སྔགས་བླ་མེད་ཐེག་པའི་རིམ་གཉིས་ལམ་གྱི་རྣམ་གཞག་ལ་ཅུང་ཙམ་དཔྱད་ཁུལ་གྱིས་པ་སྔགས་གསར་བྱིས་པའི་ཀུན་རྟོག་གི་གཟེགས་མ་ཐལ་ཐུལ།

ཡེ་ཐོག་དང་པོའི་མགོན་པོ་དབྱིངས་ཡེ་དབྱེར་མེད་རིགས་ཀུན་ཁྱབ་བདག་དཔལ་མཆོག་ཀུན་བཟང་ཡབ་ཡུམ་འདུ་འབྲལ་མ་མཆིས་པའི་དཀྱིལ་འཁོར་ཆེན་པོར་ཕྱག་འཚལ་ལོ།།

དེ་ལ་འདིར་རྫོགས་པ་ཆེན་པོའི་རིམ་གཉིས་ལམ་གྱི་རྣམ་གཞག་གི་སྐོར་ལ་ཅུང་ཙམ་དཔྱད་ཁུལ་བགྱི་བ་ལ། དེ་ཡང་[1]རྩ་རྒྱུད་ཕྱི་མ་ལས། བསྐྱེད་པའི་རིམ་པ་ཅི་ཞིག་ཡིན། །རྫོགས་པའི་རིམ་པའང་གང་ཞིག་ལགས། །ཞེས་ཕྱོགས་བཅུ་དུས་བཞིའི་རྒྱལ་བ་བདེ་གཤེགས་སྲས་འཁོར་དང་བཅས་པ་མ་ལུས་པ་ཐམས་ཅད་ཀྱིས་དཀྱིལ་འཁོར་གྱི་གཙོ་བོ་བཅོམ་ལྡན་འདས་དཔལ་ཀུན་ཏུ་བཟང་པོ་ལ་གསོལ་བ་བཏབ་པ་ལྟར། བཅོམ་ལྡན་འདས་ཀུན་ཏུ་བཟང་པོས་ཀྱང་བདེ་གཤེགས་སྲས་འཁོར་དང་བཅས་པ་ལ་བཀའ་སྩལ་པ་ཇི་ལྟར་ན། [2]དེ་ཉིད་ལས། ལྷ་ཡི་རྣམ་པའི་རྣལ་འབྱོར་ལ། །ཟླ་བ་རྡོ་རྗེ་སོགས་རིམ་པས། །བསྐྱེད་པའི་རིམ་པ་བརྗོད་པའོ། །རང་བཞིན་གྲུབ་པ་རྫོགས་པ་ཡིས། །རིམ་པར་བཤད་པར་རྣལ་འབྱོར་རོ། །ཞེས་བཀའ་སྩལ་དོན་ལྟར། ལར་ནས་སྔགས་གསར་གྱི་བྱིས་པ་བདག་ལྟ་བུས། རྒྱལ་དགོངས་ཤིན་ཏུ་ཟབ་པ་བས་ཀྱང་ཟབ་པ་འདི་ལྟ་བུ་ལ། མ་རིག་པའི་ལིང་ཏོག་གི་སྒྲོ་བཏགས་ཅི་རིགས་པས། མི་ཤེས་ཤེས་ཁུལ་བགྱི་བར་མི་འོས་ཀྱང་། ཆོས་མཆེད་དག་ལ་ཕན་པར་འགྱུར་པའི་རེ་དོགས་གང་ཡང་མེད་ལ། རང་ཉིད་ཀྱི་བློ་གྲོས་ཀྱི་སྒོ་མོ་ཕྱེ་བཏུབ་ན་འགྲིག་བསམ་པས། གོང་གི་གསོལ་བ་དང་བཀའ་སྩལ་གཉིས་པོ་རང་གྲོས་རང་ལ་སྡུར་བར་བྱ་བའི་ཕྱིར། བསྐྱེད་པའི་རིམ་པ་དང་རྫོགས་པའི་རིམ་པ་གཉིས་ཀྱི་དཔྱད་ཁུལ་ཞིག་བགྱི་བར་འདོད།

དེ་ལ་དང་པོ་བསྐྱེད་པའི་རིམ་པའི་རྣམ་གཞག་ལ།

རྣམ་གཞག་རྣམ་པ་དགུས་གཏན་ལ་དབབ་པར་བྱ་སྟེ། དང་པོ་བསྐྱེད་རིམ་གྱི་ངོ་བོ་ནི། [3]འོད་གསལ་སྙིང་པོ་ལས་གསུངས་པ་ལྟར། རང་བཞིན་གཞི་རྒྱུད་ཀྱི་དོན་ངེས་པའི་ལྟ་བ་དང་རྗེས་སུ་མཐུན་པར་སྣང་སྲིད་དག་མཉམ་གྱི་ཚུལ་ལ་བློས་བཅོས་ཞིང་གོམས་པའི་ཚུལ་གྱིས་འཇུག་པའི་རྣལ་འབྱོར་ཞེས་བྱ། དེས་ནི་མཚན་ཉིད་ཀྱང་གོ་ཆོད་པ་ཡིན་ཏེ། ཟུར་དང་པོ་རང་བཞིན་ནས་འཇུག་པ་ཞེས་པའི་བར་རྫོགས་རིམ་བཅད། གཉིས་པ་རྣལ་འབྱོར་ཞེས་པས་བསྐྱེད་རིམ་དེ་ཉིད་ལམ་མ་ཞུགས་ནས་སྔགས་ཕྱི་རྒྱུད་ཐེག་པའི་བར་གྱི་རྒྱུད་ལ་ཡོད་པར་བཅད་དོ།།

གཉིས་པ་སྒྲ་བཤད་ནི། ལེགས་སྦྱར་སྐད་དུ་ཨུཏྤཱཏ་ཀྲམ་ཞེས་པའི་སྒྲ་ལས་དྲངས་ན། མ་དག་པའི་སྣོད་བཅུད་ཀྱི་སྣང་བ་སྣ་ཚོགས་པ་ཐམས་ཅད། བཅོས་མའི་བློས་དག་པ་ལྷའི་སྣང་ཞེན་དུ་འདུ་བྱེད་ཀྱི་རྩོལ་བ་དང་བཅས་པས་སྦྱོང་ཞིང་། དེའི་དཀྱིལ་འཁོར་དུ་བསྒོམ་པར་བྱེད་པའི་སྐྱེ་གནས་བཞིའི་བག་ཆགས་དང་མཐུན་པར། མངོན་བྱང་ལྔ་བསྐྱེད་དམ་བཞི་བསྐྱེད་དང་རྡོར་ཆོག་གསུམ་བསྐྱེད་ལ་སོགས་པའི་རིམ་པ་ཅན་ཞིག་གོ།

གསུམ་པ་རྣམ་གྲངས་ནི། རྗེས་སུ་དཔག་པའི་རྣལ་འབྱོར་དང་། བཅོས་མའི་ལམ་དང་། ཀུན་བརྟགས་ཀྱི་རྣལ་འབྱོོར་དང་། སྣང་བཅས་ཀྱི་རྣལ་འབྱོར་ཞེས་ཀྱང་བྱའོ།།

བཞི་པ་ཁྱད་ཆོས་ནི། སྔ་འགྱུར་རིག་འཛིན་བརྒྱུད་པའི་ཞལ་ལུང་རྣམས་སུ་ཇི་སྐད་དུ་ན་རྣམ་པ་བཞི་སྟེ། ཆོ་གའི་ཁྱད་པར་རྒྱུད་ནས་གསུངས་པའི་བསྐྱེད་ཆོག་ཚང་བ་དང། རང་འབྲས་ཀྱི་ཁྱད་པར་སྔགས་ཀྱི་མཐུ་བསྐྱེད་ནུས་པ་དང། ངོ་བོའི་ཁྱད་པར་ཞུ་བདེ་དང་སྟོང་ཉིད་ཀྱི་རང་བཞིན། བྱེད་ལས་ཀྱི་ཁྱད་པར་རྫོགས་རིམ་གྱི་སྨིན་བྱེད་དུ་འགྲོ་བ་བཅས་སོ།།

