དང་པོ། ཁྱེད་རང་གིས་གོང་དུ་བྲིས་པ་ལྟར། སྟོན་པའི་འཁྲུངས་ལོ། ༨༠༠ དང་། འདས་ལོ། ༨༨༡ ཟེར་ཡོང་དུས། དེ་གཉིས་ཀ་སྤྱི་ལོའི་སྔོན་ལོར་ཡིན་པར་སྨོས་མ་དགོས། འོན་ཀྱང་ཡ་མཚན་པ་ལ་དེ་གཉིས་རྦད་མགོ་ལྡོག་སྟེ། སྟོན་པ་ཉིད་ཐོག་མར་མྱ་ངན་ལས་འདས་ནས་གཟོད་སྐུ་འཁྲུངས་པ་ལྟ་བུའི་དུས་ཚིགས་སུ་འཁྲུལ་སྐྱོན་གྱི་ཉེས་པ་ཆེན་པོ་ཤོར་འདུག 😆😅😂 མདོ་དོན་ཁྱེད་རང་གིས་སྟོན་པའི་འཁྲུངས་ལོ་རྩི་ཤེས་མི་འདུག
དེ་མ་ཤེས་པའི་རྩ་བ་གང་ལ་ཐུག་ན་«སྤྱི་ལོའི་སྔོན་གྱི་ལོ་»དེ་རྩི་ཤེས་མིན་ལ་རག་ལས་པ་རེད། ལོ་ཚིགས་བེད་སྤྱོད་དུས་གང་ཟག་གང་ཞིག་དུས་གང་དུ་འཁྲུངས་འདས་ཐད་གཞིག་པའི་རྩ་བའི་སྒྲོམ་གཅིག་ནི། «སྤྱི་ལོ་»དང་«སྤྱི་ལོའི་སྔོན་གྱི་ལོ་»གཉིས་རྩི་སྟངས་ཤེས་མ་ཤེས་ལ་རག་ལས་ཡོད།
དེ་བཞིན་འཁྲུངས་འདས་གཏན་འབེབས་སྐབས་ཀྱང་དེ་གཉིས་རྩ་འཛིན་བྱས་ཏེ་ཇི་བཞིན་གསལ་སྟོན་བྱ་དགོས་པ་ཡིན།
སྤྱི་ལོ་རྩི་སྟངས་ནི། ཡེ་ཤུ་མ་ཤི་ཀ་འདས་པའི་ལོ་ཚུན་ཆད་ནས་ལུགས་འབྱུང་དུ་རྩི་དགོས།
སྤྱི་ལོའི་སྔོན་ལོ་རྩི་སྟངས་ནི།
ཡེ་ཤུ་མ་ཤི་ཀ་འདས་པའི་ལོ་སྔོན་མ་དེ་ནས་ཡར་ལུགས་ལྡོག་ཏུ་རྩི་དགོས།
དེ་ལྟར་བྱས་ཚེ་སྟོན་པའི་མྱ་ངན་ལས་འདས་པའི་ལོ་དེ་སྤྱི་ལོའི་སྔོན་ལོ་ ༨༨༡ ཡིན་པ་དང་ཁོང་དགུང་ལོ་ ༨༡ བར་བཞུགས་ཡོད་པར་བདུད་འཇོམས་ཆོས་འབྱུང་ལས་གསུངས་ཡོད་ཀྱང་།
འཁྲུངས་ལོ་གསུངས་མེད་པས་དེ་ནི་འདས་ལོ་དེ་ནས་ཡར་ལུགས་ལྡོག་གིས་བརྩིས་པའི་སྤྱི་ལོ་སྔོན་ལོ་ ༩༦༡ ལ་ཏག་ཏག་བབས་ཡོད།
གཉིས་པ། "གནས་བརྟན་སྡེ་པའི་ལུགས་ལྟར་ན།
ལྕགས་འབྲུག་ ༨༨༡ ལོ་ནས་ད་ལྟའི་ ༢༠༢༠ བར་ ༢༥༦༤ སོང་ཟིན།" ཞེས་བཤད་པ་དེར་གཞིགས་ན་སྡོམ་རྩིས་གཏན་ནས་མ་རྒྱབ་པར་རང་གར་ཡིན་ཤག་གིས་བྲིས་པའི་ལྷད་སྐྱོན་ཤོར་འདུག
😆😅😂
གནས་བརྟན་སྡེ་པའི་ལུགས་ལ་ད་ཆ་སྟོན་པ་མྱ་ངན་ལས་འདས་ནས་ལོ་ངོ་ ༢༥༦༤ འཁོར་བ་ཡིན་ཀྱང་།
སྟོན་པའི་འདས་ལོ་ནི་སྤྱི་ལོའི་སྔོན་གྱི་ལོ་ ༨༨༡ པར་འདོད་པ་མ་ཡིན་ཏེ། སྤྱི་ལོའི་སྔོན་གྱི་ལོ་ ༥༤༤ པར་རྩི་བ་ཡིན་པའི་ཕྱིར་དང་། སྤྱི་ལོའི་སྔོན་གྱི་ལོ་ ༥༤༤ དེ་ནས་ད་ལོ་ ༢༠༢༠ བར་བསྡོམས་པས་ལོ་ངོ་ཇི་ཙམ་སོང་ཡོད་ཅེས་ན། ལོ་ངོ་ ༢༥༦༤ ཏག་ཏག་ཕྱིན་ཡོད་པའི་ཕྱིར་རོ། །དེས་ན་ ༨༨༡ སྟེང་དུ་ ༢༠༢༠ བསྣན་པས་ ༢༥༦༤ ཟིན་ཅེས་བཤད་པ་ནི་ཧ་ཅང་དགད་མོའི་གནས་སུ་ཐལ་ལོ།།
