༄༅།
།དཔལ་སྤྲུལ་སེམས་དཔའ་ཆེན་པོའི་ཞལ་གདམས་ཞེན་མེད་རྒྱལ་སྲས་ལག་ལེན་ཞེས་བྱ་བ་བཞུགས།
«རྒྱལ་སྲས་རྣམས་ཀྱིས་ལག་ལེན་དུ་བྱ་བའི་ཤེར་ཕྱིན་དངོས་བརྒྱད་དོན་བདུན་ཅུའི་ཉམས་ལེན་ཀུན་ཞེན་མེད་ཀྱི་གནད་དུ་བསྡུས་ནས་བསྟན་པའི་ཚིགས་སུ་བཅད་པ་བཅུ་གཅིག་པས་བརྒྱན་པ།»
༈ སངས་རྒྱས་དང་བྱང་ཆུབ་སེམས་དཔའ་རྣམས་ལ་ཕྱག་འཚལ་ལོ།།
༡
ཤེས་བྱ་མཁྱེན་པ་གསུམ་གྱི་དེ་ཉིད་ཤེས།།
ཉམས་ལེན་སྦྱོར་བ་བཞིའི་ལམ་ལ་བསླབ།།
ཐོབ་བྱ་འབྲས་བུ་ཆོས་སྐུར་སྦྱོར་མཛད་པའི།།
༢
དེང་འདིར་སྐལ་བ་དང་ལྡན་གང་ཟག་གིས།།
མཐར་ཐུག་འབྲས་བུ་ཆོས་སྐུ་མངོན་བྱ་བའི།།
ཐབས་ལམ་མ་ནོར་ཉམས་སུ་བླང་བ་ལ།།
རྒྱལ་བའི་སྲས་ཀྱི་ལག་ལེན་འདིར་ངེས་བྱ།།
༣
ཞེན་མེད་བྱང་ཆུབ་སེམས་ཀྱིས་གཞི་བཟུང་ནས།།
ཞེན་མེད་གདམས་ངག་ཉན་ཞིང་སྒྲུབ་ལ་ཞུགས།།
ཞེན་མེད་འབྱུང་བ་བརྒྱུད་དུ་ངེས་འབྱུང་བ།།
རྣམ་མཁྱེན་ལམ་བཟང་ཡིན་པར་འདིར་ངེས་བྱ།།
༤
ཞེན་མེད་ཐེག་གསུམ་ལམ་བཟང་ཉན་བསཾ་སྒོམ།།
ཞེན་མེད་ཐེག་གསུམ་ལམ་བཟང་འགྲོ་ཀུན་ལ།།
བསྟན་ནས་བྱང་ཆུབ་གསུམ་ལ་ལེགས་བཀོད་པ།།
རྒྱལ་སྲས་ལག་ལེན་ཡིན་པར་འདིར་ངེས་བྱ།།
༥
ཞེན་བཅས་གཉེན་པོ་ཡིན་ཀྱང་སྤང་བྱ་སྟེ།།
ཞེན་མེད་རྟོགས་པའི་ངོས་ན་བླང་དོར་མེད།།
ཞེན་དང་མ་ཞེན་ཁྱད་པར་འདི་ལྟར་ཞེས།།
རྒྱལ་སྲས་རྣམས་ཀྱི་སྤང་བླང་འདིར་ངེས་བྱ།།
༦
ཡུལ་ལ་མ་ཞེན་ཤེས་བྱའི་དེ་ཉིད་ཤེས།།
བློ་ལ་མ་ཞེན་ཐེག་གསུམ་རྟོགས་རིགས་བསྐྱེད།།
ཐབས་ཤེས་བཟུང་འབྲེལ་སྲིད་ཞིའི་མཐར་མི་ལྟུང།།
རྒྱལ་སྲས་རྣམས་ཀྱི་ལག་ལེན་འདིར་ངེས་བྱ།།
༧
ཞེན་མེད་སོ་སྐྱེའི་རྟོགས་ཐོབ་འཕེལ་བརྟན་གནས།།
ཞེན་མེད་འཕགས་པའི་ལམ་དུ་སྤངས་རྟོགས་རྫོགས།།
ཞེན་མེད་ལམ་མཐར་བྱས་ནས་བདེན་གཉིས་གཟིགས།།
རྒྱལ་སྲས་རྣམས་ཀྱི་རྟོགས་པ་འདིར་ངེས་བྱ།།
༨
ཞེན་མེད་ལམ་མཆོག་གཅིག་ལ་ལམ་ཀུན་འདུས།།
ཞེན་མེད་ཉམས་ལེན་གཅིག་གིས་ཚོགས་གཉིས་རྫོགས།།
