དཀྱིལ་འཁོར་ནི་སྔགས་རྒྱུད་སྡེ་དྲུག་པོ་ཐམས་ཅད་ཀྱི་བཀའ་བསྟན་དག་ན་གསུངས་ཡོད་པ་དང་།
དེའང་སྣོད་དག་པ་གཞལ་ཡས་ཁང་གི་ནང་དུ། བཅུད་དག་པ་ལྷ་རབ་འབྱམས་གཙོ་འཁོར་གྱི་ངོ་བོར་གནས་པ་མཚོན་པར་བྱེད་པ་ཡིན་ཞིང་།
སྤྱིར་ཆོས་སྐུ་ཀུན་ཏུ་བཟང་པོ་ནས་ད་ལྟའི་རང་རང་གི་རྩ་བའི་བླ་མའི་བར་བརྒྱུད་པ་གསུམ་གྱིས་རྒྱུན་མ་ཆད་པར་བརྒྱུད་པས།
ཐོག་མར་རྒྱ་བལ་སོགས་སུ་དཀྱིལ་འཁོར་བཞེངས་ཚུལ་སྣ་ཚོགས་པ་བྱུང་ཡོད་པ་ཡིན་ལ།
ཕྱིས་སུ་བོད་དུའང་རྒྱལ་པོ་སྲོང་བཙན་དང་ཁྲི་སྲོང་གི་སྐུ་རིང་ནས་དཀྱིལ་འཁོར་བཞེངས་འགོ་ཚུགས་པའི་རྐྱེན་ལས།
ད་ལྟ་བོད་བརྒྱུད་ནང་བསྟན་གྱི་ཆོས་རྒྱུད་སོ་སོའི་སྒྲུབ་སྡེ་སོ་སོར་དཀྱིལ་འཁོར་གྲངས་ལས་འདས་པ་བཞེངས་ཤིང་།
དེ་དག་གི་བཞེངས་སྲོལ་གྱི་ཕྱག་ལེན་ཇི་བཞིན་མ་ཉམས་པར་ད་བར་བཞུགས་པ་དེ་ལྟར་ཡིན།
སྔགས་བླ་མེད་ཐེག་པའི་ནང་རྒྱུད་སྡེ་གསུམ་པོར་གཞི་ལམ་འབྲས་གསུམ་མམ་ཕྱི་ནང་གསང་གསུམ་གྱི་ཁྱད་པར་གྱིས།
སྤྱིར་བཏང་གི་དཀྱིལ་འཁོར་གསུམ་དུ་ཡོད་པ་ཡིན་ལ།
དེ་དག་ལས་དང་པོ་ཕྱིའི་དཀྱིལ་འཁོར་ལའང་བཞེངས་ཚུལ་ཙམ་གྱི་སྒོ་ནས་རྣམ་པར་ཕྱེ་ན།
བློས་བསླངས་ཀྱི་དཀྱིལ་འཁོར། རྡུལ་ཚོན་གྱི་དཀྱིལ་འཁོར། རས་བྲིས་ཀྱི་དཀྱིལ་འཁོར།
སོགས་རྣམ་གྲངས་དུ་མར་དབྱེར་ཆོག་པ་ལས་སྐབས་འདིར་ནི་གསུམ་པ་རས་བྲིས་ཀྱི་དཀྱིལ་འཁོར་ཉིད་ཡིན།
དེའང་དཀྱིལ་འཁོར་ནི་དགོངས་གཞི་དང་དགོས་པ་དུ་མ་ཞིག་ལ་དམིགས་ནས་དེ་དང་དེའི་སླད་དུ་བཞེངས་པ་ལས་དེང་སང་ལྟར་འགྲེམས་སྟོན་དང་མཛེས་ཆོས་ཀྱི་ཆེད་དུ་མ་ཡིན་ཞིང་།
སྤྱིར་ནས་རྒྱལ་བའི་སྐུ་གསུང་ཐུགས་ཀྱི་རྟེན་དང་བརྟེན་པར་བཅས་པ་ཐམས་ཅད་འགྲོ་བ་རྣམས་ཀྱི་རྒྱུད་ལ་ཐར་པའི་ས་བོན་ཐེབས་ཕྱིར་ཡིན་ལ།
ཁྱད་པར་དུའང་དཀྱིལ་འཁོར་ནི་སྣོད་རུང་གི་སློབ་མ་རྣམས་རྒྱུད་སྨིན་པར་བྱ་བའི་དོན་དུ་ཡིན་ཅིང་།
དེ་བཞིན་སློབ་མའི་རྒྱུད་ཀྱི་ཉོན་མོངས་པ་དང་ཤེས་བྱའི་སྒྲིབ་པ་རྣམས་དག་པར་བྱེད་ཅིང་།
མ་འོངས་པ་ན་འབྲས་བུ་སངས་རྒྱས་ཀྱི་གོ་འཕང་ངམ་སངས་རྒྱས་ཉིད་མངོན་དུ་བྱ་བ་དང་།
དེ་ཐོབ་བྱེད་ཀྱི་ལམ་དཀྱིལ་འཁོར་ལ་དད་པ་དང་མོས་པས་མཆོད་པ་དང་བསྒོམ་པ་ལ་དབང་བར་བྱེད་པས་ན་དགོས་པ་དང་ཕན་ཡོན་བསམ་གྱིས་མི་ཁྱབ་པར་མཆིས་སོ།།
The Golden Temple (རྣམ་གླིང་གསེར་གྱི་ལྷ་ཁང་) ཞེས་པའི་དེབ་དེར་དབྱིན་ཇིའི་ཐོག་རྣམ་གླིང་གཙུག་ལག་ཁང་ཆེན་མོའི་ནང་གི་ལྡེབས་རིས་དཀྱིལ་འཁོར་གསར་བཞེངས་བྱས་པ་དེའི་སྐོར་གསལ་བཤད་བྱ་ཆེད་བསྒྱུར་གཞིར་དམིགས་ཏེ་བྲིས་པའོ།།
No comments:
Post a Comment