དེ་ལ་འདིར་དམ་ཆོས་འདུལ་བའི་སྐབས་དགེ་འདུན་འདུ་བའི་ཡོ་བྱད་གཎྜིའི་སྐོར་ལ་འབེལ་གཏམ་བསྒྲོག་པར་བྱ་བའི་སྒྲོམ་གྱི་གཞི་རྣམ་པ་བཅུ་གཅིག་གིས་རྣམ་པར་དབྱེ་བར་བྱ་བ་ལས།
༡༽ ངོ་བོ་ནི།
གཎྜི་ཞེས་པ་རྒྱ་གར་ལེགས་སྦྱར་གྱི་སྐད་དེ།
དོན་དུ་ན་བརྡུང་བྱ་ཞིག་གི་གོ་བ་ལ་འབྱོར་དགོས་པ་ཡིན་པས་ན།
བརྡུང་བྱའི་ཡོ་བྱད་གང་ལའང་ཐ་སྙད་དེ་འཇུག་པ་ཡོད་མོད།
འོན་ཀྱང་སྐབས་འདིར་ནང་པ་སངས་རྒྱས་པས་དམ་པའི་ཆོས་འདུལ་བ་ཉིད་ཀྱི་དབང་དུ་བྱས་ནས།
གཞི་གསུམ་གྱི་ཆོ་ག་ལ་སོགས་པ་ནམ་བྱ་བའི་སྐབས་སྐབས་རྣམས་སུ་དགེ་འདུན་རྣམས་བསྡུ་བ་སོགས་ཀྱི་བརྡ་སྤྲོད་བྱེད་ཀྱི་ཡོ་བྱད་གཅིག་གོ སྤྱིར་[གཎྜི་]ཞེས་པའི་ཡི་གེའི་སྦྱོར་བ་འདི་དེ་ལྟ་ཉིད་དུ་རྒྱལ་བའི་བཀའ་བསྟན་ཡོངས་སུ་རྫོགས་པར་འ་ཆུང་སྦྱར་ཡོད་མེད་ཀྱི་ཁྱད་པར་ཙམ་གྱིས་ཁྱབ་པར་གནས་ཡོད་ཀྱང།
ལེགས་སྦྱར་གྱི་ཡི་གེ་དངོས་གཏན་འབེབས་སྐབས་སུ་སྦྱོར་བ་ཇི་ལྟར་གནང་གི་ཡོད་མེད་འུ་ཅག་གི་མིག་སྔར་ལེགས་སྦྱར་གྱི་ཚིག་མཛོད་དག་ཏུའང་དམིགས་གསལ་མཇལ་རྒྱུ་མེད་མོད།
འོན་ཏེ་རྒྱ་གར་དང་བལ་ཡུལ་གྱི་ཡི་གེའི་སྦྱོར་བར་བསམ་ན། གྷ་དང་ཎ་དང་ཊཱི་བཅས་སྦྱར་བས་གྷཎཊཱི(घण्टी)ཞེས་གཅིག་མཐུན་གྱིས་འདི་ལྟར་སྦྱོར་ཚུལ་ཡོད་པ་ད་ལྟ་དངོས་སུ་སྤྱོད་བཞིན་པ་དེ་རེད།
༢༽ དེ་ལ་དབྱེ་ན།
ཚད་ཆེ་ཆུང་གི་ཁྱད་པར་གྱིས། ཆེ་འབྲིང་ཆུང་གསུམ་དང་ཤིན་ཏུ་ཆུང་བ་སོགས་སུ་དབྱེ་བ་ཡོད་པར་བཤད་ཡོད་པ་དང་།
མ་ལག་གིས་དབྱེ་ན། གཎྜི་ཉིད་དང་དེ་རྡུང་བྱེད་གཅིག་སྟེ།
རྡུང་བྱེད་དེ་ལ་གཎ་གཡོག་ཅེས་བརྗོད་སྲོལ་མཆིས་ལ། བརྡུང་དབྱུག་ཅེས་ཀྱང་བརྗོད་པར་འདུག
བརྡུང་ཚུལ་གྱི་སྒོ་ནས་དབྱེ་ན། བརྡུང་བ་རྣམ་པ་ལྔའི་ཚུལ་དུ་བརྡུང་བ་ཡོད་དེ།
དེ་ཡང་ཇི་ལྟར་ན། དགེ་འདུན་བསྡུ་བར་བྱ་བའི་དོན་དུ་དང་། ལས་བྱ་བའི་དོན་དུ་དང།
