སྙན་ངག་སྟེ།
མིའི་སེམས་ཁམས་ཀྱི་ཚོར་བ་ཤུགས་ཅན་ལས་འཁྲུངས་པ་ཡིན་ལ།
ཚོར་བ་དེ་དག་ནི་འཇིག་རྟེན་སྟེང་གི་ཚོར་བ་གསོན་པོའི་ཚོགས་རྣམས་ཡིན།
སྙན་ངག་སྟེ།
བློ་རིག་རྒོད་ཅིང་དྲན་པ་མྱུར་བའི་ཤེར་ལྡན་གྱི་ཚོགས་རྣམས་ཀྱི་སྤྱོད་ཡུལ་ཡིན་ལ།
སྙན་ངག་སྟེ།
མི་ཡིན་ཚད་ཀྱིས་འབྲི་མི་ཐུབ་ལ།
སློབ་སྦྱོང་ཡོད་ཚད་ཀྱིས་ཀྱང་འབྲི་མི་ཐུབ།
ཅིའི་ཕྱིར་ཞེ་ན།
སྙན་ངག་ནི།
རང་བྱུང་ཁམས་དང་འབྲེལ་དབང་ཆེ་བས།
ཕོ་མོའི་དབར་གྱི་བརྩེ་གདུང་ཞིག་དང་ཆ་ཡིན།
དེས་ན།
མིའི་སིམས་ཁམས་ནི།
རང་བྱུང་ཁམས་དང་འབྲེལ་དབང་ཆེ་མི་ཆེ་ཅི་རིགས་ཡོད་པས།
དེ་ཡི་རྐྱེན་གྱིས།
སྙན་ངག་ལ་དགའ་མི་དགའང་ཅི་རིགས་འབྱུང་གིན་ཡོད།
སྙན་ངག་ལ་དོ་དབྱིངས་ཟབ་པ་ཚོས།
ནམ་ཞིག་སྙན་ངག་གི་རྒྱ་མཚོའི་གཏིང་རུམ་དུ་ལྷུང་བ་ནས་བཟུང་།
མི་དེས་རང་བྱུང་ཁམས་ཀྱི་ཡོད་ཚད་ནས་ཡོད་ཚད།
སྙན་ངག་གི་དེ་ཁོ་ན་ཉིད་ལས་མ་འདས་པར་སྣང་ཞིང་།
དེ་ལས་ལྡོག་ཐབས་ཡེ་ནས་མེད་པའི་གཏན་ཚིགས་ཞིག་ཀྱང་རྙེད་ཀྱི་ཡོད།
གཏན་ཚིགས་དེ་རྙེད་ནས་བཟུང་།
རང་ཉིད་སྙན་ངག་པ་དངོས་མར་གྱུར་པ་ཡིན་ལ།
རང་ཉིད་དང་འབྲེལ་དབང་ཆེ་བའི་རང་འབྱུང་ཁམས་ཀྱང་།
ཤོག་དཀར་ལེབ་མོར་སྣག་སྨྱུག་གིས་ཕབ་ཀྱང་རུང་མ་ཕབ་ཀྱང་རུང་།
ཡོད་ཚད་ནས་ཡོད་ཚད་སྙན་ངག་གི་ཆོས་ཉིད་ལས་མ་འདས་པ་ཡིན་མོད།
འོན་ཀྱང་སྙན་ངག་པས།
ཅིས་ཀྱང་དེ་དག་ཤོག་ཐོག་ཏུ་འབེབས་གང་ཐུབ་བྱེད་ཀྱི་ཡོད།
དེ་དག་ནི་སྙན་ངག་ལ་གདུང་ཞེན་ཟབ་པ་དག་གི་རྟོགས་བརྗོད་ཡིན།
No comments:
Post a Comment