་མི་སྲིད་པ་ཡིན། དེས་ན་མི་གཞན་གྱིས་ཁྱེད་རང་གི་རྩོམ་ཡིག་བཀླགས་པ་བརྒྱུད་ནས་རྩོམ་ཡིག་ལ་གདེང་འཇོག་བྱེད་དུ་བཅུག་ན། ཁོང་ཚོས་ཁྱེད་ལ་རིན་ཐང་ལྡན་པའི་གྲོས་འགོ་མང་པོ་ཞིག་འདོན་ངེས་ཡིན་ལ། གལ་ཏེ་བསམ་འཆར་ཡིན་ནའང་།  ཤ་ཚའི་ཁ་ནས་གཏམ་སྙན་མེད་པས། གཟབ་ནན་གྱིས་ཉན་དགོས་པ་ཡིན་ཏེ། དེ་ལྟར་བྱས་ན་ཁྱེད་རང་གིས་རྩོམ་ཡིག་དེ་བས་ལེགས་པ་འབྲི་ཐུབ། 

བཅུ་གསུམ་པ། བློ་ཁོག་ཆེན་པོས་རྩོམ་ཡིག་སྤེལ་དགོས།

ཁྱེད་རང་གི་ངོས་ནས་བཤད་ན། མི་གཞན་གྱིས་ངེས་པར་དུ་ཁྱེད་རང་གི་བརྩམས་ཆོས་ལྟ་ཐུབ་པ་བྱ་དགོས། དེ་ནི་གོང་གསལ་ལྟར་ཁྱེད་རང་གིས་མི་སུ་ལྟ་རུ་བཅུག་ན་དེས་ལྟ་ཐུབ་པ་ཁོ་ན་ཙམ་མིན་པར། མི་ཚང་མས་ཁྱེད་རང་གི་བརྩམས་ཆོས་ལྟ་ཐུབ་པ་བྱེད་དགོས་ཏེ། ཁྱེད་ཀྱིས་ཁྱེད་རང་གི་བརྩམས་སྒྲུང་དང་སྙན་ངག་དུས་དེབ་ཁང་དུ་བསྐུར་བའམ་གལ་ཏེ་ཁྱེད་རང་པོད་ཁུག་དང་འཕྲིན་སྟེགས་སོགས་སུ་རྩོམ་ཡིག་འབྲི་གི་ཡོད་ན། ཁྱེད་ལ་བཀྲ་ཤིས་བདེ་ལེགས་ཞུ་རྒྱུ་ཡིན། དེ་ནི་འགོ་ལེགས་པོ་ཞིག་ཚུགས་ཟིན་པ་ཡིན།