ཞེན་མེད་ཡོན་ཏན་ཀུན་སྡུད་དམ་པའི་ལམ།།
རྒྱལ་སྲས་རྣམས་ཀྱི་ཐབས་མཁས་འདིར་ངེས་བྱ།།
༩
ཞེན་མེད་ལམ་མཐར་བྱས་པའི་སྐད་ཅིག་ལ།།
ཞེན་མེད་ལམ་གྱི་ཆོས་ཀུན་མངོན་བྱེད་ཅིང་།།
ཞེན་མེད་ཤེས་བྱའི་ཆོས་ཀྱི་དེ་ཉིད་མཐོང་།།
རྒྱལ་སྲས་རྣམས་ཀྱི་མཐར་ཐུག་འདིར་ངེས་བྱ།།
༡༠
ཞེན་མེད་དབྱིངས་ཀྱི་ངང་དུ་ཡོན་ཏན་རྫོགས།།
ཞེན་མེད་གཟུགས་སྐུའི་སྣང་བ་འགྲོ་ལ་འཆར།།
ཞེན་མེད་ཕྲིན་ལས་ནམ་མཁའི་མཐའ་ཁྱབ་པ།།
རྒྱལ་སྲས་ལམ་གྱི་འབྲས་བུར་འདིར་ངེས་བྱ།།
༡༡
ཟབ་ཅིང་རྒྱ་ཆེ་ཐེག་པ་ཆེན་པོའི་ལམ།།
ཟབ་ཅིང་རྒྱ་ཆེ་མི་འགལ་བསྡུ་བའི་གནད།།
ཟབ་ཅིང་རྒྱ་ཆེའི་ཚུལ་འདི་སུས་རྟོགས་པ།།
དེ་དག་རྒྱལ་བའི་ཡུམ་འདིས་རྗེས་སུ་འཛིན།།
༡༢
འདི་ལྟར་བགྱིས་པའི་བསོད་ནམས་དཔག་མེད་ཀྱིས།།
དམྱལ་བ་ཡི་དྭགས་དུད་འགྲོ་ལྷ་མ་ཡིན།།
གནས་ངན་ལེན་རྣམས་རྟག་ཏུ་སྤང་བྱས་ནས།།
རྒྱལ་བ་བྱམས་པའི་ཞབས་དྲུང་སྐྱེ་བར་ཤོག།
ཅེས་པ་དེ་ཡང་སེམས་པ་ཆེན་པོ་གང་གིས་རྒྱ་བོད་མཁས་གྲུབ་སྟོང་གི་གཞུང་ལུགས་དང་སྒོམ་ཡིག་ཇི་སྙེད་པ་ཐམས་ཅད་གནད་ཞེན་མེད་གཅིག་པུ་འདིའི་སྟེང་དུ་འདུ་བར་གསུངས་པ་དང་།
དེའི་དབང་གིས་སྤྱི་དོན་གྱི་བར་སྐབས་ཀྱི་ཚིགས་བཅད་རྣམས་ཀྱང་ཞེན་མེད་ཀྱིས་ཚིགས་སུ་བཅད་པའི་དོན་གྱི་སྒོ་ནས་བསྟན་པས།
གང་ལྟར་ཡང་གུས་པ་ཤེས་རབ་ཀྱིས་དབེན་པའི་ལྡོམ་བུ་བ་འཇིགས་མེད་དགྲ་འདུལ་དབང་པོར་འབོད་པས།
ཤེར་ཕྱིན་ལ་ཐོས་བསམ་བྱེད་སྐབས་ཀྱི་མཁྱེན་གསུམ་འཇུག་སྡུད་ཀྱི་དཔེ་འཁྲིད་ཉིན་མོར།
དེ་ལྟར་ཐམས་ཅད་གང་གི་ཞལ་གདམས་ཟབ་མོར་ངེས་པའི་ཡིད་ཆེས་ཀྱི་འདུན་པས་སྤྲོ་དགའ་བརྟས་པས།
འདི་ལྟར་གང་གིས་མཛད་པའི་ཤེར་ཕྱིན་སྤྱི་དོན་གྱི་སྐབས་སོ་སོའི་བར་སྐབས་ཀྱི་ཚིགས་བཅད་རྣམས་དང་།
དེའི་སྒོམ་རིམ་གྱི་མཆོད་བརྗོད་དམ་བཅའ་བར་སྐབས་ཚིགས་བཅད་བཅས་པ་ཟུར་བཀོལ་ཚིག་འགྱུར་ཅུང་ཟད་བགྱིས་པས།
