༈ དཔལ་ལྡན་བླ་མ་དམ་པར་ཕྱག་འཚལ་ལོ།།
སེམས་བསྐྱེད་སྐོར་གྱི་དྲིས་ལན་ཅུང་ཞིག་འབུལ།།
གཞན་དོན་དུ་རྫོགས་བྱང་འཐོབ་འདོད་ཀྱི་བློ་སེམས་བསྐྱེད་ཀྱི་མཚན་ཉིད། ཟུར་གསུམ་སྟེ། གཞན་དོན་དུ་ཞེས་པས་རང་དོན་ཞི་བ་ཡིད་བྱེད་གཅོད། རྫོགས་བྱང་འཐོབ་འདོད་ཀྱི་བློ་ཞེས་པས་དངོས་སུ་དོན་དམ་སེམས་བསྐྱེད་གཅོད་ཅིང་། ཤུགས་ལ་འདོད་པའི་བློ་ཞེས་པས་སེམས་སེམས་འབྱུང་རྐྱང་པ་རེ་ལ་སེམས་བསྐྱེད་དུ་འདོད་པ་གཅོད་པ་སྟེ། འདོད་པ་ཞེས་པས་སེམས་བྱུང་འདུན་པ་བསྟན་པ་དང་། བློ་ཞེས་པས་གཙོ་སེམས་བསྟན་པ་ཡིན་པས། དེ་གཉིས་མཚུངས་པ་ལྔ་མཚུངས་ཀྱིས་འབྲལ་མི་ཤེས་པར་གནས་པའོ། །འདུན་པ་ནི་གཉིས་ཏེ། ཆེད་དུ་བྱ་བ་སེམས་ཅན་ཐམས་ཅད་ཀྱི་དོན་དུ་དང་། དོན་དུ་གཉེར་བྱ་རྣམ་མཁྱེན་འཐོབ་པའི་དོན་དུ་འདུན་པའོ། །དེ་ལྟར་འདུན་པ་དང་མི་འབྲལ་བའི་སེམས་བསྐྱེད་དགོས་སོ།།