མི་མཐུན་པ་སྤོང་བའི་དོན་དུ་དང། གནོད་པ་བཟློག་པའི་དོན་དུ་དང། གཤིན་པོའི་ཕུང་པོ་དབྱུང་བའི་དོན་དུ་བརྡུང་བ་དང་བཅས།
གཞན་ཡང་ཟན་ཟ་བའི་ཕྱིར་དུ་བརྡུང་བའང་ཡོད་པར་གསུངས། དེ་ལྟར་བརྡུང་བ་རྣམ་པ་ལྔ་ལ་སོགས་པའི་ཡོ་བྱད་དུ་གཎྜི་ཉིད་བཅོམ་ལྡན་འདས་ཀྱིས་རྙེད་པ་བགོ་བར་གནང་བ་ཡིན་པས་ན།
དེ་ཉིད་ཆོ་གའི་ཡོ་བྱད་དུ་བཟུང་བར་བྱ་བ་ཡིན་ནོ།།
[1]གཎྜིའི་མདོ་ལས། འབྱོར་བ་འདོད་པས་ཤིང་རྣམས་ནི།
།རབ་ཏུ་འབད་དེ་བརྟག་པར་བྱ། །ཙན་དན་བིལ་བ་པཱ་ལ་ཤ །ཨ་ཤྭཏྠ་དང་ཙན་དན་དམར།
།རྒྱ་སྟར་ཏ་ལ་ཀེངྴུ་ཀ།།ཤིང་ཤ་པ་དང་ཏ་མ་ལ། །ཨམྲ་སྟར་བུ་སྐྱུ་རུ་ར།
།ཏིངྟི་ས་ར་ཨ་ཤོ་ཀ།།འདི་དག་ཐམས་ཅད་མེད་ན་ཡང། །འོལ་སེ་ལ་ནི་འབད་དེ་བྱ།
།ཞེས་གསུངས་པ་ལྟར་དེ་ལྟར་རྒྱུ་རྣམ་པ་བཅོ་ལྔའམ་བཅུ་དྲུག་པོོ་གང་རུང་གིས་བརྡུང་བྱ་གཎྜི་དང་རྡུང་བྱེད་གཎ་གཡོག་གཉིས་ཀ་སྒྲུབ་པར་བྱ་བ་ཡིན་ནོ།།
[2]དེ་ཉིད་ལས། ཚད་ནི་ཆུང་ངུ་སོར་བརྒྱད་ཀྱི།
།བརྒྱད་ཅུ་རྩ་བཞི་ཉིད་བྱ་ཞིང། །ཞེང་དུ་སོར་ནི་དྲུག་བྱ་སྟེ།
།འཕངས་སུ་ཡང་ནི་གཉིས་བྱའོ། །སོར་མོའི་ཚིགས་ཀྱི་ཚད་དག་གི
།ཟུར་བཞིར་ཚད་ནི་གཉིས་པ་ཡིན། །ལེགས་མཉམ་ཉིད་ནི་ཤིན་ཏུ་གསལ།
།རྩེ་གཉིས་སྦལ་པའི་མགོ་བཞིན་ནོ། །དེ་ནས་བརྡུང་བར་བྱེད་པ་ཡང།
།ཤིང་དེ་ཉིད་ལས་བཅད་དེ་བྱ། །སོར་བཅུ་གཉིས་ཀྱི་ཚད་དག་ལ།
།ཟླུམ་ཞིང་རྩེ་གཉིས་ནེའུ་ལེའི་མགོ །འཆང་བཟུང་ཚད་ཀྱང་དེ་བཞིན་ཏེ།
།ཤིན་ཏུ་འཇམ་དང་རྩིབས་མཉམ་པར། །གང་ཕྱིར་དེ་བརྡུངས་གཞན་དགོངས་པ། འོག་ཏུའང་དེ་ཡི་ཁྲི་བྱ་བ།
།ཞེས་གསུངས་པ་ལྟར་གཎྜི་དང་གཎ་གཡོག་གཉིས་ལས། གཎྜི་ནི་སྲིད་དུ་སོར་བརྒྱད་ཅུ་རྩ་བཞི།
ཞེང་དུ་སོར་དྲུག དཔངས་སུ་སོར་གཉིས། ཟུར་བཞིར་བརྒྱད་ཞོགས་སོར་གཉིས་དང་ལྡན་པ།