ལྔ་པ་དབྱེ་བ་ལ། ཉམས་སུ་བླང་བྱའི་སྒོ་ནས་དབྱེ་ན། སྟོང་པ་ཆེན་པོ། སྙིང་རྗེ་སྒྱུ་མ། པྱག་རྒྱ་གཅིག་པ། ཕྱག་རྒྱ་སྤྲོས་བཅས། ཚོམ་བུ་ཚོགས་སྒྲུབ་བཅས། རྣལ་འབྱོར་གྱི་རིམ་པ་ལྔའི་ཚུལ་དུ་བསྒོམ་པ་ཡོད་པ་དང་། ཡང་མངོན་བྱང་ལྔ་བསྐྱེད་དམ་བཞི་བསྐྱེད་སོགས་རྒྱས་པ། རྡོར་ཆོག་གསུམ་བསྐྱེད་འབྲིང་པོ། སྔགས་ཙམ་བསྐྱེད་པ་བསྡུས་པ།  སྐད་ཅིག་དྲན་རྫོགས་ཤིན་ཏུ་བསྡུས་པ་བཅས་སུ་བསྒོམ་པ་བཞི་དང། ཡང་སྐུ་གསུང་ཐུགས་མཛད་པ་དང་བཅས་པའི་ཕྱག་རྒྱ་བཞིས་བསྒོམ་པ་སོགས་ཡོད་པ་དང་། ཉམས་སུ་ལེན་ཚུལ་གྱི་སྒོ་ནས་དབྱེ་ན། བསྐྱེད་པ་སྐུའི་རྣལ་འབྱོར་དང་། བཟླས་པ་གསུང་གི་རྣལ་འབྱོར། ཏིང་འཛིན་ཐུགས་ཀྱི་རྣལ་འབྱོར་བཅས། རྣལ་འབྱོར་གྱི་རིམ་པ་གསུམ་དུ་ཡོད།

དྲུག་པ་ཇི་ལྟར་བསྐྱེད་ཚུལ་གྱི་རིམ་པ་ལ་རྣམ་པ་གཉིས་ཏེ། དང་པོ་རྒྱུད་སྡེ་ལྟར་སྒོམ་ཚུལ་ནི། ཐོག་མར་རིམ་པ་ཀུན་གྱི་འཇུག་སྒོ་དབང་བཞིས་སྨིན་པར་བྱས་ནས། ངོ་བོ་དག་རྫོགས་སྨིན་གསུམ་ཚང་བས། རྒྱུ་ཏིང་འཛིན་རྣམ་གསུམ་གྱིས་ཁོག་དབུབ། རྐྱེན་ཆོ་གའི་ཐོག་ཐ་བར་གསུམ་དུ་བསྙེན་གྲུབ་ཡན་ལག་བཞིས་གཞུང་བསྲང་ཞིང་། སྲོག་སྡོམ་གཟེར་བཞིས་རྒྱས་བཏབ། འབྲས་བུ་རྟེན་བརྟེན་པ་དང་བཅས་པའི་དཀྱིལ་འཁོར་བསྐྱེད་པས། དེ་ལ་ཡེ་ཤེས་པ་སྤྱན་དྲངས་ཤིང་བཞུགས་གསོལ་ཕྱག་འཚལ་མཆོད་བསྟོད་བཟླས་སྔགས་རྗེས་ཆོག་དང་བཅས་པའི་ལས་རིམ་རྣམས་བསྟར་ཆགས་སུ་བྱ། དེ་ལྟར་དཀྱིལ་འཁོར་བསྐྱེད་པའི་ཐབས་སུ་མངོན་བྱང་ལྔ་བསྐྱེད་དམ་བཞི་བསྐྱེད་དང་རྡོར་ཆོག་གསུམ་བསྐྱེད་ལ་སོགས་པའི་ཚུལ་གྱིས་བསྐྱེད་པར་བྱ་བ་ཡིན་ལ། དམིགས་པ་ཀུན་གྱི་གཙོ་བོ་ལྷའི་སྣང་ཞེན་ལ་བསླབ་པར་བྱ་བ་གལ་ཆེ་བ་ཡིན། གཉིས་པ་སྒྲུབ་སྡེའི་དབང་དུ་བྱས་ན། བདག་གི་སྲས་སུ་གཞན་བྱ་བ་ལ་ལྔ་དང་། གཞན་གྱི་སྲས་སུ་བདག་བྱ་བ་ལ་བརྒྱད་ཅེས་དེ་ལྟར་རིམ་པ་གཉིས་ཀྱིས་བསླབ་པར་བྱ་བ་ཡོད་པ་རྒྱས་པར་ཡོན་ཏན་མཛོད་ཀྱི་རྩ་འགྲེལ་དག་ཏུ་གསུངས་པ་ལྟར་རོ།།

དེ་དག་ཐམས་ཅད་ཀྱང་བསྡུ་ན། སྣང་གྲགས་རྟོག་ཚོགས་གསུམ་གྱི་ཆོས་ཐམས་ཅད་ལྷ་སྔགས་ཆོས་ཉིད་གསུམ་གྱི་རོལ་པར་ཡེ་ནས་དག་པ་རབ་འབྱམས་སུ་གནས་པ། དེ་ལྟ་བུའི་ཟབ་གསང་སྐུ་ཡེ་འདུ་མེད་འབྲལ་མེད་ཀྱི་དཀྱིལ་འཁོར་ཆེན་པོའི་དོན་དང་མཐུན་པར། འདིར་ཡང་ལྷ་སྔགས་ཏིང་འཛིན་གསུམ་གྱི་རྣལ་འབྱོར་ཏེ། ལྷ་ནི་སྐུ་ཕྱག་རྒྱའི་རྣལ་འབྱོར། སྔགས་ནི་གསུང་བཟླས་པའི་རྣལ་འབྱོར། ཏིང་འཛིན་ནི་ཐུགས་འོད་གསལ་གྱི་རྣལ་འབྱོར་བཅས། དེ་ལྟར་རྣལ་འབྱོར་རྣམ་པ་གསུམ་གྱིས་རིམ་བཞིན། སྣང་སྲིད་དག་པ་རབ་འབྱམས་སྒྱུ་འཕྲུལ་དྲྭ་བའི་དཀྱིལ་འཁོར་ཆེན་པོ་ཇི་སྲིད་འཆར་བའི་བར་དུ་བསླབས་པས། ནམ་ཞིག་གི་ཚེ་ན་བསྐྱེད་རིམ་མཐར་ཕྱིན་པའི་འབྲས་རྟགས་མངོན་དུ་གྱུར་པ་ཡིན་ཏེ། དེའི་ཚེ་ན་དེ་ལྟ་བུའི་བསྐྱེད་རིམ་ལ་སྣང་སྲིད་གཞིར་བཞེངས་ཀྱི་བསྐྱེད་རིམ་ཞེས་བྱ་ཞིང་། རྫོགས་རིམ་སྨིན་བྱེད་དུ་འགྲོ་བའི་དངོས་རྒྱུ་དེ་མ་ཐག་མ་ཉིད་དུའང་སོང་བ་ཡིན།

བདུན་པ་སྤོང་བ་གང་གི་གཉེན་པོ་གང་བྱེད་ན། སྣ་ཚོགས་པའི་སྣང་བ་འབའ་ཞིག་ལ་བདེན་པར་ཞེན་པའི་སྒྲིབ་པ་རགས་པ་རྣམས་སྤོང་བ་གང་ཡིན་པ་དེའི་གཉེན་པོ་ཉིད་དུ་བྱེད་པ་ཡིན་ཏེ། [4]སེམས་ཉིད་ངལ་གསོ་ལས། ལས་དང་པོ་ཡིས་བསྐྱེད་རིམ་ཞེན་པ་དགག །སྣང་ལ་བདེན་པར་ཞེན་པའི་གཉེན་པོ་བྱེད། །ཅེས་གསུངས།

