བྱང་ཆུབ་སེམས་དཔའ་སའི་སྙིང་པོའི་བདག་བསྐྱེད་འཁྱེར་བདེ།

སྐྱབས་སེམས་སྔོན་དུ་འགྲོ་བས། བདག་བསྐྱེད་ནི།

༈ པདྨ་ཉི་ཟླའི་གདན་སྟེང་དུ། །རང་ཉིད་ས་སྙིང་ལི་ཁྲིའི་མདོག།
ཕྱག་གཉིས་གཡས་པས་མཆོག་སྦྱིན་ཚུལ། །ནོར་བུ་མེ་འབར་བསྣམས་པ་དང་།།

གཡོན་པས་མཉམ་བཞག་བུམ་པ་འཛིན། །ཞབས་གཉིས་དཀྱིལ་མོ་ཀྲུང་གིས་བཞུགས།།

སྐུ་ལུས་ཡོངས་རྫོགས་ལོངས་སྐུའི་ཆས། །བཅུ་གསུམ་གྱིས་ནི་བརྒྱན་པར་གྱུར།།

བསྙེན་པ་ནི།

བྱང་ཆུབ་སེམས་དཔའ་སེམས་དཔའ་ཆེན་པོ་ས་ཡི་སྙིང་པོ་ལ་ཕྱག་འཚལ་ལོ།།

མཆོད་དོ། །སྐྱབས་སུ་མཆིའོ།།

རང་མོས་ལྟར་བསྙེན་གྲངས་གསོག

མཐར་བསྔོ་བ་ནི།

དགེ་བ་འདི་ཡིས་མྱུར་དུ་བདག །ས་ཡི་སྙིང་པོ་འགྲུབ་གྱུར་ནས།།

འགྲོ་བ་གཅིག་ཀྱང་མ་ལུས་པ། །དེ་ཡི་ས་ལ་འགོད་པར་ཤོག།

ས་ཡི་སྙིང་པོ་ཁྱེད་སྐུ་ཅི་འདྲ་དང་། །འཁོར་དང་སྐུ་ཚེའི་ཚད་དང་ཞིང་ཁམས་དང་།།

ཁྱེད་ཀྱི་མཚན་མཆོག་བཟང་པོ་ཅི་འདྲ་བ། །དེ་འདྲ་ཁོ་ནར་བདག་སོགས་འགྱུར་བར་ཤོག།

ཁྱེད་ཉིད་བསྙེན་ཞིང་གསོལ་བ་བཏབ་པའི་མཐུས། །བདག་སོགས་འགྲོ་བ་རིགས་དྲུག་སེམས་ཅན་ཀུན།།

ཚེ་དཔལ་བསོད་ནམས་ཡེ་ཤེས་རྒྱས་འགྱུར་ཞིང་། །གསོལ་བ་ཅི་བཏབ་འབད་མེད་ལྷུན་འགྲུབ་ཤོག།

ཅེས་དེང་སང་དཔལ་བླ་རུང་སྒར་ནས་ས་སྙིང་དགེ་སྐུལ་གྱི་མཛད་པ་ཤུགས་ཆེར་སྐྱོང་བཞིན་པར་བརྟེན། ས་ཡི་སྙིང་པོའི་བསྙེན་གྲངས་གསོག་མཁན་རྣམས་ཀྱིས་ས་ཡི་སྙིང་པོ་སྒོམ་ཐབས་བསྐྱེད་རིམ་གྱི་རྣལ་འབྱོར་དགོས་རབས་གླེང་མཁན་འགའ་བྱུང་བར་བརྟེན། བླ་རུང་སྒར་ཉིད་ནས་འགྲེམ་སྤེལ་གནང་བཞིན་པའི་ས་ཡི་སྙིང་པོའི་སྐུ་པར་བྱིན་ཅན་དེ་ཉིད་དང་མཐུན་པའི་བསྐྱེད་རིམ་གྱི་འདོན་ཆ་འདྲ་ཕན་ཚུན་བཙལ་ཀྱང་མ་རྙེད་པས། དེང་འདིར་ཆོས་པའི་གཟུགས་བརྙན་ཙམ་འཛིན་པ་འཇིགས་མེད་དགྲ་འདུལ་དབང་པོར་འབོད་པས་ཀུན་ལྡན་ཞེས་པ་རབ་བྱུང་བཅུ་བདུན་པའི་ས་ཕོ་བྱི་བའི་ལོའི་དབོ་ཟླ་བའི་དཀར་ཕྱོགས་དགའ་བ་དང་པོར་བྲིས་པ་དགེའོ།།