རྩེ་མོ་གཉིས་སྦལ་པའི་མགོ་བོ་འདྲ་བའོ། །གཎ་གཡོག་ནི་གཎྜི་ལ་འཕོག་པའི་སོར་བཅུ་གཉིས་ཀྱི་ཚད་དང། ལག་པས་བཟུང་བར་བྱ་བའི་འཆང་བཟུང་ལ་ཡང་ཚད་དེ་ཉིད་དང་ལྡན་པ།
རྩེ་མོ་གཉིས་ནེའུ་ལེའི་མགོ་བཞིན་དུ་ཡོད་པའོ། །གཎྜི་ཆུང་ངུ་སོར་ཉི་ཤུ་རྩ་བཞིའི་ཚད་ཀྱང་ཡོད་པར་བཤད་དོ།།
༥༽ རབ་གནས་ཇི་ལྟར་བྱ་ན།
སྐྱེ་མེད་ཆོས་དབྱིངས་སྤྲོས་བྲལ་ཆེན་པོའི་ངང་དུ་དམིགས་པ་གཏད་པས་རབ་ཏུ་གནས་པར་བྱ་བ་ཡིན་ཏེ། [3]དེ་ཉིད་ལས། དེའི་རབ་གནས་བྱ་བ་ནི།
།ཤིན་ཏུ་བརྟན་པའི་ཆོས་ཀྱི་སྐུ། །སྐྱེད་པ་མ་ཡིན་འཇིག་བྱེད་མིན།
།གདོད་ནས་མ་སྐྱེས་པ་དགེ་བ། །དེ་ལྟར་རབ་གནས་བྱས་ནས་ནི།
།དེ་ནི་སྤྱན་དབྱེར་གྱུར་པ་ཡིན། །ཞེས་གསུངས་སོ།།
༦༽ རྟེན་གྱི་གང་ཟག་གང་གིས་བརྡུང་ན།
དགེ་ཚུལ་སློང་གང་རུང་ངམ་དགེ་བསྙེན་གསོ་སྦྱོང་ལ་གནས་པས་ཀྱང་རུང་བ་ཡིན་ཏེ། [4]དེ་ཉིད་ལས། དགེ་སློང་རྣམས་དང་དགེ་ཚུལ་གྱིས།
།དུས་རྣམས་རྟག་ཏུ་བརྡུང་བ་སྟེ། །གསོ་སྦྱོང་ལ་ནི་གནས་ཚེ་ཡི།
།དགེ་བསྙེན་གྱིས་ཀྱང་བརྡུང་བར་བྱ། །ཞེས་སོ།།
༧༽ ཚུལ་ཇི་ལྟར་བརྡུང་ན།
དང་པོ་གསོ་དགག་དབྱར་སོགས་ཀྱི་ཆོ་གའི་སྐབས་དགེ་འདུན་བསྡུ་བར་བྱ་བའི་ཕྱིར་བརྡུང་བ་ནི།
སྒོ་ཁང་དུ་གཎྜི་སྟེགས་ལ་བཀོད་བཞིན་པ་དེ་ལ་དམིགས་ནས་དཀོན་མཆོག་གི་ཡོན་ཏན་ཡིད་ལ་བྱས་ཏེ།
གདིང་བ་བཏིང་ནས་ཆོས་གོས་བགོས་ཏེ་ཕྱག་གསུམ་འཚལ། ཕྱག་གི་དུས་གདིང་བ་རིང་བཏིང་དང་།
གཎྜི་བརྡུང་དུས་གདིང་བ་བཞི་ལྟེབ་ཏུ་བྱ་དགོས།
དེ་རྗེས་གཎྜི་ལག་གཡོན་གྱིས་རྐེད་པ་ནས་བཏེགས་པའི་སྣེ་ཕྲག་གཡོན་དུ་བཞག་སྟེ།
ལག་གཡས་ཀྱིས་གཎ་གཡོག་གིས་ཤད་ལན་གསུམ་སྔོན་དུ་འགྲོ་བས། རྒྱུད་གསུམ་དང་ཏོག་སྒྲ་ཆེན་པོ་གསུམ་སྟེ། རྒྱུད་རེ་རེ་ལ་ཡང་།
གཅིག་ནས་བཅོ་བརྒྱད་ཀྱི་བར་ཇེ་ཆེ་དང། བཅུ་དགུ་ནས་སོ་དྲུག་གི་བར་ཇེ་ཆུང་དུ་འགྲོ་བའི་ལན་གསུམ་བཅས།