བརྒྱད་པ་བསྐྱེད་རིམ་དེ་སྔགས་བླ་མེད་ཀྱི་ས་མཚམས་གང་ནས་འབྱེད་ཅེས་ན། བསྐྱེད་རིམ་རྐྱང་པ་ནི་གཙོ་བོར་རིམ་གྱིས་པའི་དབང་དུ་བྱས་ན། ཚོགས་ལམ་ཆུང་འབྲིང་ཆེ་གསུམ་དུ་འབྱེད་དགོས་པ་ཡིན་ལ། སྤྱིར་ཚོགས་ལམ་པ་ཡིན་ན་བསྐྱེད་རིམ་པ་ཁོ་ན་ཡིན་པས་མ་ཁྱབ་སྟེ། དབང་པོ་ཡང་རབ་ཀྱི་དམ་པར་གྱུར་པའི་རྟོགས་གྲོལ་དུས་མཉམ་གྲོལ་ལམ་གཅིག་ཅར་པས། བསྐྱེད་རྫོགས་དབྱེར་མེད་ཟུང་འཇུག་གི་དཀྱིལ་འཁོར་ཆེན་པོས་ཚོགས་ལམ་དུ་སོན་པ་ལྟ་བུའོ།།

དགུ་པ་དགོས་པ་གང་ཡོད་ཅེ་ན། ཞི་གནས་ཀྱི་ཏིང་འཛིན་སྐྱེ་ཞིང་། བསོད་ནམས་ཀྱི་ཚོགས་རྫོགས་པས། གཟུགས་སྐུའི་སྒྲིབ་པ་སྦྱོང་བ་བཅས་ཀྱི་དགོས་པ་ཡོད།

གཉིས་པ་རྫོགས་པའི་རིམ་པའི་རྣམ་གཞག་ལ།

འདི་ལའང་རྣམ་གཞག་རྣམ་པ་དགུས་གཏན་ལ་དབབ་པར་བྱ་སྟེ། དང་པོ་ངོ་བོ་ནི། [5]འོད་གསལ་སྙིང་པོ་ལས་གསུངས་པ་ལྟར། ཐབས་ཀྱི་མན་ངག་ཟབ་མོས་གཞི་རྒྱུད་དག་མཉམ་ཆེན་པོོ་རང་གནས་ལྷུན་གྲུབ་ཀྱི་དཀྱིལ་འཁོར་མངོན་དུ་འཆར་བར་བྱེད་པའི་རྣལ་འབྱོར་ཞེས་བྱ། དེས་ཀྱང་མཚན་ཉིད་ཀྱི་གོ་ཆོད་པ་ཡིན་ཏེ། ཟུར་དང་པོ་ཐབས་ཀྱི་ཞེས་པ་ནས་བྱེད་པ་ཞེས་པའི་བར་གྱིས་བསྐྱེད་རིམ་བཅད་པ་དང། རྣལ་འབྱོར་ཞེས་པས་རྫོགས་རིམ་དེ་ལམ་མ་ཞུགས་ནས་སྔགས་ཕྱི་རྒྱུད་ཐེག་པའི་བར་གྱི་རྒྱུད་ལ་ཡོད་པར་བཅད་དོ།།

གཉིས་པ་སྒྲ་བཤད་ནི། ལེགས་སྦྱར་སྐད་དུ་སནྟི་ཀྲམ་ཞེས་པའི་སྒྲ་ལས་དྲངས་ན། སྣང་བ་སྣ་ཚོགས་པ་ཐམས་ཅད་ལྷར་སྣང་གི་བདག་ཉིད་དུ། མ་བཅོས་ལྷུན་གྱིས་གྲུབ་པའི་འཁོར་ལོར་གསལ་བར་རྫོགས་པས་དང། ད་དུང་ཡང་སྒོ་གསུམ་གྱི་སྙིགས་མ་གཅོད་པ་དང་། སྙིང་པོའི་དོན་ལ་འཇུག་པ་ཡོངས་སུ་མ་རྫོགས་པའི་ཕྱིར། དེ་རྫོགས་པའི་དོན་དུ་གཉུག་ལམ་ལྷན་ཅིག་སྐྱེས་པའི་ཡེ་ཤེས་ཉིད་ལ་གོམས་པས་རིམ་གྱིས་འཇུག་པ་ཅན་ཞིག་གོ།

གསུམ་པ་རྣམ་གྲངས་ནི། མངོན་སུམ་གྱི་རྣལ་འབྱོར་དང་། གཉུག་མའི་ལམ་དང་། ཡོངས་གྲུབ་ཀྱི་རྣལ་འབྱོར་དང། སྣང་མེད་ཀྱི་རྣལ་འབྱོར་ཞེས་སོགས་བྱའོོ།།

བཞི་པ་ཁྱད་ཆོས་ནི། འདིའང་སྔ་འགྱུར་རིག་འཛིན་བརྒྱུད་པའི་ཞལ་ལུང་རྣམས་ལས་ཇི་སྐད་གསུངས་པ་ལྟར། རྒྱུའི་ཁྱད་པར་རྡོ་རྗེའི་ལུས་ལ་གནད་དུ་བསྣུན་པ་དང། བྱེད་ལས་ཀྱི་ཁྱད་པར་རྩ་རླུང་ཐིག་ལེ་དབུ་མར་དག་པ་དང་། རྣམ་པའི་ཁྱད་པར་ལྷན་སྐྱེས་ཀྱི་བདེ་བ་སྟོང་གཟུགས་དང་ངོ་བོ་གཅིག་ཏུ་གྱུར་པའི་བདེ་སྟོང་ཟུང་དུ་འཇུག་པ་བཅས་ཀྱི་ཁྱད་པར་གྱི་ཆོས་རྣམ་པ་གསུམ་དང་ལྡན་པ་ཡིན་ནོ།།

ལྔ་པ་དབྱེ་བ་ལ། ཉམས་སུ་ལེན་ཚུལ་གྱི་སྒོ་ནས། ཡིད་ཀྱི་དམིགས་པ་དང་ལུས་ངག་གི་རྩོལ་བ་ལ་བརྟེན་པ་མཚན་བཅས་དང་། རྩོལ་བྲལ་མཚན་མ་མེད་པའི་རྫོགས་རིམ་གཉིས་སུ་དབྱེ་བ་ཡོད། དང་པོ་ལའང་སྤྱི་མགྲིན་སྙིང་ལྟེའི་འཁོར་ལོ་བཞིར་བརྟེན་གྱི་ཕྲ་ཐིག་གི་རྣལ་འབྱོར་དང། སྤྱི་མགྲིན་སྙིང་ལྟེའི་འཁོར་ལོ་བཞི་དང་དེེའི་སྟེང་མེ་རླུང་གི་རྐྱེན་གཉིས་བཅས་འཁོར་ལོ་དྲུག་བརྟེན་གྱི། སྟེང་སྒོའི་རྣལ་འབྱོར་དང་།  འོག་སྒོའི་རྣལ་འབྱོར་བཅས་གསུམ་དུ་ཡོད། ཡང་ཉམས་སུ་བླང་བྱའི་སྒོ་ནས་དབྱེ་ན། སྟོང་པའི་ཡེ་ཤེས་འོད་གསལ་དང། སྣང་བའི་ཡེ་ཤེས་སྒྱུ་ལུས། དེ་གཉིས་ཟུང་དུ་འཇུག་པའི་ཡེ་ཤེས་བཅས་གསུམ་དུ་ཡོད། ཡང་རྟེན་བརྟེན་པའི་སྒོ་ནས་དབྱེ་ན། རྟེན་རྩ་རླུང་ཐིག་ལེ་ལ་གནད་དུ་བསྣུན་པ་འཁྲུལ་འཁོར་བུམ་ཅན་ཕྲ་ཐིག་ཞུ་བདེ་ལྟ་བུ་དང། བརྟེན་པ་འོད་གསལ་གྱི་ཐིག་ལེ་ལ་གནད་དུ་བསྣུན་པ་སྟོང་གསལ་དང་ཐོད་རྒལ་ལྟ་བུ་གཉིས་བཅས་སུ་གསུངས། གཞན་ཡང་གསང་སྔགས་གསར་མའི་རྣལ་འབྱོར་ཆེན་པོའི་རྒྱུད་རྣམས་ཏེ། ཕ་རྒྱུད་གསང་བ་འདུས་པར། ངག་དབེན། སེམས་དབེན། སྒྱུ་ལུས། འོད་གསལ། ཟུང་འཇུག་བཅས་པའི་རིམ་པ་ལྔར་གསུངས་ཤིང་། རིམ་པ་ལྔ་པོ་འདི་ལ་བསྐྱེད་རྫོགས་གང་རུང་གི་ཆ་ཡོད་པར་བཞེད། མ་རྒྱུད་བདེ་མཆོག་འཁོར་ལོར། བདག་བྱིན་གྱིས་རླབས་པའི་རིམ་པ་དང་། སྣ་ཚོགས་རྡོ་རྗེའི་རིམ་པ། ནོར་བུ་འགེངས་པའི་རིམ་པ། ཛ་ལནྡྷ་རའི་རིམ་པ། བསམ་གྱིས་མི་ཁྱབ་པའི་རིམ་པ་བཅས་རིམ་པ་ལྔར་གསུངས་ཞིང་། གཉིས་མེད་རྒྱུད་དུས་འཁོར་ལས། སོར་སྡུད། བསམ་གཏན། སྲོག་རྩོལ། འཛིན་པ། རྗེས་དྲན། ཏིང་འཛིན་བཅས། སྦྱོར་བ་ཡན་ལག་དྲུག་ཏུ་གསུངས་པ་ཡོད་ལ། དེ་དག་ཀྱང་རྫོགས་རིམ་གྱི་ཡན་ལག་ཏུ་བསྡུ་བར་གསུངས། གཞན་ཡང་ཏིལླི་པའི་ཞབས་ཀྱིས་མཛད་པའི་ཆོས་དྲུག་གི་མན་ངག་དང་། ན་རོ་པའི་ཞབས་ཀྱིས་མཛད་པའི་ན་རོ་ཆོས་དྲུག་གི་གདམ་ངག་སོགས་ཡོད་པ་དེ་དག་བསྐྱེད་རྫོགས་ཅི་རིགས་ཀྱི་ཆ་ཡིན་པར་སྙམ།