བཅུ་བཞི། རྒྱུན་གཏན་གྱི་སྐད་ཆ་ལྟ་བུའི་རྩོམ་ལུས་སྤྱོད་དགོས།

མི་མང་པོ་ཞིག་གིས་ཡིན་ལུགས་ཚུལ་ལྡན་ངང་འབྲི་གི་འདུག་མོད། ཡིན་ནའང་ངས་ཤེས་རྟོགས་བྱུང་བ་ཞིག་ལ་ང་ཚོས་ཁ་སྐད་ལྟར་དུ་རྩོམ་ཡིག་བྲིས་པ་ཡིན་ན། འབྲི་སྟབས་བདེ་ལ། ཁ་གསལ་གོ་བདེ་ཡོང་གི་འདུག དེ་ལྟར་བྱས་ན་ཀློག་པ་པོས་ལྟ་དུས་ཀྱང་ལྟ་བདེ་པོ་ཡོང་གི་རེད། མ་གཞི་དང་ཐོག་དེ་ལྟར་བྲིས་བདེ་པོ་མེད་རུང་། ཁྱེད་ཀྱིས་རྒྱུན་འཁྱོངས་བྱས་ནས་དེ་ལྟར་འབྲི་དགོས། གཅིག་བྱས་ན་དེས་གནད་དོན་གཞན་ཞིག་འཁྱེར་ཡོང་བ་ནི། ཀློག་པའི་སྐབས་སུ་ཁ་སྐད་དང་ཐག་ཉེ་བའི་ཆེད་དུ་ཁྱེད་ཀྱིས་བརྡ་སྤྲོད་གྱི་རྩ་བ་དང་མ་འགལ་ཀ་མེད་ལྟ་བུར་གྱུར་སྲིད་པ་སྟེ། གལ་ཏེ་བརྡ་སྤྲོད་དེ་དག་ཚུལ་དང་མཐུན་པར་བྲིས་ན། ཀློག་མི་བདེ་བ་ཡོང་སྲིད་མོད། ཡིན་ནའང་དམིགས་བསལ་གྱི་རྒྱུ་རྐྱེན་མེད་ན། སུམ་རྟགས་དག་གསུམ་གི་རྩ་བ་དང་འགལ་རྒྱུ་མེད་དེ། ཁྱེད་རང་གིས་བྱ་བ་གང་ཞིག་བསྒྲུབ་བཞིན་ཡོད་པ་དང་། དེ་སྒྲུབ་དགོས་དོན་གང་ཡིན་པ་གསལ་པོར་ཤེས་དགོས།

བཅོ་ལྔ་། རྩོམ་གྱི་འགོ་དང་མཇུག་ལེགས་པོར་འབྲི་དགོས།

རྩོམ་གྱི་འགོ་དང་མཇུག་ནི། རྩོམ་ཡིག་འབྲི་སྐབས་གལ་འགངས་ཆེ་ཤོས་དེ་ཡིན་ལ། ལྷག་པར་དུ་འགོ་ཡག་པོ་འབྲི་དགོས་པ་ཡིན་ཏེ། གལ་ཏེ་ཁྱེད་ཀྱིས་གཏམ་རྒྱུད་འགོ་འཛུགས་སྐབས་ཀློག་པ་པོའི་ཡིད་སེམས་འགུགས་མ་ཐུབ་ན། ཁོང་ཚོས་སྤྱིར་ན་ཨུ་ཚུགས་ཀྱིས་རྩོམ་ཡིག་ཧྲིལ་པོ་ཀློག་མི་སྲིད་པ་ཡིན། དེར་བརྟེན་དུས་ཚོད་མང་པོ་བེད་སྤྱད་ནས་ཇི་ལྟར་བྱས་ཏེ་རྩོམ་ཡིག་གི་འགོ་ལེགས་པོ་འཛུགས་དགོས་པར་བསམ་གཞིགས་བྱེད་དགོས་ལ། གལ་ཏེ་ཀློག་པ་པོས་ཁྱེད་རང་གི་རྩོམ་འགོར་ཡིད་དབང་འཕྲོག་ན། ཁོང་ཚོས་མུ་མཐུད་ཁྱེད་རང་གི་རྩོམ་ཡིག་གི་ནང་དོན་ལྟ་སྲིད། གལ་ཏེ་རྩོམ་གྱི་འགོ་མཇུག་གཉིས་ཀ་ལེགས་པོ་ཞིག་བྲིས་ཡོད་ན། ཀློག་པ་པོས་ཁྱེད་རང་གི་རྩོམ་ཡིག་སྐོམ་པ་ཆུ་འདོད་ལྟར་རེ་སྒུག་བྱ་ངེས། 

རྩོམ་ཡིག་འདི་ཡོངས་ཁུངས་གང་ནས་ཡིན་མིན་མ་ཤེས་ཀྱང་། ལོ་མང་སྔོན་ནས་བདག་གི་ཁ་པར་ནང་དུ་ཉར་ཚགས་བྱས་ནས་ཡོད་པས་ད་རེས་ཞུ་དག་དང་བཅས། རྩོམ་ཡིག་ཐོག་མར་འབྲི་འགོ་རྩོམ་པའི་ལས་དང་པོའི་རིགས་ཅན་རྣམས་ལ་ཕན་རླབས་སུ་དམིགས་ནས་སྤེལ་བ་དགེའོ།།