མདོར་ན་བརྡུང་ཐེེབས་བརྒྱ་རྩ་བརྒྱད་དོ། །གཞན་ཡང་[5]གཎྜིའི་མདོ་ཉིད་ལས།
གཎྜི་སྤྱན་དབྱེ་བྱས་ནས་ཀྱང་། །དེ་འོག་གཙུག་ལག་ཁང་ཀུན་ཏུ།
།ཀླུ་བདུན་གྱིས་ནི་བརྒྱན་པ་ལྟར། །བསྐྱེད་པའི་རིམ་གྱིས་བརྡུང་བར་བྱ།
།དེ་འོག་དཀོན་མཆོག་གསུམ་ལ་ནི། །ཕྱག་བྱས་ནས་ནི་བརྡུང་བྱ་ཞིང་།
།ཤངས་ཚལ་ལན་གསུམ་བརྗོད་པས་ནི། །ཆོས་ཀྱི་རྔ་རྣམས་བརྡུང་བར་བྱ།
།ཞེས་གསུངས་པ་ལྟར་ཀྱང་བྱ་བ་ཡིན།།
གཉིས་པ་སྡོམ་པ་འབོགས་ཆོག་དང་སྤོ་མགུ་དབྱུང་གསུམ་ལ་སོགས་པའི་ཕྱིར་བཅོས་ཀྱི་ལས་རྣམས་བྱ་བའི་དོན་དུ་ནི།
རྒྱུད་གཅིག་དང་ཏོག་གསུམ་བརྡུང་ངོ་།།
གསུམ་པ་མི་མཐུན་པ་སྤོང་བའི་དོན་དུ་ནི།
འཁར་བསིལ་བསིལ་བའམ་གཎྜི་ཆུང་ངུ་བརྡུང་བར་བྱ།
བཞི་པ་གནོད་པ་བྱུང་བ་བཟློག་པའི་དོན་དུ་ནི།
གནོད་པ་དེ་ཉིད་ནམ་བྱུང་བ་ནས་ཞི་བར་མ་གྱུར་གྱི་བར་དུ་ཇི་ཙམ་པ་དེ་ཙམ་དུ་བརྡུང་ངོ་།།
ལྔ་པ་ཕུང་པོ་དབྱུང་བའི་དོན་དུ་ནི། ཏོག་མེད་པའི་རྒྱུད་ཉི་ཚེ་བ་བརྡུང་བ་ཡིན་ནོ།།
གཞན་ཡང་ཟན་ཟ་བའི་ཕྱིར་དུ་བརྡུང་བ་ནི། དང་པོར་གཎྜི་ཆུང་ངུར་བརྡུངས་ལ།
དུས་ཇི་ཙམ་གྱིས་སངས་རྒྱས་མཆོད་པ་དང་ལྷུང་བཟེད་བཀྲུ་བ་ལ་སོགས་པའི་ལས་གྲུབ་པར་གྱུར་བའི་དུས་དེ་ཙམ་ནས།
གཎྜི་ཆེན་པོར་བརྡུང་ཞིང་ཟས་ཀྱི་ཆེད་དུ་ཐམས་ཅད་འདུ་བར་བྱའོ། །གལ་ཏེ་འདུས་བ་ཆེན་པོའི་ཚེ་གཎྜི་བརྡུང་བ་གོ་བར་མི་འགྱུར་བ་ལྟ་ན།
དུང་བསྒྲིལ་ཏེ་འབུད་པའམ་རྔ་བོ་ཆེ་བརྡུང་ངོ་།།
༨༽ གང་དུ་བརྡུང་བའི་གནས་ནི།
ཁང་སྟེང་སྟེ་ཕྱོགས་མཐོན་པོ་གང་ཡང་རུང་བའི་དཔེ་ཡིན། དེ་ཡང་[6]གཎྜི་མདོ་ལས།
གཙུག་ལག་ཁང་གི་སྒོ་སྟེང་ངམ། །ཡང་ན་དབུས་མའི་སྟེང་དུ་བྱ། །ཞེས་སོ།།
༩༽ ཚུལ་དང་མཐུན་པར་བརྡུང་བའི་ཕན་ཡོན་ནི།
ནོར་བུ་དགོས་འདོད་ཀུན་འབྱུང་ལྟར་ཅི་འདོད་ཀྱི་རེ་བ་ཇི་བཞིན་ཕུན་སུམ་ཚོགས་པར་གྲུབ་པ་ཡིན་ཏེ།[7]དེ་ཉིད་ལས། གཎྜི་དེ་ནི་གྲགས་གྱུར་པ།