ནོངས་པ་ཅི་མཆིས་གང་གི་སྤྱན་སྔར་བྲང་སྙིང་མི་ཕྱེད་པས་མཐོལ་ཞིང་བཤགས་ལ།
དགེ་རྩ་ཅི་འགྱུར་མ་རྒན་རིགས་དྲུག་ཀུན་པོ་ཁྱབ་བདག་གདོད་མའི་ཆོས་སྐུའི་ཀློང་དུ་གྲོལ་བར་འགྱུར་ཅིག་གུ།
འདི་ཉིད་ཤེར་ཕྱིན་ལ་ཐོས་བསམ་བྱས་རྗེས་དུས་རྟག་ཏུ་སྒོམ་རིམ་དང་འབྲེལ་བར་འདོན་བརྩོན་བྱས་ན། མངོན་མཐོ་དང་ངེས་ལེགས་གང་རུང་གི་གོ་འཕང་ཐོབ་པར་གདོན་མི་ཟ་བས།
རང་ཉིད་ཀྱིས་རང་ལ་གདམས་པའི་ཚུལ་དུ་ངེས་ཤེས་སྐྱེ་བར་བྱ་རྒྱུ་གལ་ཆེ་བར་མཐོང་།
ཚིགས་སུ་བཅད་པ་བཅུ་པོ་འདི་དག་ལས་འོག་གི་ཤློ་ཀ་བརྒྱད་པོ་རེ་རེར། དངོས་པོ་བརྒྱད་པོ་མཚོན་བྱེད་ཀྱི་ཆོས་བདུན་ཅུ་ལ་སོགས་པ་དངོས་ཤུགས་བརྒྱུད་གསུམ་གྱི་སྒོ་ནས་མ་ཚང་བ་མེད་པར་བསྟན་པས་ན།
ཤློ་ཀ་རེ་རེའི་ནང་དུ་དངོས་པོ་དེ་དང་དེ་མཚོན་བྱེད་ཀྱི་ཆོས་རྣམས་རིམ་གྱིས་དྲན་བཞིན།
རང་གིས་རང་ལ་གདམས་པའི་ཚུལ་དུ།
ཉམས་ལེན་གྱི་ཆར་སྦྱོར་བ་ལག་ལེན་ལ་ཁེལ་བར་བྱས་ན་མི་ལེགས་རྒྱུ་ཞིག་ཅང་མ་མཆིས་པར་འདུག་པར་ངེས་སོ།།
དེ་ལྟར་བློ་བཟང་དམ་པའི་གསུང་བཟང་ལས།།
རྒྱལ་བའི་སྲས་ཀྱི་བླང་དོར་ཉམས་ལེན་ཀུན།།
ཆུ་བརྒྱ་ཟམ་གཅིག་ལྟ་བུར་ཞེན་མེད་དུ།།
བསྡུས་ནས་གདམས་འདི་ཨེ་མ་ངོ་མཚར་རྨད།།
བཀའ་བར་མཚན་ཉིད་མེད་པའི་ཆོས་འཁོར་གྱི།།
ཤེར་ཕྱིན་ཡུམ་སྲས་བཅུ་བདུན་གཙོར་གྱུར་པའི།།
ཉམས་ལེན་གནད་བསྡུས་འདི་ལྷག་མེད་པར་རློམ།།
དེ་ཕྱིར་གདམས་པ་འདི་ལ་བརྩོན་པར་འོས།།
སྦས་དོན་ལམ་གྱི་རིམ་པས་དྲང་ངེས་ཀྱི།།
དེ་བཞིན་གཤེཌ་གསུངས་ཇི་ཙམ་འགྲེལ་ནའང་།།
གོ་རྒྱུ་མེད་པའི་སྐྱེས་བུ་ང་དག་ལ།།
ཐབས་དོན་བདེ་བླག་གྲུབ་བྱེད་འདི་ཙམ་ཆོག།
དེ་ཕྱིར་དེ་ལྟར་ཕྱི་ཡི་ཡོངས་འཛིན་ལ།།
བརྟེན་ནས་ནང་གི་ཡོངས་འཛིན་ཚད་ལྡན་ཞིག།
ཡོང་རྒྱུར་དཀའ་ཡང་བརྩོན་པ་ཆུའི་རྒྱུན་ལ།།
རག་ཕྱིར་རྒྱུན་སྒོམ་བྱ་སླད་འདི་ལྟར་གྱིས།།
སརྦ་མངྒ་ལ་སྭསྟྱ་ཡ་ནཾ།
No comments:
Post a Comment