གསུམ་པ། "ཕུག་ལུགས་ལྟར་ན། སྤྱི་ལོའི་སྔོན་ ༩༦༠ ལོར་འཁྲུངས།" ཞེས་པ་དེ་ཡང་ཕུག་ལུགས་ནང་གསེས་ཀྱང་འདོད་ཚུལ་མི་མཐུན་པ་མང་པོ་ཡོད་པས།
གང་གི་དབང་དུ་བྱས་མིན་གསལ་ཁ་མི་འདུག བདུད་འཇོམས་ཆོས་འབྱུང་གཞིར་བྱས་ན།
སྟོན་པ་མཆོག་དགུང་གྲངས་ཁྱོན་ ༨༡ བར་བཞུགས་ཡོད་པ་དང་སྤྱི་ལོའི་སྔོན་ལོ་ ༨༨༡ ལོར་གཤེགས་པར་བཞེད་ན། སྟོན་པའི་འཁྲུངས་ལོ་དེ་ ༩༦༡ ཏག་ཏག་ཆགས་ཡོད། ད་དུང་དཔྱོད་ཞིབ་བྱོས་དང་།
བཞི་པ། "དེ་གཉིས་ཀྱི་བར་ལོ་གྲངས། ༣༣༧ ཁྱད་ཡོད་པར་རྒྱ་བོད་ཚིག་མཛོད་ཆེན་པོ་ལས་གསུངས་སོ།།" ཞེས་པ་ལྟར་གྱི་དེ་གཉིས་དེ་གང་ལ་ངོས་བཟུང་དགོས་མིན་གསལ་པོ་བྲིས་མིན་འདུག
གཅིག་བྱས་ན་གང་ལ་ངོས་བཟུང་དགོས་མིན་མཁྱེན་གྱི་ཡོད་རྒྱུ་རེད།
ཡིན་ནའང་བྲི་མ་ཤེས་པ་འདྲ།
དེས་ན་དེ་གཉིས་ཞེས་པ་ནི་ཕུག་ལུགས་དང་གནས་བརྟན་སྡེ་པ་གཉིས་ཏེ།
དེ་ལྟར་སྡེ་གཉིས་ཀྱི་སྟོན་པའི་འཁྲུངས་འདས་ཀྱི་ལོ་ཚིགས་བཞེད་ཚུལ་ལ་ཕན་ཚུན་ལོ་གྲངས་ ༣༣༧ གྱིས་ཁྱད་པར་ཤོར་ཡོད་པ་དེ་རེད།
ལྔ་པ།
"བསྟན་པའི་གནས་ཚད་ལྔ་སྟོང་དུ་གནས་པར་བཤད་པ་ལས་ད་ལྟའི་ ༢༠༢༠ བར་ལོ་ ༢༠༩༡ སོང་ཟིན། ལྷག་མ་ ༢༩༠༩ ལྷག་ཡོད།" 😟 ཅེས་པ་འདི་ཡང་ཡག་པོ་བརྩིས་མི་འདུག་ལ། བཞེད་པ་གཉིས་པོ་གང་གི་དབང་བཙན་དུ་བྱས་མིན་སྐོར་ཡང་གསལ་བཤད་བྱས་མི་འདུག དེས་ན་གནས་བརྟན་སྡེ་པའི་དབང་དུ་བྱས་ན་སངས་རྒྱས་ཀྱི་བསྟན་པའི་གནས་ཚད་ལོ་ངོ་ལྔ་སྟོང་དུ་གནས་པ་ལས།
ད་ལོ་ ༢༠༢༠ བར་ཁྱོན་ལོ་གྲངས་ ༢༥༦༤ སོང་ཟིན་ཡོད་ཅིང་། ལྷག་མ་ ༢༤༣༦ ལྷག་ཡོད། དེ་བཞིན་ཕུག་ལུགས་ཀྱི་དབང་དུ་བྱས་ན།
ད་ལོ་ ༢༠༢༠ བར་ཁྱོན་ལོ་གྲངས་ ༢༠༩༡ སོང་ཡོད་པ་དང་། དེའི་འཕྲོས་ཁྱོན་ལོ་ ༢༠༩༩ ལྷག་ཡོད། འོ་དེ་ལྟར་ཤན་འབྱེད་ཀྱིས་ཕབ་ན་ཅི་འདྲ་ར་ཡག་གི་ཡ། ཧ་ཧ་ཧ་་་་་
གདན་ས་གཅིག་པའི་ཆོས་གྲོགས་ཤིག་ནས་རང་ཉིད་ཀྱི་འཕྲིན་ཕྲན་མདུན་ངོས་སུ་བདུད་འཇོམས་ཆོས་འབྱུང་གི་ལེའུ་བརྒྱད་པ་བསྟན་རྩིས་སྐོར་ལས་འཕྲོས་ནས་རྩིས་ནོར་རྐྱང་རྐྱང་བརྒྱབ་འདུག་པའི་ཡིག་མང་ཞིག་བརྩེགས་འདུག་པ་དེར་རྩེད་མཚར་དང་འབྲེལ་ཅུང་ཕན་ན་བསམ་པའི་ཀུན་སློང་ཆུང་ངུ་ཞིག་གིས་མཆན་དུ་བཀོད་པའོ།།
No comments:
Post a Comment