།དེར་ནི་དཔལ་དང་གྲགས་པ་དང་། །འདོད་པ་དང་ནི་ལོ་ལེགས་འགྱུར།
།ཕ་རོལ་དཔུང་གིས་འཇིགས་མེད་ཅིང་། །འབྲུ་རྣམས་ཀྱིས་ནི་ཉམས་མི་འགྱུར།
།སངས་རྒྱས་བྱིན་བརླབས་འབྱོར་བ་ཡིས། །དེར་ནི་བདུད་རྣམས་འདུལ་བར་འགྱུར།
།ཆོས་ཀྱི་རྔ་ནི་སྲིད་རྩེར་བཅས། །ཀུན་ནས་རབ་ཏུ་གཡོ་བར་འགྱུར།
།དམྱལ་དང་ཡི་དྭགས་འཇིག་རྟེན་རྣམས། །འཇིག་པར་འགྱུར་བར་ཐེ་ཚོམ་མེད།
།ཐམས་ཅད་སངས་རྒྱས་རྟག་དད་ཅིང་། །ཐམས་ཅད་ཆོས་ལ་གཞོལ་བར་འགྱུར།
།དེར་ནི་དགེ་འདུན་འདུལ་བར་ལྡན། །མཁས་པ་རྣམས་ཀྱང་འཕེལ་བར་འགྱུར།
།འདོད་ཆགས་ཞེ་སྡང་གཏི་མུག་རྣམས། །དེར་ནི་ནུབ་པར་འགྱུར་བ་ཡིན།
།ཞེས་སོགས་ཕན་ཡོན་གྱི་རྣམ་པ་དུ་མར་གསུངས་པ་ཡོད།
༡༠༽ ཚུལ་དང་མཐུན་པར་མ་བརྡུངས་པའི་ཉེས་དམིགས་ལ།
ཐོག་མར་རྒྱུ་དང་དབྱིབས་ཚད་དག་ལེགས་པར་མ་གྲུབ་ན་ཇི་ལྟར་ཉེས་ན། [8]གཎྜིའི་མདོ་ལས། ཚད་མེད་ཤིང་ངན་ལས་བྱས་དང་།
།བརྡུངས་དང་སྒྲ་ནི་མི་འབྱུང་བའི། །སངས་རྒྱས་ཡུམ་འདི་བརྡུངས་ན་ནི།
།ཡུལ་འཁོར་འཚེ་བ་ངེས་པར་འབྱུང་། །གཙུག་ལག་ཁང་དུ་དགེ་སློང་རྣམས།
།དེ་བཞིན་བློ་ནི་མི་མཐུན་དང་། །ཉེ་བར་གདུང་བ་འབྱུང་འགྱུར་ཞིང་།
།རྣམ་པ་དུ་མར་རྩོད་པར་འགྱུར། །མུ་སྟེགས་ཅན་གྱིས་དབང་འགྱུར་ཞིང་།
།བདུད་ཀྱང་འབྱུང་བར་འགྱུར་བ་ཡིན། །གདུག་པའི་ཀླུ་ནི་དུ་མ་ཡིས།
།འབྲུ་རྣམས་ཀྱང་ནི་ཉམས་པར་བྱེད། །རྒྱལ་ཁམས་འདིར་མང་སེམས་ཅན་རྣམས།
།རྣམ་པར་འཇིག་པ་ཉིད་དུ་འགྱུར། །གཙུག་ལག་ཁང་ཡང་འཇིག་འགྱུར་ཞིང་། །ཆོས་ཀྱང་ནུབ་པར་འགྱུར་བ་ཡིན།
།བདུད་ཀྱི་ལྷ་རྣམས་དགེ་སློང་གི །དགེ་འདུན་ཤིན་ཏུ་མ་བསྡམས་བྱེད།
།ཅེས་སོགས་རྟེན་འབྲེལ་གྱི་ཉེས་དམིགས་བསམ་གྱིས་མི་ཁྱབ་པར་གསུངས་པ་ཡོད་པ་དང་།
