ཀུན་མཁྱེན་ཆེན་པོའི་འདས་ལོ་ལ་ཡོངས་གྲགས་བོད་རབ་བྱུང་ ༥ ས་སྤྲེལ་སྤྱི་ལོ་ ༡༣༠༨ ལ་འཁྲུངས་ཤིང་། དགུང་ལོ་ ༥༦ བཞེས་པ་རབ་བྱུང་ ༦ ཆུ་ཡོས་སྤྱི་ལོ་ ༡༣༦༣ ལ་འདས་པར་རྣམ་ཐར་དང་ཚིག་མཛོད་ཀུན་མཐུན་པ་ལས་མི་འདྲ་བ་མེད་མོད། གྲུབ་མཐའ་མཛོད་ལེའུ་གཉིས་པར། སྔར་ལོ་ཅི་ཙམ་སོང་ཞེ་ན། སངས་རྒྱས་མྱ་ངན་ལས་འདས་ནས། མེ་ཕོ་རྟའི་བར་ལ་ལོ་སུམ་སྟོང་ལྔ་བརྒྱ་དང་བཅུ་དྲུག་སོང་། ཕྱིན་ཆད་ལོ་དགུ་བརྒྱ་དང་བརྒྱད་ཅུ་རྩ་བཞི་ཡོད་དོ། །ཞེས་དང་། དེ་ནས་བརྩིས་པས་དེང་སང་མེ་ཕོ་རྟའི་བར་ལ་ལོ་སུམ་བརྒྱ་ཉི་ཤུ་རྩ་བཞི་སོང་སྟེ། དེའི་གོང་མ་རྣམས་དང་བསྡོམས་པས་སུམ་སྟོང་ལྔ་བརྒྱ་དང་བཅུ་དྲུག་འདས་སོ། །ཞེས་མེ་ཕོ་རྟ་ཞེས་ཐེངས་གཉིས་བྱུང་ཞིང་། ལོ་དེ་ནི་སྤྱི་ལོ་ ༡༣༦༦ ལོར་འཁེལ་བས་དེ་ལྟར་ན་དེ་དུས་ཀུན་མཁྱེན་དགུང་ལོ་ ༥༩ ཡིན་དགོས།
དེ་བཞིན་དུ་མཛོད་ཆེན་བདུན་གྱི་དཀར་ཆག་རིན་ཆེན་མེ་ལོང་ལས། ཤིང་མོ་ཡོས་ཀྱི་ལོར་མཆིམས་ཕུའི་གནས་སུ་མཁའ་འགྲོ་སྙིང་ཐིག་ཉིད་དགོངས་པའི་གཏེར་དུའང་། བབས་ནས་བརྗོད་བྱའི་དོན་མ་ལུས་ཐུགས་ལ་ཤར་ཏེ།
ཟབ་ཅིང་རྒྱ་ཆེ་བ་ཤོག་སྐྱ། ཡང་ཟབ་རྣམས་ཤོག་འདྲ། ཤིན་ཏུ་ཡང་ཟབ་རྣམས་ཤོག་སེར་ཏེ་སྐོར། གསུམ་དུ་འདུས་པའི་མཁའ་འགྲོ་ཡང་ཏིག་ཆོས་སྡེ་ལྔ་བཅུ་རྩ་ལྔ་པ་མཛད།
ཅེས་དང་། མཁའ་འགྲོ་སྙིང་ཐིག་གི་གཏེར་འབྱུང་རིན་པོ་ཆེའི་ལོ་རྒྱུས་ལས།
དེ་ནས་ཤིང་མོ་ཡོས་ཀྱི་ལོའི་དགུན་གཅིག་མཆིམས་ཕུའི་རི་ལ་སྒྲུབ་པ་མཛད་ཅིང་རི་མོ་ཅན་གྱི་གནས་སུ་སྐལ་ལྡན་ཕོ་མོ་བརྒྱད་ལ་གསང་བ་སྙིང་ཏིག་གི་དབང་ཁྲིད་བྱེད་དུས་གློ་བུར་དུ་མཁའ་འགྲོ་དང༌། བཀའ་སྲུང་མང་པོ་བབས་ཏེ་མཁའ་འགྲོ་སྙིང་ཏིག་གི་ཆོས་བཀའ་འབྱེད་པར་བསྐུལ་ནས།
རྣལ་འབྱོར་པ་འོད་ཟེར་གོ་ཆ་དཔེ་ལེན་དུ་བཏང་སྟེ་འཁོར་དུས། མཁའ་འགྲོའི་འདུ་བ་དཔག་ཏུ་མེད་པ་དེ་ན་ཡོད་པའི་རྣལ་འབྱོར་པ་ཀུན་གྱིས་མཐོང་ཞིང་།
ཞེས་གསུངས།
འདི་གཉིས་ན་བྱུང་བའི་ཤིང་ཡོས་དེ་རབ་བྱུང་ ༥ ཤིང་མོ་ཡོས་ལ་ཟེར་ན། སྤྱི་ལོ་ ༡༣༡༥ ཀུན་མཁྱེན་དགུང་ལོ་ ༧
ཡིན་པས་མི་འཐད་ཅིང་། རབ་བྱུང་ ༦ ཤིང་མོ་ཡོས་ལ་ཟེར་ན།
སྤྱི་ལོ་ ༡༣༧༥ ཀུན་མཁྱེན་དགུང་ལོ་ ༦༨ ཡིན་དགོས་པས། རྒྱ་ཆའི་ཡི་གེ་གཞན་འདྲ་རྙེད་ན་བདག་ལ་མཁོ་སྤྲོད་གནང་རོགས། ཞེས་སྤྱི་ལོ་ ༢༠༡༥ ཟླ་ ༢ ཚེས་ ༦ བོད་ཤིང་རྟ་ལོའི་ཟླ་ ༡༢
ཚེས་ ༡༨ ཡོངས་གྲགས་ཀློང་ཆེན་འདས་མཆོད་ཉིན་མོར་དགེ་འདུན་རབ་རྒྱས་ཀྱིས།
No comments:
Post a Comment