དྲུག་པ་ཇི་ལྟར་བསྒོམ་པའི་ཚུལ་ལ་རྣམ་པ་གསུམ་ཏེ། དང་པོ་ཐབས་རྣལ་འབྱོར་ཆེན་པོ་ཕ་ཡི་རྒྱུད་རྣམས་ལ་བརྟེན་ནས། འབྱུང་བ་ལྔའི་རླུང་ཐམས་ཅད་དབུ་མར་ཞུགས་ཏེ་རྣམ་པར་དག་པ་ལས། ཟབ་ལམ་གསལ་སྟོང་རྣམ་པར་མི་རྟོག་པའི་ཡེ་ཤེས་བསྐྱེད་པར་བྱེད་པ་དང་། གཉིས་པ་ཤེས་རབ་རྣལ་འབྱོར་ཆེན་པོ་མའི་རྒྱུད་རྣམས་ལ་བརྟེན་ནས། རང་ལུས་ཀྱི་ཁམས་དཀར་བྱང་སེམས་ཀྱི་ཐིག་ལེ་ལ་གནད་དུ་བསྣུན་ནས། ཞུ་བདེའི་ཡེ་ཤེས་བསྐྱེད་པའི་ཕྱིར་དུ། གཏུམ་མོ་འབར་འཛག་གི་སྦྱོར་བ་ལ་སོགས་པའི་ཐབས་ཀྱིས། གཞན་རྐྱེན་ལ་མི་ལྟོས་པར་བདེ་སྟོང་ལྷན་ཅིག་སྐྱེས་པའི་ཡེ་ཤེས་བསྐྱེད་པ་རང་ལུས་ཐབས་བརྟེན་དང་། གཞན་ལུས་ཕྱག་རྒྱ་མ་ལ་བརྟེན་ནས་དགའ་བ་བཞིའི་ཡེ་ཤེས་བསྐྱེད་པར་བྱེད་པ་གཞན་ལུས་ཐབས་ལྡན་བཅས་ཀྱིས་བསྒོམ་པར་བྱེད་པ་དང་། གསུམ་པ་རྣལ་འབྱོར་ཆེན་པོ་གཉིས་མེད་ཀྱི་རྒྱུད་ལ་བརྟེན་ནས། སྔར་གྱི་ཞུ་བདེས་དྲངས་པའི་ཟབ་གསལ་རྣམ་པར་མི་རྟོག་པའི་ཡེ་ཤེས་དེ་ཉིད། གཅིག་དང་དུ་མ་ཀུན་དང་བྲལ་བའི་ཐིག་ལེ་ཆེན་པོའི་འོད་གསལ་དུ་གཙོ་བོར་བསྒོམ་པར་བྱེད་པ་བཅས། དེ་ལྟར་བསྒོམ་ཚུལ་རྣམ་པ་གསུམ་གྱིས་བསྒོམ་པར་བྱེད་པ་གང་ཡིན་ཀྱང་མདོར་བསྡུ་ན། དེ་ཐམས་ཅད་སྣང་བཅས་རྫོགས་རིམ་དང་སྣང་མེད་རྫོགས་རིམ་གཉིས་སུ་བསྡུས་ཏེ་བསྒོམ་པ་ཡིན་ཏེ། སྔ་མ་ཕ་རྒྱུད་ལ་བརྟེན་པ་དང་མ་རྒྱུད་ལ་བརྟེན་པ་གཉིས་ཀྱིིས། རླུང་དང་ཐིག་ལེའི་རྫོགས་རིམ་གཙོ་བོར་བསྒོམ་པ་ཡིན་པས། དམིགས་རྣམ་དང་བཅས་པའི་ལམ་ཞེས་བྱ་ཞིང་། ཕྱི་མ་གཉིས་མེད་རྒྱུད་ལ་བརྟེན་པས་ནི། ཟུང་འཇུག་ཡེ་ཤེས་ཀྱི་རྫོགས་རིམ་གཙོ་བོར་བསྒོམ་པ་ཡིན་པས། ཡུལ་ཡུལ་ཅན་གྱི་སྣང་བ་གཉིས་སུ་མེད་པ་འོད་གསལ་བའི་ལམ་ཞེས་བྱ་བའི་ཕྱིར། དེ་གཉིས་ལ་མཚན་བཅས་རྫོགས་རིམ་དང་མཚན་མེད་རྫོགས་རིམ་ཞེས་ཀྱང་བྱ་ལ། དེ་གཉིས་སུ་མ་འདུས་པའི་རྫོགས་རིམ་མེད་པ་ཡིན་ནོ། དེ་ལྟར་སྒོམ་ཚུལ་གྱི་རིམ་པ་རྣམས་ཡོན་ཏན་མཛོད་ཀྱི་རྩ་འགྲེལ་དག་ཏུ་གསུངས་པ་ལྟར་རོ།།

བདུན་པ་སྤོང་བ་གང་གི་གཉེན་པོ་གང་བྱེད་ན། སྟོང་པ་ལ་མཐའ་གཅིག་ཏུ་བདེན་པར་ཞེན་པའི་སྒྲིབ་པ་རགས་པ་རྣམས་སྤོང་བ་གང་ཡིན་པ་དེའི་གཉེན་པོ་ཉིད་དུ་བྱེད་པ་ཡིན་ཏེ། [6]སེམས་ཉིད་ངལ་གསོ་ལས། བརྟན་པ་རྣམས་ཀྱིས་རྫོགས་རིམ་ཞེན་པ་དགག །སྟོང་ལ་མཚན་མར་ཞེན་པའི་གཉེན་པོ་བྱེད། །ཅེས་གསུངས།