ཁྱད་པར་ཚུལ་དང་མཐུན་པར་མ་བརྡུངས་པའི་ཉེས་དམིགས་ལ།
གཞན་ལ་བདེ་བ་སྟེར་བས་ཐར་པའི་ས་བོན་སྟེར་རྒྱུ་ཕར་ཞོག
སངས་རྒྱས་དམ་པའི་གདམ་ངག་ཉམས་པའི་ཉེས་ལྟུང་ཀྱང་ཕོག་པར་སྨྲོས་ཅི་དགོས།
༡༡༽ དགོས་པ་ནི།
གནས་སྐབས་དང་མཐར་ཐུག་གི་དགོས་པ་བསམ་གྱིས་མི་ཁྱབ་པར་གསུངས་པ་ཡོད་པ་སྟེ། དེ་ཡང་[9]གཎྜིའི་མདོ་ཉིད་ལས། བཅོམ་ལྡན་འདས་ཀྱིས་བཀའ་བཙལ་བ།
གསལ་རྒྱལ། འདི་ནི་སེམས་ཅན་ཐམས་ཅད་ཀྱི་མ། སངས་རྒྱས་དང་བྱང་ཆུབ་སེམས་དཔའ་སྐྱེད་པ།
ཉན་ཐོས་དང་། རང་སངས་རྒྱས་དང་། ཡང་དག་པར་རྫོགས་པའི་སངས་རྒྱས་ཐམས་ཅད་ཀྱིས་ཕྱག་བྱས་པ།
མཆོད་པ། བསམས་པ། བསྒོམས་པ།
ཤེས་རབ་ཀྱི་ཕ་རོལ་ཏུ་ཕྱིན་པ་སྒྲའི་གཟུགས་ཀྱིས་སེམས་ཅན་ཐམས་ཅད་ཡོངས་སུ་སྐྱོང་བར་བྱེད་པ།
མུ་སྟེགས་པ་ཐམས་ཅད་རྣམ་པར་འཇིག་པར་བྱེད་པ།
འདོད་ཆགས་ཀྱི་སེམས་རྣམ་པར་སྤོང་བར་བྱེད་པ།
བྱང་ཆུབ་ཀྱི་སེམས་ཡོངས་སུ་སྐྱོང་བར་བྱེད་པ། སངས་རྒྱས་ཀྱི་སེམས་འཕེལ་བར་བྱེད་པ།
སངས་རྒྱས་འབྱུང་བ་སྟེན་པར་བྱེད་པ། འཐབ་པ་དང་། འགྱེད་པ་དང། འཁྲུག་པ་དང་།
རྩོད་པ་དང་། སྡུག་བསྔལ་བ་དང་། རྨི་ལམ་ངན་པ་དང་། ཀུན་འདུལ་བ་ཐམས་ཅད་འཇིག་པ།
གློ་བུར་གྱི་ནད་དང་། འཆི་བ་ཞི་བར་བྱེད་པ་དང་། དུས་མ་ཡིན་པར་འཆི་བ་དང་།
རིམས་ལ་སོགས་པ་ཞི་བར་བྱེད་པ། ཕ་རོལ་གྱི་དཔུང་འདུལ་བར་བྱེད་པ།
བདུད་རྣམ་པར་འཇིག་པར་བྱེད་པ། གདུང་བ་སེལ་བར་བྱེད་པ།
སྐལ་པ་བཟང་པོ་ཡང་དག་པར་འཕེལ་བར་བྱེད་པ། ཚེ་དང་ནད་མེད་པ་སྟེར་བར་བྱེད་པ། འཆི་བའི་འཇིགས་པ་ཞི་བར་བྱེད་པ།
ཐར་པ་དང་དཔལ་འཕེལ་བར་བྱེད་པ།
གང་གིས་ཐོས་ནས་རྗེས་སུ་ཡི་རང་བ་དེ་ལ་ཡིད་བཞིན་གྱི་ནོར་བུ་ལྟར་འབྲས་བུ་རང་ཏུ་སྟེར་བ།
ཡུམ་ཤེས་རབ་ཀྱི་ཕ་རོལ་ཏུ་ཕྱིན་པ་གཎྜིའི་གཟུགས་ཀྱིས་བཞུགས་སོ། །ཞེས་སོགས་གསུངས་སོ།།
No comments:
Post a Comment