བརྒྱད་པ་ས་མཚམས་ནི། གཙོ་བོར་རིམ་གྱིས་པའི་དབང་དུ་བྱས་ཏེ་སྔགས་བླ་མེད་ཀྱི་སྦྱོར་ལམ་དྲོད་རྩེ་བཟོད་མཆོག་བཞི་པོར་ཉམས་སུ་ལེན་པ་ཡིན་མོད་ཀྱང་། སྔགས་བླ་མེད་ཀྱི་སྦྱོར་ལམ་ཡིན་ན་རྫོགས་རིམ་ཁོ་ན་ཉམས་སུ་ལེན་པས་མ་ཁྱབ་ཏེ། དབང་དུས་ན་ཡེ་ཤེས་ངོ་འཕྲོད་པ་སོགས་ཀྱིས་རྟོགས་གོམས་གཅིག་ཅར་བ་སྲིད་པའི་ཕྱིར་དང་གཅིག  དང་པོ་ནས་ཀྱང་བསྐྱེད་རྫོགས་ཟུང་དུ་འབྲེལ་ནས་ཉམས་སུ་ལེན་པ་ཡོད་པའི་ཕྱིར་དང་གཉིས། སྣང་སྟོང་ཆུ་ཟླའི་ཚུལ་དུ་ཤེས་པའི་བསྐྱེད་རིམ་ཟབ་མོས་སྦྱོར་ལམ་དཔེའི་ཡེ་ཤེས་འདྲེན་པར་སྲིད་པའི་ཕྱིར་དང་གསུམ། རྡོར་འདས་སོགས་ལ་རྣལ་འབྱོར་དུ་བྱས་ཀྱང་དཔེའི་ཡེ་ཤེས་མ་འདྲོངས་པར་ཚོགས་ལམ་ཙམ་དུ་གནས་པའི་སྐབས་སྲིད་པའི་ཕྱིར་དང་བཞི་བཅས། དེ་ལྟར་རྒྱུ་མཚན་རྣམ་པ་བཞིས་མ་ཁྱབ་པའི་ཕྱིར་ན། དོན་ལ་སྦྱོར་ལམ་དཔེ་ཡི་ཡེ་ཤེས་རྒྱུད་ལ་ནམ་སྐྱེས་པ་དེ་ལ་སྔགས་ཀྱི་སྦྱོར་ལམ་ཞེས་གནད་ཀྱི་དོན་པོར་འོད་གསལ་སྙིང་པོ་ལས་གསུངས།

དགུ་པ་དགོས་པ་ནི། བསམ་གྱིས་མི་ཁྱབ་པའི་ཏིང་འཛིན་སྐྱེ་ཞིང་། ཡེ་ཤེས་ཀྱི་ཚོགས་རྫོགས་པས། ཆོས་སྐུའི་སྒྲིབ་པ་སྦྱོང་བ་ཡིན་ནོ།།

གསུམ་པ་བསྐྱེད་རྫོགས་ཀྱི་རིམ་པ་དེ་གཉིས་ལ་བརྟེན་ནས་ཟུང་འཇུག་གི་རིམ་པ་ཡང་

གཏན་ལ་དབབ་པར་བྱ་སྟེ།

དེ་ཡང་རྣམ་གཞག་རྣམ་པ་དགུས་ཇི་ལྟར་ན། དང་པོ་ངོ་བོ་ནི། རང་བཞིན་དང་སྦྱངས་པའི་ཤེས་རབ་རབ་ཏུ་གྱུར་པས་ཐབས་བསྐྱེད་པའི་རིམ་པ་དང་ཤེས་རབ་རྫོགས་པའི་རིམ་པ་གཉིས་གཅིག་ཅར་དུ་བསྒོམ་ཞིང་རྡོ་རྗེ་འཆང་གི་གོ་འཕང་མྱུར་དུ་མངོན་པར་སྒྲུབ་པར་བྱེད་པའི་རྣལ་འབྱོར་ཏེ། དེ་ལྟར་རང་བཞིན་དང་ཞེས་པ་ནས་སྒྲུབ་པར་བྱེད་པ་ཞེས་པའི་བར་གྱིས་བསྐྱེད་རིམ་རྐྱང་པ་དང་རྫོགས་རིམ་རྐྱང་པ་གཉིས་བཅད་ཅིང་། རྣལ་འབྱོར་ཞེས་པས་བསྐྱེད་རིམ་ཟང་འཇུག་གི་རིམ་པ་དེ་ལམ་མ་ཞུགས་ནས་སྔགས་ཕྱི་རྒྱུད་ཐེག་པའི་བར་གྱི་རྒྱུད་ལ་ཡོད་པར་བཅད་པས་ན། དེས་མཚན་ཉིད་ཀྱི་གོ་ཡང་ཆོད་པ་ཡིན། 

གཉིས་པ་སྒྲ་བཤད་ནི། ལེགས་སྦྱར་སྐད་དུ་མ་ཧཱ་སནྟི་ཀྲམ་ཞེས་པ་ལྟར་རྫོགས་པ་ཆེན་པོའི་རིམ་པ་སྟེ། ཐབས་བསྐྱེད་པའི་རིམ་པ་དང་ཤེས་རབ་རྫོགས་པའི་རིམ་པ་གཉིས་དབྱེར་མེད་མཉམ་པ་ཉིད་དུ་རྫོགས་པར་བསྒོམ་པའི་རིམ་པ་ཅན་ཡིན་པས་ནའོ།།

གསུམ་པ་རྣམ་གྲངས་ལ། ཕར་ཕྱིན་དང་དབུ་མའི་གཞུང་སོགས་ནས། ཐབས་ཤེས་ཟུང་འཇུག་དང་། ཚོགས་གཉིས་ཟུང་འཇུག ཅེས་གསུངས་པ་ལྟར་དེ་ལྟ་བུའི་རྣམ་གྲངས་སྐབས་འདིར་ཡང་དོན་གྱིས་ཡོད་པ་དང་། གསང་སྔགས་རྙིང་མའི་སྐབས་བསྐྱེད་རྫོགས་རྫོགས་ཆེན་གསུམ་གྱིས་འདས་ཕྱེ་བའི་འདི་ལ་རྫོགས་པ་ཆེན་པོའི་རྣལ་འབྱོར་ཞེས་ཀྱང་བྱ།

བཞི་པ་དབྱེ་བ་ལ། སེམས་སྤྲོ་བསྡུ་མེད་པར་མཉམ་པར་འཇོག་པ་རང་བྱུང་གི་རྣལ་འབྱོར་དང་། རིམ་གྱིས་བསྡུས་ནས་མི་དམིགས་པར་བསྒོམ་པ་དེ་ཁོ་ན་ཉིད་ཀྱི་རྣལ་འབྱོར་གཉིས་ཡོད། དེ་གཉིས་ལ་རྫོགས་རིམ་གྱི་སྒྲ་སྦྱར་ནས་གསུངས་པ་ཡོད་ཀྱང་དོན་ལ་བསྐྱེད་རིམ་དང་ཡ་མ་བྲལ་བའི་ཆ་ཡིན།

ལྔ་པ་ཁྱད་ཆོས་ལ། རྒྱུའི་ཁྱད་པར་རང་བཞིན་གདོད་མའི་དཀྱིལ་འཁོར་རྩོལ་མེད་དུ་ལམ་དུ་བྱེད་པ་དང་། རྣམ་པའི་ཁྱད་པར་སྣང་ཞིང་སྲིད་པའི་འཁོར་འདས་ཀྱི་ཆོས་ཐམས་ཅད་བླང་དོར་མཉམ་ཉིད་རང་བཞིན་ལྷུན་གྲུབ་ཀྱི་དཀྱིལ་འཁོར་ཆེན་པོར་ལྟ་བ་དང་། འབྲས་བུའི་ཁྱད་པར་རྡོ་རྗེ་འཆང་གི་གོ་འཕང་མྱུར་དུ་གྲུབ་པར་བྱེད་པའི་ཁྱད་པར་བཅས། དེ་ལྟར་ཁྱད་ཆོས་རྣམ་པ་གསུམ་གྱིས་ཁྱད་པར་འཕགས་པ་ཡིན་ནོ།།

དྲུག་པ་ཇི་ལྟར་བསྒོམ་པའི་ཚུལ་ལ། [7]སྤྱི་དོན་ཡིད་ཀྱི་མུན་སེལ་ལས་གསུངས་པ་ལྟར་ཏིང་འཛིན་གསུམ་བསྒོམ་པ་སྔོན་དུ་འགྲོ་བས། རྒྱལ་བ་ཞི་ཁྲོའི་ལྷ་ཚོགས་གང་རུང་གི་དཀྱིལ་འཁོར་རྒྱས་བསྡུས་ཅི་རིགས་སུ་བསྒོམ་ནས། དེའི་ངང་ལ་སེམས་སྤྲོ་བསྡུ་མེད་པར་མཉམ་པར་འཇོག་པ་རང་བྱུང་གི་ཏིང་ངེ་འཛིན་དང་། རིམ་གྱིས་བསྡུས་ནས་མི་དམིགས་པར་བསྒོམ་པ་དེ་ཁོ་ན་ཉིད་ཀྱི་ཏིང་ངེ་འཛིན་གཉིས་བསྒོམ་སྟེ། མཐར་སྒྱུ་མ་ལྟ་བུའི་ཚུལ་གྱིས་བསྔོ་བ་བྱེད་པ་ནི་གདན་ཐོག་གཅིག་ཏུ་རྫོགས་པར་བྱེད་པས། སངས་རྒྱས་ཀྱི་ཆོས་ཐམས་ཅད་ཅིག་ཅར་ཉིད་དུ་བསྒོམ་པའོ་ཞེས་སོ།།

བདུན་པ་སྤོང་བ་གང་གི་གཉེན་པོ་གང་བྱེད་ན། ཐབས་ཤེས་བསྐྱེད་རྫོགས་གཉིས་པོ་རྒྱང་ཆད་དུ་འཛིན་པའི་རྟོག་པ་རྣམས་སྤོང་བ་མ་ཟད། དེ་གཉིས་ཐ་གུ་དཀར་ནག་ཟུང་བསྒྲིལ་དུ་བྱས་པ་ལྟ་བུར་རློམ་པའི་སྒྲིབ་པ་རྣམས་ཀྱང་རིམ་གྱིས་སྤོང་བ་གང་ཡིན་པ་དེའི་གཉེན་པོ་ཉིད་དུ་བྱེད་པ་ཡིན་ཏེ། [8]སེམས་ཉིད་ངལ་གསོ་ལས། བསྐྱེད་རིམ་སྣང་འདིའི་བདེན་ཞེན་འགོག་པ་སྟེ། །རྫོགས་རིམ་སྒྱུ་མར་ཞེན་པའི་རྟོག་པ་སྤོང་། །གང་ལ་སྣང་སྟོང་བདེན་ཞེན་མེད་པ་ན། །བསྐྱེད་རྫོགས་གཉིས་མེད་རང་བཞིན་དག་པ་ཡིན། །ཞེས་སོ།།

བརྒྱད་པ་ས་མཚམས་གང་ནས་འབྱེད་ན། སྨིན་བྱེད་དབང་བསྐུར་གྱི་དུས་ན་ཡེ་ཤེས་ཀྱི་ངོ་འཕྲོད་པའི་རྟོགས་གོམས་ཅིག་ཅར་བ་ལྟ་བུ་སྟེ། སྔགས་བླ་མེད་ཀྱི་ཚོགས་ལམ་ནས་ཞུགས་པས་མྱུར་དུ་རིགས་ཀུན་ཁྱབ་བདག་རྡོ་རྗེ་འཆང་གི་གོ་འཕང་མངོན་དུ་བྱེད་པ་ཡིན་ལ། ཡང་ཚོགས་སྦྱོར་གཉིས་སུ་བསྐྱེད་རྫོགས་རིམ་གྱིས་བསྒོམ་པ་ཅན་གྱིས་ནི། ནམ་ཞིག་གི་ཚེ་མཐོང་ལམ་ཐོབ་པ་དང་དེ་ནས་བཟུང་བསྐྱེད་རྫོགས་ཟུང་འཇུག་དེ་ཉིད་བསྒོམ་པ་ཡིན་ནོ།།

དགུ་པ་དགོས་པ་ནི། ཞི་ལྷག་ཟུང་འཇུག་གི་ཡེ་ཤེས་གསང་བ་བསམ་གྱིས་མི་ཁྱབ་པའི་ཏིང་འཛིན་རྒྱུད་ལ་སྐྱེ་ཞིང་། དམིགས་བཅས་བསོད་ནམས་དང་དམིགས་མེད་ཡེ་ཤེས་ཀྱི་ཚོགས་གཉིས་ཟུང་འཇུག་ཏུ་རྫོགས། སྐུ་གཉིས་ཀྱི་སྒྲིབ་པ་ཐམས་ཅད་ལྷན་ཅིག་ཏུ་སྦྱོང་བ་སོགས་ཀྱི་དགོས་པ་ཡོད།

ད་ནི་དེ་ལྟར་གཏན་ལ་དབབ་པའི་གནད་ཀྱི་དོན་པོ་ཉིད་ལ་དོགས་པ་སློང་བས་

མཐའ་ཅུང་ཟད་དཔྱད་པར་བྱ་སྟེ།

སྔགས་བླ་མེད་ཀྱི་ལམ་ཡིན་ན་བསྐྱེད་རྫོགས་ཀྱི་ཉམས་ལེན་ངེས་པར་དུ་དགོས་པས་ཁྱབ་མ་ཁྱབ། བསྐྱེད་རྫོགས་ཀྱི་རིམ་པ་ཡིན་ན་སྔགས་བླ་མེད་ཀྱི་ལམ་ཁོ་ནར་ངེས་པས་ཁྱབ་མ་ཁྱབ། བསྐྱེད་རིམ་གྱི་རྗེས་སུ་རྫོགས་རིམ་འཇུག་པས་ཁྱབ་མ་ཁྱབ། རྫོགས་རིམ་ཡིན་ན་བསྐྱེད་རིམ་རྒྱུར་བརྟེན་དགོས་པས་ཁྱབ་མ་ཁྱབ། ཅེས་པའི་དོགས་སློང་གི་དྲི་བ་བཞི་ལས།

དང་པོ། སྔགས་བླ་མེད་ཀྱི་ལམ་ཡིན་ན་བསྐྱེད་རྫོགས་ཀྱི་ཉམས་ལེན་ངེས་པར་དུ་དགོས་པས་ཁྱབ་མ་ཁྱབ་ཅེ་ན། ཁྱབ་སྟེ། སྔགས་བླ་མེད་ཀྱི་ལམ་ཐམས་ཅད་བསྡུ་ན་བསྐྱེད་རྫོགས་གཉིས་སམ་བསྐྱེད་རྫོགས་རྫོགས་ཆེན་གསུམ་དུ་མ་བསྡུ་བ་མེད་པའི་ཕྱིར་དང་། སྔགས་བླ་མེད་ཀྱི་ལམ་ཐམས་ཅད་དེ་དག་གཉིས་སམ་གསུམ་གྱི་བདག་ཉིད་ཡིན་པའི་ཕྱིར་ན། སྔགས་བླ་མེད་ཀྱི་ཚོགས་ལམ་སོགས་ལམ་ལྔ་པོར་རིམ་བཞིན་བགྲོད་པ་ལ་བསྐྱེད་རྫོགས་རྫོགས་ཆེན་གསུམ་པོ་གང་རུང་ངེས་པར་དུ་དེ་དང་དེའི་ས་མཚམས་སུ་དགོས་པའི་ཕྱིར།

གཉིས་པ། བསྐྱེད་རྫོགས་ཀྱི་རིམ་པ་ཡིན་ན་སྔགས་བླ་མེད་ཀྱི་ལམ་ཁོ་ནར་ངེས་པས་ཁྱབ་མ་ཁྱབ་ཅེ་ན། སྤྱིར་བསྐྱེད་པའི་རིམ་པ་ཙམ་ཞིག་ཕྱི་རོལ་རིག་བྱེད་ཀྱི་གཞུང་དང་མདོ་མཚན་ཉིད་ཐེག་པ་དང་སྔགས་ཕྱི་རྒྱུད་ཐེག་པའི་བཀའ་བསྟན་རྣམས་སུ་ལྷ་བསྒོམ་པ་དང་སྔགས་བཟླ་བ་དང་ཏིང་འཛིན་བསྐྱེད་པ་ལ་སོགས་པ་དོན་གྱིས་ཡོད་པ་ཡིན་ནའང་། སྔགས་བླ་མེད་ཀྱི་ལམ་ལྟར་གཞི་རྒྱུད་ཀྱི་དོན་ལ་ངེས་པ་དྲངས་ནས་དེ་དང་མཐུན་པར་སྣང་སྲིད་དག་མཉམ་བདེན་པ་དབྱེར་མེད་ཀྱི་རང་བཞིན་ལ་བློ་སྦྱོང་བའི་ཚུལ་གྱིས་སྣང་གྲགས་རིག་རྟོག་ཐམས་ཅད་ལྷ་སྔགས་ཏིང་འཛིན་གསུམ་པོར་བསྒོམ་པ་དེ་ལྟ་བུ་ནི། སྔགས་བླ་མེད་ཀྱི་ལམ་ལ་མ་གཏོགས་གཞན་ཕྱི་རོལ་པ་དང་མདོ་མཚན་ཉིད་པའི་བཀའ་བསྟན་གང་དུའང་གསུང་མེད་ཅིང་དེ་དག་ལ་དེའི་ཉམས་ལེན་ཀྱང་མེད་ཅེས་སྨྲ་ཐུབ།

གསུམ་པ། བསྐྱེད་རིམ་གྱི་རྗེས་སུ་རྫོགས་རིམ་འཇུག་པས་ཁྱབ་མ་ཁྱབ་ཅེ་ན། སྔགས་བླ་མེད་ཀྱི་ལམ་གྱི་དབང་དུ་བྱས་པའི་བསྐྱེད་རིམ་གྱི་རྗེས་སུ་ཡིན་ན་རྫོགས་རིམ་འཇུག་པས་ཁྱབ་སྟེ། སྔགས་བླ་མེད་ལམ་གྱི་བསྐྱེད་རིམ་ཡིན་ན་རྫོགས་རིམ་སྨིན་བྱེད་དུ་གྱུར་པས་ངེས་པའི་ཕྱིར།

བཞི་པ། རྫོགས་རིམ་ཡིན་ན་བསྐྱེད་རིམ་རྒྱུར་བརྟེན་དགོས་པས་ཁྱབ་མ་ཁྱབ་ཅེ་ན། མ་ཁྱབ་སྟེ། ལམ་མ་ཞུགས་ཀྱི་གནས་སྐབས་སུ་ཟུང་འཇུག་གི་ལམ་ལ་རྩོལ་སྦྱངས་རབ་ཏུ་གྱུར་པས་དེའི་སྟོབས་ཀྱིས་རྫོགས་རིམ་དྲངས་པའང་ཡོད་པའི་ཕྱིར་རོ།།

སྤྱིར་ན་སྔགས་བླ་མེད་ཀྱི་ལམ་གྱི་ངོ་བོར་གྱུར་པའི་བསྐྱེད་རྫོགས་གཉིས་པོ་གང་ཡིན་ནའང་། ཟུང་འཇུག་གི་བདག་ཉིད་དུ་བསྒོམ་ནའང་འདྲ་མ་བསྒོམ་ནའང་འདྲ་དེའི་བདག་ཉིད་དུ་མ་བཅོས་རང་བཞིན་ལྷུན་གྲུབ་ཀྱི་ཚུལ་དུ་ཡོད་པ་ཡིན་ལ། འོན་ཀྱང་སྦྱོར་བས་དངོས་སུ་ཟུང་འཇུག་ཏུ་བསྐྱེད་མ་བསྐྱེད་བསྒོམ་པ་པོ་རང་ཉིད་ལ་རག་ལས་པ་ཡིན། གལ་ཏེ་རྣལ་འབྱོར་པས་བསྐྱེད་རྐྱང་དང་རྫོགས་རྐྱང་རེ་རྒྱུན་ཆགས་པར་བསྒོམ་པ་ཡིན་ན་དེའི་སྟོབས་ཀྱིས་རིམ་བཞིན་ཟུང་འཇུག་ཏུ་སྦྱོར་བར་བྱེད་པའང་ལམ་རིམ་གྱིས་པའི་དབང་དུ་བྱས་པ་ཡིན་ལ། ཅིག་ཅར་བའི་དབང་དུ་ནི་དང་པོ་ཉིད་ནས་རྫོགས་རིམ་ལ་འཇུག་པ་ཅན་དང་། དང་པོ་ཉིད་ནས་ཟུང་འཇུག་གི་རིམ་པ་ཉིད་ལ་འཇུག་པ་ཅན་གཉིས་ཡོད།

ཞར་བྱུང་བསྐྱེད་རྫོགས་རྫོགས་ཆེན་གསུམ་པོ་ནང་གསེས་དགུ་ཕྲུགས་སུ་ཕྱེ་བས་བསྟན་པ།

སྤྱིར་གསང་སྔགས་རྙིང་མའི་ལུགས་སུ། རྒྱུད་ལུང་མན་ངག་སྡེ་གསུམ་ལ་ནང་གསེས་དགུ་ཕྲུགས་སུ་ཕྱེ་བ་ཡོད་པ་དང་། དེ་བཞིན་མ་ཧཱ་ཨ་ནུ་ཨ་ཏི་གསུམ་ལ་ནང་གསེས་དགུ་ཕྲུགས་སུ་ཕྱེ་བ་ཡོད་པ་ལྟར། སྐབས་འདིར་ཡང་[9]སྒྲུབ་པ་ལུང་གི་བཀའ་མགོ་ལས་གསུངས་པ་ལྟར་བསྐྱེད་རྫོགས་རྫོགས་ཆེན་གསུམ་པོ་ལ་ནང་གསེས་དགུ་ཕྲུགས་སུ་ཕྱེ་བར་བྱ་སྟེ། བསྐྱེད་པའི་བསྐྱེད་པ་བདག་དམ་ཚིག་སེམས་དཔའི་དཀྱིལ་འཁོར་རིམ་པར་བསྐྱེད་པ་དང་། བསྐྱེད་པའི་རྫོགས་པ་ལྷ་ཡེ་ཤེས་སེམས་དཔའི་དཀྱིལ་འཁོར་རིམ་པར་བསྐྱེད་པ་དང་། བསྐྱེད་པའི་རྫོགས་ཆེན་ཀུན་རྫོབ་ཏུ་ལྷའི་དཀྱིལ་འཁོར་དུ་སྣང་བ་དེ་ཉིད་དོན་དམ་པར་ངོ་བོ་མ་སྐྱེས་པའི་རང་བཞིན་དུ་བསྒོམ་པ་དང་། རྫོགས་པའི་བསྐྱེད་པ་ཀུན་རྫོབ་ཏུ་སྣང་བ་ཐམས་ཅད་ལྷའི་དཀྱིལ་འཁོར་དུ་ཅིག་ཅར་རྫོགས་པར་བྱེད་པ་དང་། རྫོགས་པའི་རྫོགས་པ་དོན་དམ་པར་ཆོས་ཀྱི་དབྱིངས་སུ་རྣམ་པར་དག་པར་རྫོགས་པར་བྱེད་པ་དང་། རྫོགས་པའི་རྫོགས་ཆེན་རང་རིག་པའི་ཡེ་ཤེས་དེ་ཉིད་གཉིས་སུ་མེད་པར་རྫོགས་པར་བྱེད་པ་དང་། རྫོགས་ཆེན་གྱི་བསྐྱེད་པ་བསྐྱེད་བྱ་བསྐྱེད་བྱེད་དང་བྲལ་བའི་ཡེ་ནས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་བདག་ཉིད་ཡིན་པ་དང་། རྫོགས་ཆེན་གྱི་རྫོགས་པ་རྫོགས་བྱ་རྫོགས་བྱེད་དང་བྲལ་བའི་ཡེ་ནས་རང་བཞིན་ལྷུན་གྱིས་གྲུབ་པའི་དཀྱིལ་འཁོར་གྱི་བདག་ཉིད་ཡིན་པ་དང་། རྫོགས་ཆེན་གྱི་རྫོགས་ཆེན་བསྐྱེད་བྱ་སྐྱེད་བྱེད་དང་རྫོགས་བྱ་རྫོགས་བྱེད་ཀུན་དང་བྲལ་བའི་གནས་ལུགས་མ་བཅོས་རང་བཞིན་བསམ་གྱིས་མི་ཁྱབ་པའི་དེ་ཁོ་ན་ཉིད་ཀྱི་སྙིང་པོའོ། །བསྐྱེད་རྫོགས་རྫོགས་ཆེན་གསུམ་པོ་དེ་དག་ལས་རིམ་བཞིན་དང་པོའི་གསུམ་མ་ཧཱ་དང་། གཉིས་པའི་གསུམ་ཨ་ནུ་དང་། གསུམ་པའི་གསུམ་ཨ་ཏི་བཅས་ཀྱི་རིམ་པའི་རྣམ་གཞག་སྟེ། མ་ཧཱ་ལ་བསྐྱེད་རིམ་གྱི་ཉམས་ལེན་གཙོ་བོར་དང་། ཨ་ནུ་ལ་རྫོགས་རིམ་གྱི་ཉམས་ལེན་གཙོ་བོར་དང་། ཨ་ཏི་ལ་བསྐྱེད་རྫོགས་མཉམ་པར་ཟུང་དུ་འཇུག་པར་ཉམས་སུ་ལེན་གསུངས་པའི་དགོངས་དོན་ཡང་རྩ་འགངས་དེར་བབས་པ་ཡིན་ནོ། དེས་ན་དེ་ལྟར་རྗོད་བྱེད་ཀྱི་ཆ་ནས་རྒྱུད་ལུང་མན་ངག་སྡེ་གསུམ་དང་། བརྗོད་གཞི་ཐེག་པའི་ཆ་ནས་མ་ཧཱ་ཨ་ནུ་ཨ་ཏི་གསུམ་དང་། བརྗོད་བྱ་ཐེག་པ་དེ་དག་གི་སྒོམ་བྱའི་ཆ་ནས་བསྐྱེད་རྫོགས་རྫོགས་ཆེན་གསུམ་བཅས། དེ་དག་དགུ་ཕྲུགས་གསུམ་པོ་ནང་ཕན་ཚུན་རིམ་བཞིན་རིགས་བསྒྲེས་པས་གནས་པ་དག་འདིར་སྨྲོས་ཀྱང་ཅི་དགོས་ཏེ། རྒྱས་པར་སྤྲོས་པས་ཆོག་མོད། འོན་ཏེ་ཚིག་ཚོགས་ཀྱིས་མི་ལང་བར་འདུག་གོ། 

མདོར་ན་སྤྱིར་གསང་སྔགས་གསར་རྙིང་ཀུན་ཏུ་སྔགས་བླ་མེད་ཐེག་པའི་ལམ་ཉམས་སུ་ལེན་པའི་རིམ་པའི་ཆ་ལ་གྲངས་མཐའ་ཡས་པ་ཡོད་ཀྱང་། བསྡུ་ན་བསྐྱེད་པའི་རིམ་པ་དང་རྫོགས་པའི་རིམ་པ་གཉིས་སུ་ཕྱེ་བ་ཡོད་ལ། དེ་གཉིས་སུ་མ་བསྡུས་པའི་ལམ་ཉམས་སུ་ལེན་པའི་རིམ་པ་ཞིག་མེད་པ་ཡིན་ནའང་། སྐབས་འདིར་རྫོགས་པ་ཆེན་པོའི་རིམ་པའི་རྣམ་གཞག་བྱས་པ་ནི། གསང་སྔགས་རྙིང་མའི་ལུགས་ཀྱི་དབང་དུ་བྱས་པ་ཡིན་ཞིང་། འདི་ཉིད་བསྐྱེད་རྫོགས་གཉིས་ལས་གང་དུ་བསྡུ་ན། རྫོགས་པའི་རིམ་པའི་ཁོངས་སུ་བསྡུས་པ་ཡིན་ཏེ། རྫོགས་རིམ་དང་རྫོགས་པ་ཆེན་པོ་དེ་གཉིས་པོ་རྟོགས་པ་ལྟ་བ་དང་སྒོམ་པ་ཉམས་ལེན་གྱི་ཚད་མཐོ་དམན་གྱི་ཁྱད་པར་དང་། འབྲས་བུ་མཐར་ཐུག་མངོན་དུ་བྱེད་ཚུལ་ལ་ལམ་མྱུར་བུལ་གྱི་ཁྱད་པར་ཡོད་པའི་ཕྱིར་རོ།།

མཐའ་འཇུག་ཏུ། འདི་ལྟར་ཟབ་གསང་བླ་མེད་ཐེག་པའི་གཞུང་ལམ་ལ་སྐྱེས་སྦྱངས་ཀྱི་ཤེས་རབ་དབེན་པའི་བྱིས་ལྐུག་གཅིག་གིས་མི་ཤེས་ཤེས་ཁུལ་གྱིས། ཚིག་ཚོགས་དོན་ཚོགས་ཀྱི་ཆ་གང་ཐུབ་བསྡུ་རུབ་བྱས་པ་ཙམ་གྱིས་ཀྱང་། ནོངས་པའི་དྲི་ངན་ཡོད་རྒུ་ཟང་མ་ཐལ་ལེ་ཐུལ་ལེ་རུ་སོང་བ་གང་དག སྤྱིར་ཡེ་གྲོལ་འཁྲུལ་བྲལ་བླ་མའི་བླར་གྱུར་རང་རིག་བྱང་ཆུབ་སེམས་ཀྱི་དཀྱིལ་འཁོར་དུ་མཐོལ་ལོར་བཤགས་ཤིང་བཟོད་པར་གསོལ་ལ། ཁྱད་པར་ཁྱབ་བདག་རིགས་དྲུག་པ་ཆོས་སྐུ་ཀུན་ཏུ་བཟང་པོ་ནས་ད་ལྟའི་དྲིན་ཆེན་རྩ་བའི་བླ་མའི་བར། དགོངས་བརྡ་སྙན་གསུམ་གྱིས་བརྒྱུད་པ་ཟམ་མ་ཆད་པར་བརྒྱུད་པས་གཙོས་པའི་འབྲེལ་ཐོགས་ཀྱི་དགེ་བའི་བཤེས་གཉེན་རྣམས་དང་། མཁྱེན་དཔྱོད་ཡངས་པའི་ཆོས་ཀྱི་མཆེད་པོ་དག་གི་སྤྱན་སྔར་ནོངས་པ་ཅི་མཆིས་འཆགས་པས་མཐའ་འགྲུབ་པར་གྱིའོ། །སརྦ་དཱ་ཀ་ལྱཱ་ནཾ་ཤུ་བྷཾ།

---

[1] སྔ་འགྱུར་སྨིན་གླིང་དཔེ་ཚོགས། དེབ་གཟུགས། པོད་བཅོ་ལྔ་པ། ཤོག་གྲངས། ༥༣།

[2] སྔ་འགྱུར་སྨིན་གླིང་དཔེ་ཚོགས། དེབ་གཟུགས། པོད་བཅོ་ལྔ་པ། ཤོག་གྲངས། ༥༨།

[3] སྔ་འགྱུར་རིག་མཛོད་རྩིས་འཕྲུལ་པར་མ། ཤོག་གྲངས། ༣༠།

[4] སྔ་འགྱུར་རིག་མཛོད་རྩིས་འཕྲུལ་སྡེ་ཚན་པར་མ། སྤྱིའི་དེབ་ཕྲེང་། ༡༨། རྩ་དེབ། ཤོག་གྲངས། ༤༨༤།

[5] སྔ་འགྱུར་རིག་མཛོད་རྩིས་འཕྲུལ་སྡེ་ཚན་པར་མ། ཤོག་གྲངས། ༣༡།

[6] སྔ་འགྱུར་རིག་མཛོད་རྩིས་འཕྲུལ་སྡེ་ཚན་པར་མ། རྩ་དེབ། དེབ་ཕྲེང་བཅོ་བརྒྱད་པ། ཤོག་གྲངས། ༤༨༤།

[7] ཐཱའི་ཝན་བདེ་རྩ་ལྷན་ཚོགས་པར་མ། ཀློང་ཆེན་གསུང་འབུམ། པོད། ༢༥། ཤོག་གྲངས། ༡༤༦།

[8] སྔ་འགྱུར་རིག་མཛོད་རྩིས་འཕྲུལ་སྡེ་ཚན་པར་མ། རྩ་དེབ། དེབ་ཕྲེང་། ༡༨། ཤོག་གྲངས། ༤༨༤།

[9] ཐཱའི་ཝན་བདེ་རྩ་ལྷན་ཚོགས་པར་མ། དེབ་ཨང་། (TI798)  ཤོག་གྲངས། ༣༤༧།

པདྨའི་རང་མདངས་འདོན་ཐེངས་སུམ་ཅུ་པའི་ནང་འཁོད།